Muchisabhirwe ku‑Nyamuwanga
3
1 Woori abhayiri bheeswe, muchisabhirwe korereki Emisango ja Ekisi inguru ya Raatabhugenyi Yeesu, jigenderere okuswirana bhwangu na abhaanu bhajiramire kwa echibharo, rwa kutyo jaariga jiri kw‑imwe. 2 Muchisabhirwe korereki Nyamuwanga achiwonʼye mu‑bhaanu abhajabhi na abha ebhibhiibhi, kwa okubha bhatari bhoone bhanu bheekirisiisye emisango ejo. 3 Nawe Raatabhugenyi Yeesu ni mwiyikanyibhwa, omwene kaja okubhakomeesya na okubhaangarira okusooka ku‑Mubhiibhi urya. 4 Raatabhugenyi kaachiyaana obhwiyikanyo bhunene kw‑imwe ati, woori omukora jinu echibharagirira, ka wone omuja okugenderera okujikora. 5 Raatabhugenyi atangasye emyoyo jeemwe mu‑ryenda rinu erisooka ku‑Nyamuwanga na okwigumiirisya kunu okusooka ku‑Kirisito.Obhutinge bhwa okukora emirimu
6 Abhayiri bheeswe, echibharagirira kw‑isiina rya Raatabhugenyi Yeesu Kirisito ati, mwikenge na abhayiri bhoone abharenga, bhanu bhatakuruubha ameeyigisyo ganu ꞉chaabhayaaye. 7 Echaayika kutyo kwa okubha, emwe mumenyere kutyo jeenderwe muruubhe jitungwa jeeswe. Eswe bhunu chaariga chiri aamwi na emwe chaariga chitari bharenga, 8 ka wone ꞉chitaariye ebhiryo bhya omuunu woonewoone, chitasoosisye jipirya. Chaariga nichikora emirimu kwa obhwikomeesya mu‑ngeta na mu‑mwisi, korereki chisige okunyaasya omuunu woonewoone mw‑imwe. 9 Omwanya gunu chaakoraga kutyo, jitari ati chaariga chiteeyire okukena echiinu kw‑imwe, nawe ꞉chaakorere kutyo korereki chibhe chijekekanyo kw‑imwe, mwiyigire. 10 Omwanya gunu chaariga chiri aamwi na emwe, ꞉chaabharagiriiye ati, “Omuunu woonewoone unu atakwenda okukora emirimu, asige okurya ebhiryo.”
11 Echaayika emisango ejo kwa okubha echuungwa ati, bhari‑wo abhaanu abhandi mw‑imwe ni bharenga, bhatakukora omurimu gwonegwone, tari abheeyingisya mu‑misango ja abhandi. 12 Abhaanu abho echibharagirira na okubheerembeeresya kw‑isiina rya Raatabhugenyi Yeesu Kirisito ati, bhabhe nibhakora emirimu bhasimbiirire, korereki bharye ebhiryo bhyebhwe abheene. 13 Nawe emwe abhayiri bheeswe, musige okuyigwa okukora ja ekisi.
14 Araabha omuunu woonewoone, atakwenda okuruubha emisango jeeswe jinu jiri ku‑nyarubha inu, mwikenge omuunu oyo. Musige okubha na obhumwi nage, korereki eesware. 15 Nawe musige okumurora rwa omusoko, tari mumugonye rwa omuyiri weemwe.
Emisango ja okuragana
16 Woori, Raatabhugenyi Yeesu omwene unu ari obhwambiro bhwa omurembe, abhayaanega omurembe omwanya gwone ku‑njira joone. Omwene abhe aamwi na emwe bhoone. 17 Anye Pawuro enibhakaamira obhukeesya omwanya gunu kwa okubhoko kwani omwene. Echo nicho echibharikisyo ku‑nyarubha jaani joone, nikwo kutyo enikaamaga.
18 Obhwitiriranya bhwa Raatabhugenyi weeswe Yeesu Kirisito, bhubhe aamwi na emwe bhoone.