Okusubha kwa Yeesu
2
1 Woori, abhayiri bheeswe, echibhakaamira inguru ya okusubha kwa Raatabhugenyi weeswe Yeesu Kirisito na kutyo chirikumanywa, korereki chibhe aamwi nage.a Kurwa ejo, echibheerembeeresya ati, 2 musige okusurumbara noorwo okuubhaya mu‑myoyo jeemwe ati, orusuku rwa okusubha Raatabhugenyi Yeesu rwakingire. Amwi mubhe munguuwe kutyo okuruubhana na obhuragi obhurebhe, amwi emisango, amwi musomere inyarubha inu eyitogerwa ati isookere kw‑iswe. 3 Mwasiga okwikirisya omuunu woonewoone abhajige ku‑njira yooneyoone irya, inguru ya orusuku orwo. Orusuku orwo ruchaari okukinga, abhaanu bhaafu bharirema Nyamuwanga, ka wone Omunyamusi urya wa ebhiraagiro,b arituurwa abhweru. Obhuteero bhwaye bhuribha okusingaarisibhwa chimwi. 4 Nawe ku‑bhwambiro ariigaana abhwerubhweru, bhuri chiinu chinu abhaanu abhatoga ati ni Nyamuwanga, noorwo bhuri chiinu chinu abharamya. Omwene ariituura inguru ya ebhyo bhyone. Ka wone, ariingira na okwinyanja mw‑Iyekaru rya Nyamuwanga na okwikora wuti omwene niwe Nyamuwanga.5 Mutakwichuka ati naabhabhwiraga emisango ejo, omwanya gunu naariga niri aamwi na emwe eyo? 6 Emwe mumenyere ati, chiri‑wo echiinu chinu echiyingirira Omunyamusi oyo. Kaayingirirwa korereki atuurwe ku‑bhweru omwanya gunu gwiyire ku‑Nyamuwanga. 7 Omunyamusi oyo, noorwo woori kaakora emirimu jaaye bhumbise muno. Nawe, ataribhonekana abhweru okukingira unu kaamuyingirira arisoosibhwa‑wo. 8 Awo niwo Omunyamusi oyo arituurwa abhweru. Nawe Raatabhugenyi Yeesu aribha aasubha rindi, arimwita na omwika gwa mu‑kanwa kaaye na arimusingaarisya na rikusyo rya okuuja kwaye.
9 Mbe, Omunyamusi oyo omwanya gwa okutuurwa abhweru kwaye, ariija na obhuturo bhwone bhwa Syetaani.c Niwo, ku‑bhuturo obhwo arikora ebhibharikisyo na ebhiruguusyo bhya orubheeyi. 10 Arikora injira yooneyoone irya ya okujiga abhaanu bhanu abhabhura, kwa okubha bhatakwenda echimari korereki bhachunguke. 11 Kurwa ejo, Nyamuwanga abhasigire bhajigwe muno, korereki bhagenderere okwikirisya orubheeyi. 12 Awo niwo bhoone bhanu bhatakwikirisya echimari, tari abhakondererwa ebhibhiibhi, bhariramurwa.
Okurumatana kisi na okugwata ameeyigisyo
13 Nawe eswe, echikenwa chisiime Nyamuwanga bhuri rusuku ku‑songa yeemwe. Emwe abhayiri, mwenderwe na Raatabhugenyi Yeesu. Echisiima Nyamuwanga, kwa okubha ꞉aabhawuuwe, echiinu choonechoone chichaari okubhumbwa korereki muchungurwe. Muchunguuywe kwa okubha mwesibhwe na Mwoyo Mweru, ka wone mwikirisiisye echimari. 14 Nyamuwanga ꞉aabhabhirikiiye, korereki muramire obhuchungusi obhwo ku‑njira ya Emisango ja Ekisi jinu ꞉chaaraasiisye kw‑imwe. ꞉Aabhabhirikiiye korereki musangire aamwi mw‑ikusyo rya Raatabhugenyi weeswe Yeesu Kirisito. 15 Woori abhayiri bheeswe, murumatane kisi na okugwata ameeyigisyo ganu ꞉mwaramiiye, ku‑njira ya omusango gweswe gunu ꞉chaaraasiisye amwi ꞉chaabhakaamiiye ku‑nyarubha yeeswe.
16 Raata weeswe Nyamuwanga, kaacheenda na ku‑bhwitiriranya bhwaye, arichisimbiisya akajaanende na okuchiyaana obhwiyikanyo ati arichiyaana ebhiinu bhya ekisi bhinu ꞉aachiragire. Echisabhwa omwene na Raatabhugenyi weeswe Yeesu Kirisito ati, 17 abhasimbiisye emyoyo na okubhakomeesya, korereki mukorega na okwayika jinu jiri ja ekisi.