Inyarubha ya kabhiri ya Pawuro
ku‑Bhatesaroonike
Obhukeesya
1
1 Inyarubha inu, niikaamire anye Pawuro, niri aamwi na Sirwanoa na Timoteewo. Echibhakaamira emwe bhanu muri mw‑ikanisa rinu riri mu‑musi gwa Tesaroonike, emwe bhanu mwikirisiisye Raata weeswe Nyamuwanga na Raatabhugenyi Yeesu Kirisito.2 Obhwitiriranya na omurembe okusooka ku‑Raata Nyamuwanga na ku‑Raatabhugenyi Yeesu Kirisito bhibhe aamwi na emwe.
Indamu ya Nyamuwanga omwanya gwa obhuteero
3 Woori, abhayiri bheeswe, echikenwa chisiime Nyamuwanga bhuri rusuku ku‑songa yeemwe. Jiiyire chikore kutyo, kwa okubha eriikirisya ryemwe eriiyongesya muno, ka wone, eryenda ryemwe erigenderera okwiyongesya kw‑imwe abheene kwa abheene. 4 Eswe wone, echikonderwa muno bhunu echisimura inguru yeemwe, mu‑makanisa ga Nyamuwanga. Echikondererwa kutyo omugenderera na obhwigumiirisya bhwemwe na eriikirisya ryemwe noorwo mu‑bhinyaasyo bhyone bhinu omubhona.
5 Mbe, ejo joone ejeeresya ati, obhuramusi bhwa Nyamuwanga ni bhwa echimari. Nyamuwanga aaramura ati, emwe mwiyire mwingire mu‑bhukama bhwaye.b Nikwo okukora, emwe omunyaaka inguru ya obhukama bhwaye. 6 Mumenye ati, Nyamuwanga niwe owa rirenga. Omwene niwe arisubhya orusiima ku‑bhaanu bhoone bhanu abhabhanyaasya, 7 niwo aribhafungʼamya emwe na eswe okusooka mu‑bhinyaasyo. Arikora kutyo, bhunu Raatabhugenyi Yeesu arisubha rindi okusooka mu‑rwire, ari aamwi na bhamaraayikac bhaaye abha obhuturo bhwafu, 8 asingiiywega ribheesi rya omuriro. Omwene niwe ariramura abhaanu bhoone bhanu abharema Nyamuwanga, ka wone bhatakugayuka Emisango ja Ekisi ja Raatabhugenyi weeswe Yeesu. 9 Indamu yeebhwe iribha okusingaarisibhwa akajaanende koone, bharitaganyibhwa na Raatabhugenyi chimwi, ka wone bharisoosibhwa mw‑ikusyo rya amanaga gaaye. 10 Indamu eyo, irikorekana orusuku runu Raatabhugenyi ariija. Ariija korereki abheerud bhaaye bhoone bhanu bhamwikirisiisye, bhamukusye na okumuyaana echibharo. Emwe wone muribha agati yeebhwe, kwa okubha mwikirisiisye emisango jinu ꞉chaabhabhwiriiye.
11 Kurwa ejo, echisabhwa Nyamuwanga weeswe bhuri rusuku ati, abhayaane obhuturo bhwa okwikara obhurame bhunu abhabhirikiiye mwikare. Ka wone, echimusabhwa ati, ku‑bhuturo bhwaye akuumisye bhuri musango gwa ekisi gunu omukena okukora na akuumisye bhuri musango gunu omukora mu‑riikirisya. 12 Echisabhwa ejo, korereki risiina rya Raatabhugenyi weeswe Yeesu rikusibhwe ku‑jinu omumukorera, nyabhuriko emwe wone mukusibhwe ku‑jinu kaabhakorera. Ejo ejija okukorekana ku‑bhwitiriranya bhwa Nyamuwanga weeswe na obhwa Raatabhugenyi Yeesu Kirisito.