Inyarubha ya okwamba ya Pawuro
ku‑Bhatesaroonike
Obhutangati
Inyarubha inu ꞉yaakaamirwe na Pawuro itumwa ya Yeesu Kirisito. ꞉Aakaamire inyarubha inu ari aamwi na Sirwano na Timoteewo. ꞉Aakaamire inguru ya abheekirisya bhanu bhaariga bhari mu‑musi gwa Tesaroonike, yaariga wuti emyaka ja makumi gataanu na imwi (51), Kirisito eebhuuywe.
Pawuro ꞉aakingire mu‑musi gwa Tesaroonike mu‑mukoowa gwa Makedooniya omwanya gwa orugendo rwaye rwa akabhiri rwa okuraasya Emisango ja Ekisi ja Yeesu (ringira Ebhikorwa bhya Jitumwa 17:1-10). Mu‑musi ogwo, abhaanu bha amayijo ga bhuri mbaga nibheekirisya emisango jaaye. Pawuro ejire aasimbagisya rikanisa Tesaroonike awo, ebhinyaasyo ebhiruru kabhukabhu nibhyamba ku‑bheekirisya. Pawuro ˆnaaramura okwimuka okusooka‑wo omwanya ogwoogwo. Ejire aasooka eyo, ˆnaayigwa okusubha‑yo rindi, niwo ˆnaatuma oweejaabho unu aatogwaga Timoteewo, okugenda Tesaroonike okusimbagisya emyoyo ja abheekirisya bhende‑yo. Pawuro omwene ꞉ataagendere eyo, nawe ꞉aagendereeye okuraasya Emisango ja Ekisi orubhaara orundi. Omwanya omutooto okutura, Timoteewo ˆnaasubha ku‑Pawuro, ˆnaamureetera emisango inguru ya eriikirisya na obhurame bhwa abheekirisya bha Tesaroonike. Pawuro ejire oongwa emisango ejo, ˆnaakonderwa muno, ˆnaabhakaamira inyarubha ya okubhakuuya, na okubhoongesya ameeyigisyo agandi. Mu‑meeyigisyo gaaye, ꞉aabhasimbagisiisye emyoyo jeebhwe korereki bhagenderere okwikara obhurame bhunu obhukondera Nyamuwanga (5:6-8). ꞉Aabhakaamiiye inguru ya okwigumiirisya mu‑bhinyaasyo, na inguru ya okubha na echimari ati, Yeesu arisubha na abheekirisya bhariikara aamwi nage (4:13-18).