Inyarubha ya Pawuro
ku‑Bhakorosaayi
Obhutangati
Inyarubha inu, ꞉yaakaamirwe na Pawuro, itumwa ya Yeesu Kirisito, inguru ya abheekirisya bha Korosaayi. Korosaayi gwariga guri musi omutooto mu‑mukoowa gwa Asiya. Ku‑mwanya gunu Korosaayi ni rubhaara rwa echaaro cha Ebhuturuuki. Pawuro omwene ꞉ateeyigisiisye Korosaayi eyo, tari chise cha abharuubhirisya Korosaayi awo, ꞉chaambisiibhwe na omuunu unu aatogwaga Epaafura.
Omwanya gunu Pawuro aariga abhoyerwe mw‑ibhoyero, Epaafura ꞉aamuruubhire mw‑ibhoyero eyo, ˆnaamubhwira inguru ya abheeyigisya bha orubheeyi bhanu bhaariga nibhanyaasya abheekirisya. Korosaayi awo, bhyariga bhiri‑wo ebhise bhibhiri bhya abheekirisya, echise cha Echiyawudi na echa Echiyunaani. Mbe, abhaanu abharebhe mu‑bhise bhibhiri ebhyo, bhaariga nibheenda okusaasya ameeyigisyo ga Yeesu na ga jidiini jeebhwe ja kara.
Abhayawudi bhanu bheeyigisyaga ameeyigisyo ga orubheeyi, bhaariga nibheekirisya ati abheene ni bhaanu bhanu ꞉bhaawuuywe na Nyamuwanga. Mbe, noorwo araabha omuunu ni muruubhirisya wa Yeesu, akabha atatenderwe na akabha atakuruubha ebhiraagiro na amaragiriro ga Echiyawudi, atakutura okwikirisibhwa na Nyamuwanga. Abhayunaani bhanu bheeyigisyaga ameeyigisyo ga orubheeyi, bhaariga nibheekirisya ati, kwa okubha Nyamuwanga atari na ebhibhiibhi, ataakaturire okubhumba echaaro chinu ꞉bhaarorere ati chiri na ebhibhiibhi. Ka wone, bhaariga nibheekirisya ati omubhiri gwa omuunu guri na ebhibhiibhi, kurwa ejo, ꞉itaakaturikeene Yeesu abhe Nyamuwanga na okurama ku‑chaaro rwa omuunu.
Pawuro kaagonya ameeyigisyo ga orubheeyi ago, kwa okwiyigisya echimari inguru ya Yeesu. Yeesu Kirisito ni Nyamuwanga, ꞉aabhumbire echaaro na niwe omukuru wa ebhibhumbwa bhyone. ꞉Aaramire ku‑chaaro anu ari muunu na ꞉aafuuwe inguru ya ebhibhiibhi bhyeswe korereki chifwirwe echigongo. Emisango jinu Yeesu ꞉aakorere jiiyire chimwi. Omuunu woonewoone akeekirisya Yeesu, Nyamuwanga wone arimwikirisya. Bhutari‑wo obhukene bhwa okutendwa noorwo okuruubha ebhiraagiro amwi obhusimukwa bhwonebhwone.
Pawuro kaabhwira abheekirisya ati, ni bhusibhusi bhasige jitungwa jimbiibhi ja kara, woori bharame obhurame obhuyaaya bhunu obhukondisya Nyamuwanga. Kaayika ejo, korereki eeyigisye abharume na abhagasi, abheebhusi na abhaana, abhagaya na abhaniibhi, kutyo abheendwa bhakoreranirega.