4
1 Kurwa ejo, abhayiri bhaani, mwimereeguru murumateene mu‑kwiyikanya Raatabhugenyi Yeesu. Enibheenda na niri na obhwira bhwa okubhugana na emwe, abheendwa bhaani. Emwe neemwe rikonderwa ryani na orutengya rwani rwa obhuyigi runu niriyaanwa inguru ya emirimu jinu nikorere.Pawuro kaasoosya amaragiriro
2 Eniirembeeresya muno Ewodiya na Sitiike, bhabhe na obhwira bhumwi kwa okubha abheene abharuubha Raatabhugenyi Yeesu. 3 Noorwo awe omukosi weejaasu omwiyikanyibhwa, enikusabhwa usakire abhagasi abho, korereki bhabhe na obhukarariiye bhumwi. Abho bhoone bhaanyaakaga muno aamwi na anye na Keremeeti na abhakosi bheejaasu abhandi, mu‑kuraasya Emisango ja Ekisi. Amasiina ga abhaanu abho bhoone gakaamirwe mu‑chitabho cha obhuwanga.
4 Mukonderwe siku joone kwa okubha emwe muri na obhumwi na Raatabhugenyi Yeesu, enaayika rindi ati mukonderwe! 5 Obhworooro bhwemwe bhumenyekane ku‑bhaanu bhoone. Raatabhugenyi Yeesu ari yeeyi. 6 Musige okusurumbara inguru ya echiinu choonechoone, tari mu‑joone, musabhwe Nyamuwanga, mumwirembeeresye aamwi na okumusiima. Obhukene bhwemwe bhumenyekane ku‑mwene. 7 Niwo, omurembe gwa Nyamuwanga gunu ogukira okusombookerwa kwone kwa abhaanu guririnda emitima na obhwiganirisya bhwemwe kwa okubha muri na obhumwi na Kirisito Yeesu.
8 Ku‑bhuteero, abhayiri bhaani, emisango ja echimari, emisango jinu jiiyire jiyanwe echibharo, emisango ja obhurengeresi, emisango emyeru, emisango jinu ejikondisya, emisango jinu jiri ja ekisi, emisango jinu jiiyire okukuuyibhwa, ejo nijo mwiganirisye. 9 Mugenderere okukora jinu ꞉mweeyigiiye, jinu ꞉mwaramiiye, jinu ꞉mwoonguuwe okusooka kw‑anye na jinu ꞉mwarorere ninkora. Niwo, Nyamuwanga unu kaabhayaana omurembe arigenderera okubha aamwi na emwe.
Pawuro kaasiima Abhafiriipi
10 Mbe, naakonderwa muno inguru ya okubha na obhumwi na Raatabhugenyi Yeesu, kwa okubha ku‑bhuteero, mwaamba rindi okunyiganirisya. Enimenya ati siku joone mwariga nimunyiganirisya, nawe mwabhurirwe omwanya gwa okukora kutyo. 11 Nitakwayika kutyo kwa okubha niri na obhukene, wuri. Anye niyigiiye okwiywa mu‑bhuri musango. 12 Obhugajuro bhwani ni ati, woori niyigiiye okwikara rwa omutaka, ka wone niyigiiye okwikara rwa omuniibhi. Niyigiiye okwiywa, mu‑bhuri musango, okwiguta na okurumwa omweko, okufufya na okukeeyerwa. 13 Enitura okukora emisango ejo joone, kwa okubha Kirisito niwe kaanaana amanaga.
14 Noorwo kutyo, ꞉mwakorere kisi okusangira aamwi na anye mu‑bhinyaasyo bhinu naariga niri nabhyo. 15 Rwa kutyo emwe Abhafiriipi mumenyere, omwanya gunu ꞉naambire okubharaasisya Emisango ja Ekisi, na omwanya gunu ꞉naasookere mu‑mukoowa gwemwe gwa Makedooniya, emwe abheene era nibho mwariga nimunsakira. Rikanisa ryemwe era niryo ryariga riri na obhumwi naanye mu‑kusoosya na mu‑kuramira ebhiinu. 16 Noorwo omwanya gunu naariga niri mu‑musi gwa Tesaroonike, mutaabhereeye rumwi era okundeetera ebhiinu bhya okunsakira. 17 Nitakwayika kutyo kwa okubha enikena okuramira ebhiinu okusooka kw‑imwe, wuri. Tari eneenda nirore amabhando ganu Nyamuwanga aribhoongesya inguru ya obhufura bhwemwe. 18 Woori, ebhiinu bhirya bhyone ꞉mwayaanire Epafurodiito okundeetera, naabhiramiiye. Bhyeya ku‑bhukene bhwani bhwone, ka wone bhyafura okukira bhinu naariga niikena. Obhusakisi obhwo bhuri rwa echoogo cha ebhirange bhya ekisi, nicho echoogo chinu Nyamuwanga keekirisya na okwenda. 19 Mbe, Nyamuwanga waani, aribhayaana ebhiinu bhyone bhinu omukena okuruubhana na obhuniibhi bhwaye bhwafu. Arikora kutyo ku‑njira ya Kirisito Yeesu.
20 Nyamuwanga, Raata weeswe, akusibhwe akajaanende koone. Jibhe kutyo.
Emisango ja obhuteero
21 Mukeesye abheekirisya bhoone bha Kirisito Yeesu Firiipi awo. Abheekirisya bhanu abhakora emirimu aamwi na anye enu, wone abhabhakeesya. 22 Ka wone abheekirisya bhoone bha Kirisito Yeesu bhanu bheekaaye mu‑musi gunu abhabhakeesya, chimwichimwi bhanu bheekaaye mu‑nju ya Kayisaari.a
23 Obhwitiriranya bhwa Raatabhugenyi weeswe Yeesu Kirisito bhubhe aamwi na emwe.