Pawuro keeyikanya Kirisito ku‑joone
3
1 Mbe woori emwe abhayiri bhaani, mukonderwe muno mu‑kubha na obhumwi na Raatabhugenyi Yeesu! Emisango jinu ꞉naabhakaamiiye, nitakuyigwa okusubhira okubhakaamira rindi, kwa okubha ejibhareetera obhuriisi.2 Mwikenge abheeyigisya bhanu abhengisya ebhiraagiro bhya Echiyawudi mw‑ikanisa. Abhaanu abho bhari rwa jimbwa, ni abhakosi bha ebhibhiibhi, abhakomeeresya okutenda.a 3 Eswe neeswe chitenderwe echinyamwoyo kwa okubha Mwoyo wa Nyamuwanga kaachisakira kutyo jiiyire chiramye Nyamuwanga. Eswe echikuuyisya Kirisito Yeesu na okumwiyikanya. Ka wone chitakwiyikanya ebhikorwa bhyeswe bhya echinyamubhiri korereki chibhone obhuchungusi, 4 jaakabheeye jiri kutyo anye omwene naakabheeye na isonga ya okwiyikanya emisango ja echinyamubhiri. Nawe araabha ari‑wo omuunu unu keerora ati ari na ebhikorwa bhya echinyamubhiri bhinu kaatura okwiyikanya, anye niri nabhyo bhyafu okumukira. 5 Anye ꞉naatenderwe ku‑rusuku rwa kataanu na kasatu nimarire okwibhurwa, enisooka mu‑ruganda rwa Bhenjamiini wa mw‑iyanga rya Yisirayeeri. Anye niri Muyebhuraniya wa echimari. Mu‑kukuumisya ebhiraagiro bhya Echiyawudi, anye ꞉naabhigayukire kisi, kwa okubha naariga niri Mufarisaayo.b 6 Ka wone ꞉neekomeesiisye muno okukora emisango jinu neetogeraga ati nijo Nyamuwanga kaakena. Echo nicho ꞉chankorere ninyaasya abheekirisya. Mu‑bhurengeresi bhunu obhubhonekana mu‑bhiraagiro bhya Muusa, naariga nitari na echikayo choonechoone.
7 Nawe, emisango joone jinu naariga nindora ati kw‑anye jiri na omuriiro, woori enijirora ati ni ja okufwirwa‑mo mu‑kuruubha Kirisito. 8 Noorwo jitari ejo era, tari enibhara emisango joone ati ni kufwirwa‑mo ukeenganyirisya na omuriiro gwa okusombookerwa Kirisito Yeesu Raatabhugenyi waani. Inguru ya omwene, naasiga kata emisango joone. Enijirora rwa amafwi, korereki nisombookerwe Kirisito kisi, 9 ka wone nibhe na obhumwi nage. Nitakwiyikanya rindi obhurengeresi bhunu obhusooka mu‑kugayuka ebhiraagiro, tari obhurengeresi bhunu obhusooka mu‑kwikirisya Kirisito. Obhwo nibhwo obhurengeresi bhunu Nyamuwanga kaayaana bhanu abheekirisya Kirisito.
10 Enikena nisombookerwe Kirisito muno na okubha na amanaga ganu Kirisito aariga ari nago omwanya gwa okusuuruka kwaye. Enikena obhumwi bhunu obhusooka mu‑kunyaaka rwa kutyo omwene ꞉aanyaakire, korereki nisusane nage mu‑kufwa kwaye. 11 Enikena emisango ejo korereki nibhe umwi wa abhaanu bhanu Nyamuwanga arisuurura okusooka mu‑bhafuuwe.
Okwigumiirisya okukingira ku‑bhuteero
12 Anye nitakwayika ati naakingiiye ejo joone, amwi ati naakumisibhwe, wuri, tari enigenderera okwikomeesya korereki nijibhone ejo. Ejo nijo Kirisito Yeesu ꞉aambirikiriiye nijibhone. 13 Abhayiri bhaani, nitakwibhara ati naajibhwene ejo. Nawe enikora omusango gumwi gunu, nisige okwiganirisya emisango ja inyuma jinu jaaturire na eniikomeesya korereki nibhone emisango jinu jiri imbere. 14 Eniikomeesya okubhirima korereki ku‑bhuteero nibhone obhuyigi na okuyaanwa echiyaanwa. Echiyaanwa echo nibhwo obhubhirikisi bhwa Nyamuwanga bhwa okwingira mu‑rwire ku‑njira ya Kirisito Yeesu.
15 Kurwa ejo, eswe bhoone bhanu chirumateene mu‑riikirisya, echikenwa okwikirisyanya ku‑misango ejo. Araabha muri na obhwiganirisya bhunu bhutaasyanyiisye na emisango ejo, Nyamuwanga niwe aribhaswerurira kutyo jiri. 16 Echiinu cha bhusibhusi woori ni ati echikenwa okuruubha jinu Nyamuwanga aacheeresiisye.
Abheekirisya bharuubhe jitungwa ja Pawuro
17 Abhayiri bhaani, bhoone muruubhe jitungwa jaani. Ka wone mwiyigire okusooka ku‑bhaanu bhanu abharuubha jitungwa jeeswe. 18 Naabhabhwiriiye kwiya kaafu omusango gunu enikena okubhabhwira, woori enigwayika rindi enu nindira amasiga mogomogo. Bhari‑wo abhaanu bhanu obhurame bhwebhwe obhweresya ati, ni bhasoko bha obhuchungusi bhunu ꞉bhwakorerwe na Kirisito ku‑musarabha. 19 Abhaanu abho bharisingaarisibhwa ku‑bhuteero, kwa okubha inda niryo risambwa ryebhwe. Abheene abheekuuyisya ebhikorwa bhya jiswaro bhinu abhakora. Ka wone abheeganirisya era emisango ja ku‑chaaro.
20 Nawe, eswe obhwikaro bhweswe ni mu‑rwire na echitegerera kwa obhwira obhunene Omuchungusi na Raatabhugenyi weeswe Yeesu Kirisito, aaje okusooka eyo. 21 Omwene ari na amanaga ga okutuura ebhiinu bhyone bhibhe emwaro ya obhutungi bhwaye. Ku‑njira ya amanaga ago, ariyindura emibhiri jeeswe jinu jijorobhokere, jibhe na rikusyo rwa kutyo omubhiri gwaye guri.