Okuruubha obhwikeeya bhwa Yeesu Kirisito
2
1 Mbe araabha omusiiriisibhwa mu‑kubha na obhumwi na Kirisito, araabha omufungʼamibhwa na ryenda ryaye, araabha muri na obhumwi na Mwoyo Mweru, araabha omwendwa na okufwirwa echigongo na Kirisito, 2 mukuumisye rikonderwa ryani kwa okuungwana abheene kwa abheene na okwendana abheene kwa abheene. Ka wone mubhe na obhumwi mu‑myoyo jeemwe na mubhe na obhukarariiye bhumwi. 3 Musige okukora omusango gwonegwone kwa orwiso noorwo kwa orwikuuya. Tari mwikeeyega na murorega abhaanu abhandi okubha bha ngʼoryo muno okukira emwe abheene. 4 Bhuri umwi weemwe asige okwigana emisango jaaye omwene era, tari eegane emisango ja abhaanu abhandi wone.5 Obhukarariiye bhwemwe bhubhe bhuryabhurya bhunu aariga ari nabhwo Kirisito Yeesu.
6 Noorwo kutyo omwene aariga engene na Nyamuwanga,
꞉ataarorere ati ni kisi agenderere okurumatana nagwo.
7 Kurwa ejo, ˆnaagusiga ogwo,
ˆneekeeya, ˆneengana na omugaya,
ˆneebhurwa rwa abhaanu abhandi, ˆnaabha omuunu.
8 ꞉Aabhonekeene ari na orususo rwa omuunu,
ˆneekeeya,
ˆnaagayuka Nyamuwanga,
ˆneekirisya okufwa,
noorwo okufwa ku‑musarabha!
9 Kurwa ejo, Nyamuwanga ˆneenamusya Yeesu inguru muno okukira ebhiinu bhyone,
ˆnaamuyaana risiina rikuru rinu rikirire amasiina goone,
10 korereki ku‑chibharo cha risiina rya Yeesu,
ebhibhumbwa bhyone bhya mu‑rwire, bhya ku‑chaaro na ebhya mu‑nyombe,a
bhiifukame ku‑mwene.
11 Ka wone bhuri muunu aayike ati Yeesu Kirisito niwe Raatabhugenyi.b
Nikwo kutyo Raata Nyamuwanga arikusibhwa.
Abheekirisya bhabhe rwa obhweru mu‑chaaro
12 Mbe, abheendwa bhaani, omwanya gunu naariga niri kw‑imwe, mwariga nimugayuka Nyamuwanga siku joone. Nyabhuriko, noorwo woori omwanya gunu niri kura na emwe, mugenderere okukora muno jinu jeenderwe ku‑bhaanu bhanu Nyamuwanga achunguuye. Mukore ejo mu‑kuyarara kunu okuruubhana na okuubhaya Nyamuwanga. 13 Mbe, mukore kutyo kwa okubha Nyamuwanga niwe kaakora emirimu mu‑mitima jeemwe, korereki mwende na okukora emisango jinu kaakena jikorekane.
14 Emisango joone jinu omukora, mujikore okujujuuma wuri noorwo okubhambasyanya. 15 Mukore kutyo, korereki mubhe abhaana bha Nyamuwanga bhanyamburwa esoro, bhanu bhatari na echikayo. Nyabhuriko, mubhe abhaana bhanu bhatakwayikwa kubhiibhi agatigati ya abhaanu bha riyimbo rinu riijuuye ebhibhiibhi na obhunyamuke. Agatigati yeebhwe, emwe mubhonekane rwa obhweru bhunu obhumirika mu‑chaaro. 16 Ka wone muraasisye abhaanu omusango gwa Nyamuwangac gunu ogubhayaana obhuwanga bhwa akajaanende. Mukakora kutyo, niribhona echiinu cha okwikuuyisya ku‑rusuku rurya Kirisito arisubha. Okubha emirimu jinu ꞉naayambeene okukora agatigati yeemwe jaariga jitari ja okufwirwa‑mo.
17 Noorwo ikabha ati isagama yaani eyisoosibhwa rwa echoogod ku‑chigabhiro,e aamwi na eriikirisya ryemwe rinu erikorwa echoogo imbere ya Nyamuwanga, anye enikonderwa na okusandabha aamwi na emwe bhoone. 18 Emwe wone kutyokutyo mukonderwe, ka wone musandabhe aamwi na anye.
Pawuro kaatuma Timoteewo na Epafurodiito
19 Raatabhugenyi Yeesu aakeenda, eniiyikanya okutuma Timoteewo bhwangu kw‑imwe, korereki omwanya gunu arisubha, anye wone nifungʼamibhwe akantondera emisango jeemwe. 20 Okubha nitari na omuunu owundi anu unu chimari kaabhegana rwa Timoteewo. 21 Abhaanu abhandi bhoone abhafurubhenda na emisango jeebhwe abheene, jitari jinu Yeesu Kirisito keenda. 22 Nawe mumenyere kutyo orukuma rwa Timoteewo rwariga ruri rwa ekisi. ꞉Aakorere aamwi na anye emirimu ja okuraasya Emisango ja Ekisi, rwa omwana na esemwene. 23 Kurwa ejo, eniiyikanya ati nirimutuma kw‑imwe bhwangu, aribha naamenya kutyo emisango jaani ejigenderera anu. 24 Ka wone eniiyikanya ati, Raatabhugenyi Yeesu ariikirisya anye omwene niije kw‑imwe bhwangu.
25 Emwe, ꞉mwatumire Epafurodiito kw‑anye okusankira na okufurubhendera obhukene bhwani. Woori, enirora ati ni kisi nimutume rindi kw‑imwe. Omwene ni mwikirisya oweejaasu, omukosi weejaasu wa emirimu ja Nyamuwanga na ni musirikare oweejaasu mu‑kurwanirira Emisango ja Ekisi. 26 Enimwikirisisya kwa okubha keegomba okubhugana na emwe bhoone. Ka wone omwoyo gwaye ogusurumbara muno, kwa okubha ꞉mwoonguuwe ati aariga arwaye. 27 Chimari aariga arwaye muno ari yeeyi okufwa. Nawe Nyamuwanga ꞉aamufwiriiye echigongo. Itari ati Nyamuwanga amufwiriiye echigongo omwene era, noorwo anye wone anfwiriiye echigongo, korereki nisige okusurumbara muno.
28 Kurwa ejo, eneenda muno okumutuma kw‑imwe, korereki mukabhugana rindi, mukonderwe na omwoyo gwani gufungʼame. 29 Mumuramire mukondeeywe muno kwa okubha ni weejaanyu mu‑kwikirisya Raatabhugenyi Yeesu. Abhaanu rwa oyo mubhayaanega echibharo, 30 kwa okubha aariga ari yeeyi okufwa inguru ya emirimu ja Kirisito. Chimari aariga ari yeeyi okusingaarisya obhurame bhwaye korereki akingye kw‑anye ebhiinu bhinu emwe mutakaturire okunkingisya.