Inyarubha ya Pawuro
ku‑Bhafiriipi
Obhukeesya
1
1 Inyarubha inu, niikaamire anye Pawuro, niri aamwi na Timoteewo, omukosi weejaasu wa Kirisito Yeesu. Echikaamira abhaangarisi na abhasakisi bha rikanisa, na emwe abheerua bhoone bha Nyamuwanga Firiipi eyo, bhanu muri na obhumwi na Kirisito Yeesu.2 Obhwitiriranya na omurembe okusooka ku‑Nyamuwanga Raata weeswe na ku‑Raatabhugenyi Yeesu Kirisito, bhibhe aamwi na emwe.
Pawuro kaasabhirwa Abhafiriipi
3 Bhuri mwanya nikabheechuka, enisiima Nyamuwanga waani. 4 Ka wone omwanya gwone bhunu enibhasabhirwa, enisabhwaga nikondereywe, 5 kwa okubha musangiiye aamwi na anye mu‑kuraasya Emisango ja Ekisi, okwambira orusuku runu ꞉mweekirisiisye okukingira reero. 6 Nimenyere chimari omusango gunu ati Nyamuwanga unu ꞉aambire omurimu gwa ekisi mu‑myoyo jeemwe, arigugenderesya okukingira gukuumire orusuku rurya Kirisito Yeesu arisubha.
7 Ni kisi anye niganirisye kutyo inguru yeemwe bhoone, kwa okubha enibheenda muno. Okubha anye na emwe, chiyaaywe obhwitiriranya bhwa okusangira emirimu aamwi, nibhe niri mw‑ibhoyero amwi nimbagira na okweresya echimari cha Emisango ja Ekisi kutyo jiri. 8 Nyamuwanga niwe kaamenya ati enaayika echimari kutyo eniigomba okubhugana aamwi na emwe rindi, niri na eryenda riryarirya rwa kutyo Kirisito Yeesu kaabheenda.
9 Enibhasabhirwa ku‑Nyamuwanga ati eryenda ryemwe rigenderere okwiyongesya muno, mu‑kubha na obhwengeeso na okusombookerwa kwone, 10 korereki mubhe na obhuturo bhwa okwawura jinu jiri ja ekisi. Awo niwo muribha na emitima myeru, ka wone muribha mutari na esoro okukingira orusuku rurya Kirisito arisubha. 11 Obhurame bhwemwe bhuriijura emisango ja rirenga jinu ejibhonekana ku‑njira ya Yeesu Kirisito. Ejo joone jirikumya Nyamuwanga na okumukusya.
Pawuro kaakonderwa ati Emisango ja Ekisi ejiraasibhwa
12 Mbe, abhayiri bhaani, enikena musombookerwe kisi ati joone jinu jimbwene, jiretereeye muno okuswirana Emisango ja Ekisi. 13 Abhariisi bhoone bha mw‑iyumba rya obhutungi anu, aamwi na abhandi bhoone, bhamenyere ati nibhoyerwe ku‑songa ya okukora emirimu ja Kirisito. 14 Aamwi na ejo, enimenya ati okubhoywa kwani kunu, kukorere abheekirisya abheejaasu bhaafu bhasimbiisiibhwe emyoyo na Raatabhugenyi Yeesu. Kurwa ejo, bhari na ribhaasi okuraasisya abhaanu abhandi omusango gwa Nyamuwanga, okuubhaya wuri.
15 Ni chimari ati, bhari‑wo abhaanu abhandi bhanu abharaasya emisango ja Kirisito kwa orwiso na kwa inyombo. Noorwo kutyo, bhari‑wo abhandi bhanu abhajiraasya mu‑bhwira bhwa ekisi. 16 Abhajiraasya bhari na eryenda kw‑anye, kwa okubha bhamenyere kisi ati niyaaywe omurimu gwa okubhagira Emisango ja Ekisi anu. 17 Nawe bharya abha inyombo, abharaasya emisango ja Kirisito kwa orwiso, noorwo itari mu‑bhwira bhwa ekisi. Abho abheenda okwongesya ebhinyaasyo bhyani mw‑ibhoyero enu.
18 Chichaari okunyamuka chiinu! Anye enikonderwa ati emisango ja Kirisito ejiraasibhwa, ibhe mu‑bhwira obhubhiibhi amwi mu‑bhwira bhwa ekisi. Ka wone nirigenderera okubha na rikonderwa, 19 okubha enisombookerwa ati joone jinu jimbwene, niritaatirwa. Jiribha kutyo kwa okubha omunsabhirwa ku‑Nyamuwanga, ka wone Mwoyo Mweru wa Yeesu Kirisito kaansakira. 20 Enirindirira kwa obhwira bhunene na okwiyikanya ati, nitariiswasibhwa ku‑njira yooneyoone irya. Woori rwa kutyo jaariga jiri siku joone, nirigenderera okubha na ribhaasi nene korereki Kirisito akusibhwe ku‑joone jinu enikora, nibhe niri muwanga amwi niniitwa.
21 Okubha obhwira bhwa obhurame bhwani ni kukusya Kirisito. Ka wone araabha nikafwa, okufwa kwani kuri na omuriiro muno, kwa okubha enija okubha aamwi nage. 22 Nawe nikagenderera okwikara ku‑chaaro kunu, nirigenderera okurora amatwasyo ga emirimu jinu enikora. Woori nitakumenya ati niitoore omusango ki! 23 Eniiyiganywa na mbaara joone ebhiri. Eniigomba okusiga obhurame bhunu nigende okwikara aamwi na Kirisito, okubha nikwo kunkondeeye muno. 24 Nawe, ni bhusibhusi muno anye nigenderere okwikara ku‑chaaro kunu ku‑songa yeemwe. 25 Chimari eniiyikanya inguru ya omusango ogwo, kurwa ejo, enimenya ati nirigenderera okwikara ku‑chaaro anu. Niribha aamwi na emwe bhoone, korereki nibhasakire murumatane na okukondererwa mu‑riikirisya ryemwe. 26 Omwanya gunu niribha aamwi na emwe, muribha na rikusyo muno inguru ya Kirisito Yeesu kwa okubha kaabha ansakiiye okusubha rindi kw‑imwe.
27 Mbe, omusango gwa bhusibhusi ni ati jitungwa jeemwe jingane na Emisango ja Ekisi ja Kirisito. Aribha naaja okubharora, amwi nikarema okuuja, eneenda okuungwa ati omugenderera okurumatana na okubha na obhumwi, ka wone ati muri aamwi mu‑kurwanirira eriikirisya rinu erisookana na Emisango ja Ekisi. 28 Ka wone enikena okuungwa ati, mutakuubhaya abhaanu bhanu abhabhareterera ebhinyaasyo noorwo na akatyari. Echo nicho echibharikisyo chinu echeeresya ati abheene abhaja mu‑kusingaarisibhwa, nawe emwe omuja mu‑kuchunguka. Ejo joone ni mirimu ja Nyamuwanga. 29 Okubha mutayaaywe echibharo cha okwikirisya Kirisito era, tari muyaaywe wone echibharo cha okunyaasibhwa ku‑songa yaaye. 30 Omurwanirira eriikirisya riryarirya rwa kutyo ꞉naarirwaniriiye, ninyaakaga eweemwe eyo. Ka wone noorwo woori omuungwa ati enigenderera okurirwanirira.