Inyarubha ya Pawuro
ku‑Bhakorosaayi
Obhukeesya
1
1 Inyarubha inu, niikaamire anye Pawuro, itumwa ya Kirisito Yeesu mu‑kwenda kwa Nyamuwanga, niri aamwi na Timoteewo omuyiri weeswe mu‑riikirisya. 2 Echikaamira emwe abheerua bha Nyamuwanga bhanu mwikaaye mu‑musi gwa Korosaayi, emwe abhayiri bheeswe abheeyikanyibhwa mu‑kubha na obhumwi na Kirisito.Obhwitiriranya na omurembe okusooka ku‑Nyamuwanga, Raata weeswe, bhibhe aamwi na emwe.
Risabhwa na risiima ku‑Nyamuwanga
3 Siku joone chikabhasabhirwa, echisiima Nyamuwanga, Esemwene Raatabhugenyi weeswe Yeesu Kirisito. 4 Echikora kutyo, kwa okubha echuungwa emisango inguru ya eriikirisya ryemwe mu‑Kirisito Yeesu na inguru ya eryenda ryemwe ku‑bheeru bhoone bha Nyamuwanga. 5 Eriikirisya ryemwe na eryenda ryemwe eryo, ebhiruubhana na obhwiyikanyo bhwemwe ati muriramira amabhando ganu Nyamuwanga abhabhiikiiye mu‑rwire. ꞉Mwoonguuwe inguru ya obhwiyikanyo obhwo omwanya gunu ꞉mwaraasisiibhwe omusango gwa echimari, nijo Emisango ja Ekisi. 6 Emisango ja Ekisi jinu ꞉jaakingire kw‑imwe, woori ejiswirana mu‑chaaro choone. Ejigenderera okukora abhaanu bhatwasye amatwasyo na okukura echinyamwoyo, rwa kutyo ꞉jaakorekeene kw‑imwe okusookerera orusuku runu ꞉mwoonguuwe inguru ya obhwitiriranya bhwa Nyamuwanga na okusombookerwa kisi kutyo obhwitiriranya bhwaye bhuri. 7 Emwe, ꞉mweeyigisiibhwe Emisango ja Ekisi ejo na Epaafura. Omwene ni weejaasu omwendwa na omukosi omwiyikanyibhwa wa Kirisito inguru yeemwe. 8 Epaafura ꞉aachibhwiriiye inguru ya eryenda ryemwe rinu erisooka ku‑Mwoyo Mweru.
9 Kurwa ejo, chichaariga okusiga okubhasabhirwa, okusookerera orusuku runu ꞉choonguuwe emisango jeemwe. Echisabhwa Nyamuwanga abhayaane okumenya kwone ku‑joone jinu omwene keenda. Ku‑ogwo, abhayaane obhwengeeso bhwone na okusombookerwa kunu okusooka ku‑Mwoyo Mweru.b 10 Niwo muritura okurama rwa kutyo Raatabhugenyi Yeesu keenda na okumukondisya ku‑misango joone. Obhurame bhwemwe bhurimukondisya inguru ya emirimu jeemwe ja ekisi, ka wone murigenderera okukura mu‑kumenya Nyamuwanga. 11 Echisabhwa Nyamuwanga abhasakirega ku‑managa gaaye amaafu, korereki mubhe na obhuturo bhwa okwigumiirisya mu‑joone aamwi na okukondererwa. 12 Ka wone, musiimega Raata Nyamuwanga, kwa okubha ꞉aabhayaaye obhuturo bhwa okusangira omwandu aamwi na abheeru bhaaye mu‑bhutungi bhwa obhweru. 13 Achichunguuye okusooka mu‑bhutungi bhwa echisuute, achifurusiisye okusooka omwo na okuchiingisya mu‑bhukama bhwa Omwana waaye omwendwa.c 14 Ku‑njira ya Omwana waaye, cheeruuywe, nikwo okwayika ati, okufwirwa echigongo ebhibhiibhi bhyeswe.
Omwana ari na obhuturo inguru ya bhyone
15 Omwana keeresya abhwerubhweru kutyo Nyamuwanga ari,
noorwo kutyo Nyamuwanga omwene atakubhonekana.
Omwene ari na obhuturo inguru ya ebhibhumbwa bhyone.
16 Okubha okutura ku‑mwene ebhiinu bhyone ꞉bhyabhumbirwe,
bhinu bhiri mu‑rwire na bhinu bhiri ku‑chaaro,
bhinu ebhibhonekana na bhinu bhitakubhonekana,
bhikabha bhiri ebhya obhukama amwi ebhya obhukuru, obhutungi amwi ebhya obhuturo.
Ebhyo bhyone ꞉bhyabhumbirwe okutura ku‑mwene na inguru yaaye.
17 Omwene aariga ari‑wo ebhiinu bhyone bhichaari okubhumbwa,
niwe kaakora ebhiinu bhyone bhigwatane aamwi.
18 Omwene niwe omutwe gwa omubhiri, ka omubhiri ogwo, niryo rikanisa.
Omwene niwe obhwambiro,
ka wone, ꞉aabheeye wa okwamba okusuururwa,
korereki abhe omukuru inguru ya ebhiinu bhyone.
19 Nikwo kutyo, kwa okubha ꞉jaakondeeye Nyamuwanga ati,
obhukuumiiye bhwaye bhwone bhubhe mu‑Mwana waaye.d
20 Ka wone, ꞉jaamukondeeye ati,
agwatanye ebhiinu bhyone ku‑mwene, ku‑njira ya Omwana waaye,
ebhiinu bhinu bhiri ku‑chaaro kunu na bhinu bhiri mu‑rwire.
꞉Aakorere kutyo kwa okureeta omurembe okutura ku‑sagama ya Omwana waaye inu ꞉yeetikire ku‑musarabha.
21 Emwe wone ku‑mwanya gunu guturire mwariga muri kura na Nyamuwanga. Mwariga muri bhasoko bhaaye mu‑bhwiganirisya bhwemwe obhubhiibhi bhunu obhuretereraga jitungwa jeemwe jimbiibhi. Nawe woori, abhagwatanyiisye aamwi nage 22 ku‑njira ya orufu rwa Kirisito. ꞉Aakorere kutyo, korereki abhareete imbere yaaye muri bheeru, bhanyataayikwa kubhiibhi noorwo mutari na esoro. 23 Nawe mwenderwe okugenderera okwikirisya Emisango ja Ekisi murumateene na okubha na amanaga. Mwasiga okwikirisya abhandi bhabhakongye okusiga obhwiyikanyo bhunu ꞉mwabhwene omwanya gunu ꞉mwoonguuwe Emisango ja Ekisi. Emisango ja Ekisi ejo, jiraasiibhwe ku‑bhaanu bhoone ku‑chaaro anu, anye Pawuro nibheeye omukosi waajo.
Emirimu ja Pawuro mu‑makanisa
24 Woori enikondererwa ebhinyaasyo bhinu enibhona inguru yeemwe. Mu‑mubhiri gwani enisangira ebhinyaasyo bhya Kirisito inguru ya omubhiri gwaye, omubhiri ogwo, niryo rikanisa.e 25 Nyamuwanga anteeye‑wo okubha omukosi wa rikanisa ryaye, korereki nibharaasisye emisango jaaye joone kutyo jiri. 26 Emisango ejo nibhwo obhutinge bhwa imbisike yaaye bhunu bhwariga bhubhisirwe okusookerera kara ku‑mayimbo goone. Nawe woori Nyamuwanga aabhusweruuye ku‑bheeru bhaaye.f 27 Nyamuwanga ꞉eendere okubhaswerurira bhwa ekisi bhwa obhutinge bhwa imbisike ya okuruguusya, noorwo inguru ya abhaanu bhanu bhatari Bhayawudi. Obhutinge obhwo ni ati Kirisito ari mu‑myoyo jeemwe, ka wone, omwene niwe kaabhayaana obhwiyikanyo ati murisangira rikusyo rya Nyamuwanga.
28 Kirisito niwe echiraasya omwanya gunu echikengya na okwiyigisya abhaanu bhoone mu‑bhwengeeso bhwone. Echimuraasya, korereki chireete abhaanu bhoone imbere ya Nyamuwanga bharumateene echinyamwoyo okuruubhana na okubha na obhumwi na Kirisito. 29 Inguru ya omusango ogwo, eniikomeesya na okurwanirira emirimu jinu ku‑managa maafu ganu Kirisito kaanaana.