Abhakorosaayi 2

1 Eneenda mumenye kutyo enirwanirira emirimu jinu inguru yeemwe, inguru ya abhaanu bha mu‑musi gwa Rawodeekiya na inguru ya abhaanu abhandi bhoone bhanu nichaariga okubhugana nabho. 2 Enikora kutyo, korereki emyoyo jeemwe bhoone, jisimbiisibhwe na okugwatanyibhwa aamwi mu‑ryenda. Eneenda murumatane chimwi mu‑kusombookerwa, na okumenya obhutinge bhwa imbisike ya Nyamuwanga bhunu ku‑bhwambiro bhwariga bhubhisirwe. Imbisike eyo nikwo okumenya Kirisito omwene. 3 Mu‑mwene oyo nimwo bhibhisirwe ebhibhiikwa bhyone bhya obhwengeeso na okusombookerwa.

4 Enibhakaamira ejo, korereki mwasiga okwikirisya omuunu woonewoone okubhajiga kwa emisango ja orubheeyi, noorwo jikabha jiri ja okukongya muno. 5 Enaayika ejo noorwo kutyo nitari aamwi na emwe echinyamubhiri, nawe niri aamwi na emwe echinyamwoyo. Enikonderwa, kwa okubha enuungwa inguru ya obhumwi bhwemwe na okurumatana kwa eriikirisya ryemwe ku‑Kirisito.

Obhurame obhuyaaya mu‑Kirisito

6 Mbe woori, kwa okubha mweekirisya Kirisito Yeesu ati ni Raatabhugenyi, mugenderere okwikara muri na obhumwi nage. 7 Mwimaririre mu‑mwene, mutuure obhurame bhwemwe mu‑mwene na okurumatana mu‑riikirisya rwa kutyo ꞉mweeyigiiye. Ka wone, mubhe abhaanu bhanu abhasiima Nyamuwanga bhuri mwanya. 8 Mubhe mwiyangariiye, omuunu woonewoone aasiga okubhayabhya kwa ameeyigisyo ga kutyo era na ga orubheeyi. Ameeyigisyo ago, agaruubhana na obhusimukwa bhwa abhaanu, na obhutinge bhwa akatungiiywe bhwa echaaro chinu. Ameeyigisyo ago gatakusooka ku‑Kirisito, 9 kwa okubha obhukuumiiye bhwone bhwa Nyamuwanga bhuri mu‑mwene, mu‑mubhiri gwa echinyamuunu. 10 Kutyo, ku‑njira ya okubha na obhumwi na Kirisito, emwe muyaaywe obhuwanga bhwone. Omwene niwe omukuru inguru ya obhutungi na obhuturo bhwone mu‑chaaro chinyatarorwa. 11 Omwanya gunu ꞉mwabheeye na obhumwi na Kirisito, omwene ꞉aabhatendere, nikwo okwayika ati, ꞉aabhafuurire bhumuunu bhwemwe bhwa ebhibhiibhi. Okutenda okwo ꞉kutaakorerwe kwa amabhoko ga abhaanu, tari ku‑njira yaaye omwene. 12 Omwanya gunu ꞉mwabhatiijiibhwe, ꞉mwafuuwe, nimusiikwa aamwi na Kirisito. Nimwiya nimusuuruka aamwi nage, kwa okubha ꞉mweekirisiisye amanaga ga Nyamuwanga unu ꞉aamusuuruuye okusooka mu‑bhafuuwe. 13 Muchaari okwikirisya Kirisito, mwariga mufuuwe inguru ya ebhibhiibhi bhyemwe, ka wone ꞉mutatenderwe bhumuunu bhwemwe bhwa ebhibhiibhi. Nawe Nyamuwanga ꞉aabhayaaye obhuwanga aamwi na Kirisito na ꞉aachifwiriiye echigongo ebhibhiibhi bhyeswe bhyone. 14 ꞉Aariyire ribhanja rya ebhibhiibhi bhyeswe ku‑njira ya Yeesu okuchifwira ku‑musarabha. ꞉Aasoosiisye‑wo orukaamo rwa ebhiraagiro runu rwariga niruchibhuura, ˆnaarusoosya‑wo chimwi kwa okurubhumiirira ku‑musarabha. 15 Ku‑njira ya omusarabha, Nyamuwanga ˆnaateesya obhutungi na abha obhuturo mu‑chaaro chinyatarorwa, ˆnaabhayiga kwa risandabha, ˆnaabhaswasya abhwerubhweru.

16 Mbe, omuunu woonewoone aasiga okubharamura kwa okubha omurya ebhiryo na okunywa ebhinywebhwa ebhirebhe bhinu abhaayika ni misiro, amwi kwa okubha mutakuruubha obhusimukwa bhwa jichikukuru ja obhuregesi bhwebhwe, amwi ichikukuru ya okwesi okubhonekana, amwi orusuku rwa Isabhaato. 17 Ebhyo bhyone ni rengesi rya emisango jinu jiriija. Nawe emisango ja echimari ejibhonekana mu‑Kirisito omwene. 18 Bhari‑wo abhaanu bhanu abhakomeeresya muno emisango ja okwikeeya kwa anja na eja okuramya bhamaraayika. Mwasiga okubheekirisisya bhabhateesye echiyaanwa cheemwe. Abhaanu abho abheekuuya na okwayika ati bhaarora emisango ejo mu‑bhiroro. Nawe chimari, bhawosoosokere mu‑bhwiganirisya bhwebhwe obhubhiibhi kwa okubha ni bhwa echaaro. 19 Abhaanu abho bheekindikire okusooka ku‑Kirisito omutangasya wa rikanisa, niwe omutwe gwa omubhiri gwaye. Kirisito niwe kaariisya na okugwatanya aamwi ebhiwuga na jinga joone. Ku‑njira eyo, omubhiri gwaye gwone ogukura kisi rwa kutyo Nyamuwanga keenda.

20 Emwe, ꞉mwafuuwe aamwi na Kirisito, kutyo ꞉aabhachunguuye okusooka ku‑bhutinge bhwa akatungiiywe bhwa echaaro chinu. Mbe, ni kurwa ki muchaagayuka ebhiraagiro bhyebhwe, na okwikara rwa abhaanu bha ku‑chaaro kunu? Ebhiraagiro ebhyo nibhyo bhinu, 21 “Mutarigwata‑ko chinu! Mutarikuunʼya‑ko chirya! Mutarirabha‑ko echo!” 22 Ebhyo bhyone ni ebhiraagiro na ameeyigisyo ga abhaanu era inguru ya ebhiinu bhinu ebhinyamuka ku‑mwanya mufuyi bhikamara okukorerwa emirimu. 23 Ni chimari, bhanu abharuubha ebhiraagiro ebhyo abhabhonekana ati bhari na obhwengeeso. Abharuubha okuramya kunu bhetereeye‑wo abheene, okwikeeya kwa anja na okutunga emibhiri jeebhwe kwa obhururu. Nawe ebhiraagiro ebhyo bhitakutura okuyingirira okurigira okubhiibhi kwa omubhiri.