3
1 Woori, kwa okubha musuurukire aamwi na Kirisito, muyenjeresye emisango ja mu‑rwire, anu Kirisito eenyanjire orubhaara rwa ebhuryo rwa Nyamuwanga. 2 Mwiganirisye emisango jinu jiri mu‑rwire, musige okwiganirisya jinu jiri ku‑chaaro kunu, 3 kwa okubha mufuuwea na woori muramire aamwi na Kirisito imbere ya Nyamuwanga. Nawe obhurame bhwemwe bhunu muramire aamwi nage bhutakubhuurika ku‑bhaanu abhandi. 4 Mbe, obhurame obhwo obhuruubhana na Kirisito. Omwanya gunu aribhuurika, niwo emwe wone muribhuurika aamwi nage na okusangira aamwi rikusyo ryaye.5 Mbe woori, mwese kura chimwi emisango joone ja echaaro chinu jinu jiri mu‑myoyo jeemwe, emisango ejo ni bhuromesi, obhujabhi, okurigira okubhiibhi, obhwiganirisya obhubhiibhi, na okwisigombera ebhiinu. Okwisigombera ebhiinu kuri rwa okuramya amasusano na okusiga okuramya Nyamuwanga.b 6 Emisango rwa ejo, nijo ejikora Nyamuwanga abhiyirirwe abhaanu bhanu bhatakumugayuka.c 7 Ku‑mwanya gunu guturire, emwe abheene mwariga nimukora ejo, omwanya gunu mwariga mwikaaye okuruubhana na emisango emijabhi ejo. 8 Nawe woori musige chimwi emisango ejo joone, aamwi na okubhiyirwa, risungu, obhujabhi, amafumo na emisango jinu jiri ja jiswaro jisige okusooka mu‑kanwa keemwe. 9 Mwasiga okubhwirana orubheeyi, kwa okubha mufuurire chimwi bhumuunu bhwemwe bhwa kara aamwi na ebhikorwa bhyabhwo 10 na mufwaye bhumuunu obhuyaaya. Nyamuwanga omwene niwe ꞉aabhumbire bhumuunu obhuyaaya obhwo na kaagenderera okubhukora bhususane nage kata, korereki mumusombookerwe kisi. 11 Kurwa ejo, bhutari‑wo obhutaasyanya rindi agati ya Omuyawudi na unu atari Muyawudi, unu atenderwe na unu atatenderwe, unu kaasooka mu‑chaaro cha kura amwi omusikisi, omugaya na omwitaage.d Tari Kirisito niwe wa bhusibhusi na omwene ari mw‑imwe bhoone.
12 Woori, kwa okubha emwe mwabha abhasorwa, abheeru na abheendwa bha Nyamuwanga, mubhe na omwoyo gwa echigongo, obhwa ekisi, obhwikeeya, obhworooro na obhwigumiirisya. 13 Mwigumiirisyanye na okufwirana echigongo. Araabha owumwi weemwe ari na omusango ku‑weejaabho, abheendwa bhafwirane echigongo. Rwa kutyo Raatabhugenyi Yeesu ꞉aabhafwiriiye echigongo emwe, emwe wone mufwire echigongo abhandi. 14 Okukira ejo joone mwendane, kwa okubha eryenda niryo eribhagwatanya emwe bhoone mu‑bhumwi bhunu bhukuumiiye. 15 Omurembe gwa Kirisito gutunge mu‑myoyo jeemwe. Emwe mubheeye omubhiri gumwi, kurwa ejo mubhirikiiywe okurama kwa omurembe. Ka wone, nimusiimaga Nyamuwanga. 16 Omusango gwa Kirisito gwikare kwa obhwafu mu‑myoyo jeemwe, keenu nimwiyigisyanya na okukengyanya mu‑bhwengeeso bhwone. Mwimbire Nyamuwanga kwa emyoyo jeemwe na okumusiima, okutura mu‑jabhuri, mu‑nyimbo na jinyimbo ja echinyamwoyo.e
17 Omusango gwonegwone gunu omwayika, amwi echiinu choonechoone chinu omukora, mubhikore kw‑isiina rya Raatabhugenyi Yeesu, nimusiimaga Raata Nyamuwanga okutura ku‑mwene.
Obhurame bhwa ekisi mu‑misi ja abheekirisya
18 Emwe abhagasi, mugayukega abharume bheemwe, rwa kutyo jikenerwe ku‑bhaanu bhanu abheekirisya Raatabhugenyi Yeesu.f 19 Emwe abharume wone, mwendega abhagasi bheemwe, mwasiga okubha abharuru ku‑bheene. 20 Emwe abhaana wone, mugayukega abheebhusi bheemwe mu‑joone, kwa okubha okukora kutyo okukondera Raatabhugenyi Yeesu.g 21 Emwe bharaata, mwasiga okusoogorya abhaana bheemwe, korereki bhaasiga okufwa omwoyo.h 22 Emwe abhagaya, mugayukega abhaami bheemwe bha echinyamubhiri ku‑misango joone. Mwasiga okukora kutyo omwanya gunu abhabharora era, korereki mwikondye ku‑bheene ati mwiyire, tari mubhayaane echibharo omwanya gwone mu‑mutima omweru, kwa okubha omuyaana echibharo Raatabhugenyi Yeesu. 23 Echiinu choonechoone chinu omukora, muchikorega kwa rikonderwa, wuti omukorera Raatabhugenyi Yeesu, bhatari bhaanu era. 24 Mwichuke ati Raatabhugenyi unu omukorera emirimu niwe Kirisito ka omwene aribhayaana omwandu gunu ꞉aabharagire. 25 Nawe omuunu woonewoone unu kaakora ebhibhiibhi ariramurwa okuruubhana na ebhibhiibhi bhyaye, kwa okubha Raatabhugenyi atari na isoroore.i