4
1 Emwe abhaami, mukoreraga abhagaya bheemwe mu‑bhurengeresi rwa kutyo jiiyire bhakorerwe. Mwichuke ati emwe wone muri na omwami weemwe mu‑rwire, niwe Raatabhugenyi.Amaragiriro na risabhwa
2 Musabhwega bhuri rusuku, mutengeejega mw‑isabhwa na okusiima Nyamuwanga. 3 Muchisabhirwe eswe wone, korereki Nyamuwanga achiigurire orwigi rwa okuraasya omusango gwaye inguru ya Kirisito gunu kara gwariga gubhisirwe. Anye nibhoyerwe inguru ya okuraasya omusango ogwo. 4 Musabhwega Nyamuwanga ati nibhe na amanaga ga okuraasya abhwerubhweru emisango ejo rwa kutyo enikenwa okujaayika.
5 Mubhe na obhwengeeso mu‑bhungwani bhwemwe na abhaanu bhanu bhachaari okwikirisya Yeesu. Bhuri mwanya, mukorega ja ekisi.a 6 Emisango jinu omwayika jibhe ja ekisi. Ka wone, jibhe ja okukongya, korereki mumenye okusubhya bhuri muunu kisi.
Emisango ja okuraga
7 Omuyiri weeswe omwendwa Tukiiko ni mukosi omwiyikanyibhwa. Echikora emirimu ja Raatabhugenyi Yeesu aamwi nage. Omwene aribhabhwira emisango jaani joone. 8 Naamutuma kw‑imwe korereki abhabhwire emisango jeeswe na okusimbiisya emyoyo jeemwe. 9 Ariija aamwi na Oneesimo, omuyiri weeswe omwendwa, ka wone omwiyikanyibhwa. Omwene ni muunu wa ewaanyu eyo. Bharibhabhwira emisango joone jinu ejikorekana kw‑iswe enu.
10 Arisitaariko, unu abhoyerwe aamwi na anye mw‑ibhoyero enu, kaabhakeesya. Maariko wone, omuyiri wa Bharinaabha, kaabhakeesya. Mwabhwene amaragiriro inguru yaaye. Aribha abhakinga‑ko eyo, mumukume kisi. 11 Yeesu wone, unu kaatogwa Yuusito, kaabhakeesya. Agati ya Abhayawudi bhanu bheekirisiisye Kirisito, abho era nibho abhakora emirimu aamwi na anye mu‑bhukama bhwa Nyamuwanga.b Abheene abhasimbiisya omwoyo gwani muno. 12 Epaafura, omukosi wa Kirisito Yeesu, ka wone ni muunu wa ewaanyu eyo, kaabhakeesya. Bhuri mwanya keekomeesya okubhasabhirwa korereki murumatane echinyamwoyo mu‑riikirisya ryemwe na okubha na echimari inguru ya okwenda kwone kwa Nyamuwanga. 13 Enisoosya obhubhambaasi ati, keekomeesya okukora emirimu inguru yeemwe na inguru ya abhaanu bha emisi ja Rawodeekiya na Eyaropoori. 14 Ruuka omuragusi weeswe omwendwa aamwi na Deema, abhabhakeesya. 15 Emwe wone, muchikeesisye abhayiri bheeswe bha Rawodeekiya eyo. Ka wone, mukeesye Niimufa aamwi na rikanisa rinu eribhugana mu‑musi gwaye.
16 Mukamara okusoma inyarubha inu, muyisire ku‑bheekirisya bha mw‑ikanisa rya Rawodeekiya korereki abheene wone bhayisome. Emwe wone, mukore obhutinge mubhone inyarubha inu ꞉naatumire ku‑bheene korereki wone muyisome. 17 Mubhwire Arikipo ati, akuumisye kisi emirimu jinu Raatabhugenyi amuyaaye.
18 Anye Pawuro, enikaama obhukeesya bhunu kwa okubhoko kwani omwene. Mwichuke ati nibhoyerwe mw‑ibhoyero. Obhwitiriranya bhwa Nyamuwanga bhubhe aamwi na emwe.