Peetero na Yowana imbere ya ribharaja rikuru rya Abhayawudi
4
1 Omwanya gunu Peetero na Yowana bhaariga bhachaaraasisya abhaanu omusango gwa Nyamuwanga, abhagabhisi na Abhasadukaayoa bhanu bhaariga bhari awo na omukuru wa abhariisi bha Riyekaru, nibhabhaaja‑ko. 2 Abhakuru abho ꞉bhaabhiyiiywe muno, kwa okubha Peetero na Yowana bhaariga nibheeyigisya abhaanu na okuraasya ati, Nyamuwanga arisuurura abhafuuwe, okuruubhana na okusuuruka kwa Yeesu. 3 Kurwa ejo, nibhagwata Peetero na Yowana, nibhabhatuura mw‑ibhoyero, okukingira mwejo yende‑ko, kwa okubha yaariga iri keegoro. 4 Noorwo kutyo, abhaafu bhanu ꞉bhoonguuwe emisango ja Peetero na Yowana ꞉bhaajiikirisiisye. Obhukumi bhwa bharume era bhanu ꞉bheekirisiisye Yeesu, ꞉bhwakingire ebhiwumbi bhitaanu kutya.5 Mwejo yende‑ko, abhatangasya, abhakuru bha Abhayawudi na abheeyigisya bha ebhiraagiro bhya Muusa,b ꞉bheekofyanyiisye Yerusareemu awo. 6 Mw‑ibharaja eryo, bhaariga bhari‑mo Anaasi unu aariga ari omugabhisi omukuru, Kayaafa, Yowana, Arekijanda na abhandi bhanu bhaariga bhari bhaabho Anaasi. 7 Nibharagirira Peetero na Yowana bhareetwe, nibhabheemereegusyu imbere yeebhwe mw‑ibharaja, nibhabhabhuusya ati, “Ejo mukorere, mujikorere kwa obhuturo ki, amwi kw‑isiina rya ga?”
8 Awo Peetero ˆneejusibhwa na Mwoyo Mweru, ˆnaabhabhwira ati, “Emwe abhatangasya bha abhaanu na abhakuru bha Abhayawudi! 9 Reero chikabhuusibhwa amabhuusyo inguru ya emisango ja ekisi jinu ꞉aakoreeywe omurema urya na kutyo ꞉aawosiibhwe, 10 emwe bhoone aamwi na Abhayisirayeeri abhandi bhoone, enikena mumenye echimari ati, unu eemereeguuyu imbere yeemwe ni muwanga, kwa obhuturo bhwa risiina rya Yeesu Kirisito Omunajareeti, unu emwe ꞉mwabhambire ku‑musarabha, nawe Nyamuwanga ꞉aamusuuruuye okusooka mu‑bhafuuwe. 11 Niwe unu Ebhikaame Ebhyeru ebhyayika inguru yaaye ati,
‘Ribhuyi rinu emwe abhoombaki ꞉mwaremere,
niryo ryabha ribhuyi rinene rya orufuka.’c
12 “Bhutari‑wo obhuchungusi ku‑wundi woonewoone! Okubha ritari‑wo risiina erindi mu‑chaaro choone erya obhuturo bhwa okuchichungura!”
13 Abhakuru abho bhejire bhaarora Peetero na Yowana kutyo abharoma kwa ribhaasi, enu bhabhamenyere ati ni bhaanu bhanu bhatasomere na bhatari na obhwengeeso, nibharuguura muno. Nibheeya nibhasombookerwa ati Peetero na Yowana bhaariga bhari aamwi na Yeesu. 14 Abhakuru abho ꞉bhataabheeye na ogwa okwayika, kwa okubha ꞉bhaarorere omuunu unu awosiibhwe, eemereeguuyu aamwi na Peetero na Yowana. 15 Kurwa ejo, nibharagirira Peetero na Yowana bhasooke mw‑ibharaja eryo. Abheene nibhaayikana ati, 16 “Angu chibhakorere ki abhaanu bhanu? Abheekasi bhoone bha Yerusareemu anu, abhamenya ati bhakorere echibharikisyo echikuru cha okuruguusya chinu na chitakutura okuchiigaana. 17 Kurwa ejo chibhagonye ati, bhasige okugenderera rindi okubhwira omuunu woonewoone inguru ya risiina rinu, korereki chiyingirire emisango ja echikorwa chinu jisige okukumuuka muno mu‑bhaanu.”
18 Bhejire bheeya abhakuru abho nibhabhirikira Peetero na Yowana, nibhabhagonya kwa obhururu nibhaayikaga ati, “Musige okwiyigisya kw‑isiina rya Yeesu, noorwo okwayika rindi kw‑isiina eryo!”
19 Nawe Peetero na Yowana nibhabhabhwira ati, “Muramure emwe abheene, araabha jiiyire mu‑meeso ga Nyamuwanga okubhagayuka emwe okukira okugayuka Nyamuwanga omwene. 20 Okubha eswe chitakutura okusiga okwayika inguru ya emisango jinu ꞉chaarorere na okuungwa!”
21 Peetero na Yowana bhejire bhaamara okwayika kutyo, abhakuru abho nibhabhagonya kwa obhururu muno, nibhabhataatira bhagende. ꞉Bhataabhwene injira ya okubhabhuma, kwa okubha abhaanu bhoone bhaariga nibhakuuya Nyamuwanga muno inguru ya echiruguusyo echo. 22 Okubha ꞉bhaamenyere ati omuunu unu ꞉aawosiibhwe aariga ari murema okusookerera okwibhurwa kwaye, aariga akingiisye emiguuga makumi gana.
Abheekirisya abhasabhwa Nyamuwanga ribhaasi
23 Peetero na Yowana bhejire bheegurirwa, nibhasubha ku‑bheekirisya abheejaabho. Nibhasimura emisango joone jinu bhaabhwirwa na abhakuru bha abhagabhisi na abhakuru bha Abhayawudi. 24 Bhejire bhoongwa emisango ejo, bhoone nibhaamura obhuraka okusabhwa Nyamuwanga ati, “Raatabhugenyi awe, Nyamuwanga owa obhuturo bhwone. Awe ꞉waabhumbire orutumba, echaaro, inyanja, na bhyone bhinu bhiri‑mo. 25 Awe ꞉waayikire mu‑kanwa ka saaja weeswe Dawudi, omukosi waawo, okutura ku‑Mwoyo Mweru ati,
‘Mbawo abhaanu bha amaanga abhabhiyirwa?
Mbawo abhakora obhwisombooro bhunu bhutari na muriiro?
26 Abhakama bha echaaro na abhatungi abheekumanyaga aamwi,
bhareme Raatabhugenyi Nyamuwanga na Kirisito waaye.’d
27 “Okubha ni chimari ati mu‑musi gunu Yeroode Atipaasie na Pootiyo Piraato ꞉bhaabhugeene aamwi na abhaanu bhanu bhatari Bhayawudi na Abhayisirayeeri, korereki bhareme Yeesu, omukosi waawo omweru unu ꞉waasorere abhe Kirisito. 28 Jinu ꞉bhaakorere, nijo jinu awe ꞉waaramuuye okwambira ku‑bhwambiro jikorekane, noorwo ejo wone ꞉jaakorekeene kwa obhwira bhwawo. 29 Raatabhugenyi, ringira ebhikangyo bhyebhwe, nuuchiyaane obhuturo eswe abhakosi bhaawo, chiraasye omusango gwawo kwa ribhaasi nene. 30 Ramburura okubhoko kwawo okuwosya abhaanu, okukora ebhibharikisyo na ebhiruguusyo ku‑njira ya risiina rya Yeesu, omukosi waawo omweru!”
31 Bhejire bhaamara okusabhwa Nyamuwanga, inju inu bhaariga bheekofyanyiisye‑mo niitikima. Abho bhoone nibheejusibhwa na Mwoyo Mweru, nibhaamba okwiyigisya abhaanu omusango gwa Nyamuwanga kwa ribhaasi.
Obhumwi na obhusangi bhwa abheekirisya
32 Abheekirisya bhoone bhaariga bhari na mwoyo gumwi na omutima gumwi. Aariga atari‑wo noorwo omuunu umwi unu ebhiinu bhyaye ꞉aakorere okubha bhyaye omwene era, nawe bhaariga nibhasangira ebhiinu bhyone. 33 Jitumwa ja Yeesu bhaariga nibharaasisya abhaanu ku‑managa maafu, emisango ja okusuuruka kwa Raatabhugenyi Yeesu. Nyamuwanga aariga ˆnaabhayaana obhwitiriranya bhwaye. 34 Aariga atari‑wo omuunu woonewoone owa obhukene, kwa okubha abhaanu bhanu bhaariga bhari na amasambu na jinju, bhaabhigusyaga na okureeta jipirya ejo ku‑tumwa. 35 Jitumwa bhaagabhiraga abhaanu jipirya ejo, okuruubhana na obhukene bhwa bhuri muunu.