Inyarubha ya okwamba ya Pawuro
ku‑Bhatesaroonike
Obhukeesya
1
1 Inyarubha inu,
niikaamire anye Pawuro,
aamwi na Sirwanoa na Timoteewo.
Echibhakaamira emwe bhanu muri mw‑ikanisa rinu riri mu‑musi gwa Tesaroonike,
emwe bhanu mwikirisiisye Raata Nyamuwanga na Raatabhugenyi Yeesu Kirisito.
Obhwitiriranya na omurembe bhibhe aamwi na emwe.
Obhurame na eriikirisya rya Abhatesaroonike
2 Echisiima Nyamuwanga bhuri rusiku inguru yeemwe bhoone na chitakuyigwa okubhasabhirwa.
3 Bhunu echibhasabhirwa ku‑Nyamuwanga Raata weeswe,
echiichuka imbere yaaye,
emirimu jeemwe jinu omukora kwa eriikirisya.
Echiichuka okukomeera kwemwe kunu okusookana na eryenda ryemwe,
ka wone,
okwigumiirisya kwemwe kunu okusookana na obhwiyikanyo bhwemwe bhwa okusubha rindi Raatabhugenyi Yeesu Kirisito.
4 Mbe,
emwe abhayiri bheeswe,
bhanu mwenderwe na Nyamuwanga,
echimenya ati,
omwene abhasorere okubha abhaana bhaaye.
5 Echimenya kutyo,
kwa okubha omwanya gunu ꞉chaabharaasisiisye Emisango ja Ekisi inguru ya Yeesu,
꞉chitaabharaasisiisye emisango era.
Tari okuraasya kweswe,
꞉kwarubheene na ebhiruguusyo bhinu bhyakorwaga na Mwoyo Mweru.
꞉Chaaraasiisye chimenyere kisi ati,
emisango ejo ni ja echimari.
Emwe abheene mumenyere kutyo chaariga chiri aamwi na emwe,
korereki chibhasakire.
6 Emwe nooro kutyo ꞉mwanyaasiibhwe muno inguru ya eriikirisya ryemwe,
꞉mwaruubhire omusango ogwo kwa ekonderwa rinu ꞉mwayaanirwe na Mwoyo Mweru.
Kwa okukora kutyo,
꞉mwaruubhire echijekekanyo cheeswe na echa Raatabhugenyi Yeesu.
7 Kurwa ejo,
nooro emwe mwabheeye echijekekanyo cha ekisi,
ku‑bheekirisya bhoone bha mu‑mukoowa gwa Makedooniya na ogwa Akaaya.
8 Okusookana na emwe,
abhaanu ꞉bhoonguuwe Emisango ja Ekisi inguru ya Raatabhugenyi Yeesu.
Itari ku‑bhaanu bha Makedooniya na Akaaya era,
tari eriikirisya ryemwe ku‑Nyamuwanga rimenyekeene bhuri rubhaara.
Kurwa ejo,
eswe chitakunyaaka okubhwira abhaanu inguru ya eriikirisya ryemwe.
9 Abhaanu abho abhatonda kutyo ꞉mwachikumire na kutyo ꞉mwasigire okuramya amasusano geemwe,
nimuyinduka,
nimuramya Nyamuwanga omuwanga na wa echimari.
10 Wone abhatonda kutyo omurindirira Omwana waaye,
asubhe rindi okusooka mu‑rwire.
Oyo niwe Nyamuwanga ꞉aasuuruuye okusooka mu‑bhafuuwe.
Niwe Yeesu unu kaachichungura okusooka mu‑ndamu ya Nyamuwanga inu eyiija.