Emirimu ja Pawuro na abheejaabho Tesaroonike
2
1 Emwe abhayiri bheeswe mu‑riikirisya,
omumenya ati,
eswe okuuja kw‑imwe,
kwariga kuri kwa omuriiro munene muno.
2 Ka wone mumenyere ati omwanya gunu chaariga chichaari okukinga kw‑imwe,
꞉chaanyasiibhwe muno na okufumwa mu‑musi gurya gwa Firiipi.
a Nooro kw‑imwe ꞉chaayingiriiywe muno,
nawe Nyamuwanga weeswe ꞉aachiyaaye ribhaasi rya okubharaasisya Emisango ja Ekisi.
3 Emisango jinu echibhakomeeresya jitakusookana na orubheeyi,
amwi obhwira obhubhiibhi nooro chitakukena okubhajiga.
4 Nawe echiraasya kwa okubha Nyamuwanga ꞉aachiikirisisiisye,
ˆnaachiyaana emirimu ja okuraasya Emisango ja Ekisi.
Jitari ati,
echikena okukondisya abhaanu,
tari echikena okukondisya Nyamuwanga unu kaamenya kutyo emyoyo jeeswe jiri.
5 Mbe,
mumenyere ati,
chaariga chitakwayika emisango ja okwikondya kw‑imwe,
nooro okwayika emisango jinu jitari ja echimari,
korereki chibhone omuriiro.
Nyamuwanga niwe kaamenya ati,
jinu echaayika ni ja echimari!
6 Eswe chaariga chitakukena abhaanu bhachikuuye,
ka wone chaariga chitakukena emwe nooro abhaanu abhandi bhoone bhachikuuye.
Nooro kutyo eswe chiri jitumwa ja Kirisito,
chaakendere ebhiinu ebhirebhe okusooka kw‑imwe,
nawe ꞉chitaakorere kutyo.
7 Chaariga chiri bhoorooro kw‑imwe rwa kutyo omugasi kaarera abhaana bhaaye.
8 ꞉Chaabheendere muno.
Ka wone,
꞉chaakondeewe,
jitari kwa okubharaasisya Emisango ja Ekisi okusooka ku‑Nyamuwanga era,
tari na okwisoosya okukora joone jinu ejikenwa korereki okubhasakira.
꞉Chaakorere kutyo,
kwa okubha emwe muri abheendwa bheeswe.
9 Woori,
abhayiri bheeswe,
omwichuka okwikomeesya kweswe na okunyaaka kweswe,
kutyo chaakoraga emirimu mu‑ngeta na mu‑mwisi.
꞉Chaakorere kutyo,
korereki omwanya gunu echiraasya Emisango ja Ekisi okusooka ku‑Nyamuwanga,
chisige okunyaasya omuunu woonewoone kw‑imwe.
10 Emwe omumenya,
Nyamuwanga wone kaamenya ati,
bhunu ꞉cheekaaye kw‑imwe abheekirisya,
itungwa yeeswe yaariga iri ya ekisi na ya obhurengeresi,
ka wone chaariga chitari na esoro.
11 Omwichuka ati,
omwanya gunu chaariga chiri kw‑imwe,
chaakoreraga bhuri umwi weemwe rwa kutyo omwibhusi wa echirume kaakorera abhaana bhaaye.
Chaariga nichibhakomeesya emyoyo,
okubhasimbisya na okubheeririra,
12 korereki mwikare rwa kutyo Nyamuwanga keenda.
Nyamuwanga niwe kaabhabhirikira korereki mwingire mu‑bhukama na mw‑ikusyo ryaye.
13 Kurwa ejo,
eswe chitakuyigwa okusiima Nyamuwanga,
kwa okubha mwejire mwoongwa emisango jaaye okusooka kw‑iswe,
꞉mutaajiikirisiisye wuti ni misango ja abhaanu.
Nawe,
꞉mwajiikirisiisye mumenyere ati ejisooka ku‑Nyamuwanga.
Chimari,
nikwo kutyo jiri.
Emisango ejo,
nijo ejikora emirimu mu‑myoyo jeemwe,
emwe abheekirisya.
14 Abhayiri bheeswe,
emisango jinu ꞉jaabhwene abhaanu bhanu ꞉bheekirisiisye Kirisito Yeesu,
mu‑makanisa ga Nyamuwanga mu‑mukoowa gwa Yuudeya,
nijo jibhabhwene emwe wone.
Abhaanu bheemwe ꞉bhaabhanyasiisye emwe,
rwa abheene kutyo bhaanyasiibhwe na Abhayawudi abheejaabho.
15 Abhayawudi abho,
nibho ꞉bheetire Raatabhugenyi Yeesu aamwi na abharagi bha kara.
Ka wone,
nibho ꞉bhaachinyasiisye eswe wone.
Abhaanu abho abhabhiyisya Nyamuwanga,
nyabhuriko ni bhasoko bha abhaanu bhoone,
16 kwa okubha abhachiyingirira okuraasya Emisango ja Ekisi ku‑bhaanu bhanu bhatari Bhayawudi.
Bhatakwenda abhaanu abho bhachunguke.
Nikwo kutyo,
abhagenderera okukuumisya ebhibhiibhi bhyebhwe bhinu abhakora bhuri rusiku.
Nawe,
risungu rya Nyamuwanga ryabhakingiiye!
Obhwira bhwa okugosorera Abhatesaroonike
17 Mbe,
abhayiri bheeswe,
okusigana kweswe na emwe,
kwariga kuri kwa katungu kafuyi era.
Ka wone,
꞉chaasigeene chinyamubhiri era,
nawe ꞉chitaasigeene chinyamwoyo.
Ku‑mwanya ogwo gwone,
chaariga nichiigomba okubhugana na emwe rindi.
18 Woori,
chaariga cheendere okubhagosorera,
chimwichimwi anye Pawuro,
naariga nikarariiye muno okubhagosorera okukira rumwi,
nawe Syetaani ˆnaachiyingirira.
19 Chaariga cheendere okubhagosorera kwa okubha,
Raatabhugenyi Yeesu aribha aasubha,
emwe muribha obhwiyikanyo bhweswe,
rikonderwa ryeswe na orutengya rwa obhuyigi bhunu chiriikuuyisya.
20 Chimari emwe omukora eswe chiikuuye na chikonderwe.