Pawuro kaatuma Timoteewo Tesaroonike
3
1 Ku‑bhuteero nichitaamibhwa okugenderera okwigumiirisya,
kwa okubha chaariga chitakumenya echiinu chinu chaakorekanaga eyo.
Niwo nichiramura ati,
ni akiri eswe,
chisigare mu‑musi gwa Ateene.
2 Nichituma Timoteewo omuyiri weeswe,
korereki aaje okubhakomeesya emyoyo jeemwe na okubhasimbisya inguru ya eriikirisya ryemwe.
Omwene ni mukosi oweejaasu wa Nyamuwanga,
wa okuraasya Emisango ja Ekisi inguru ya Kirisito.
3 ꞉Chaakorere kutyo,
korereki omuunu woonewoone asige okufwa omutima inguru ya ebhinyaasyo bhinu.
Emwe abheene mumenyere ati,
echikenwa chiture mu‑bhinyaasyo.
4 Mumenyere ejo,
kwa okubha omwanya gunu chaariga chiri aamwi na emwe,
꞉chaabhabhwiriiye ati,
chirinyaasibhwa.
Woori ejo nijo jaakorekana.
5 Mbe,
anye omwene nejire naataamibhwa okugenderera okwigumiirisya,
꞉naatumire Timoteewo kw‑imwe,
korereki nimenye kutyo mwariga nimugenderera okwikirisya Yeesu.
꞉Naakorere kutyo kwa okubha naariga niniiganirisya ati,
amwi Syetaani omuregeeji urya,
꞉aabharegeejere na okubhayabhya.
Jikabha jiri kutyo,
emirimu joone jinu ꞉chaakorere jitaribha na omuriiro.
Omusango gwa ekisi okusooka ku‑Bhatesaroonike
6 Woori,
Timoteewo aasubhire okusooka kw‑imwe,
aachibhwira emisango ja ekisi inguru ya eriikirisya ryemwe na eryenda ryemwe.
Ka wone aachibhwira ati,
omuchiichuka muno bhuri rusiku,
muri na obhwira muno mubhugane na eswe,
rwa kutyo eswe wone chiri na obhwira bhwa okubhugana na emwe.
7 Mbe,
abhayiri bheeswe,
emisango inguru ya eriikirisya ryemwe,
jaasimbiisya emyoyo jeeswe,
mu‑nyaako na mu‑bhinyaasyo bhyeswe bhyone.
8 Woori,
emyoyo jeeswe ejikonderwa muno,
kwa okubha emwe omugenderera okurumatana ku‑Raatabhugenyi Yeesu.
9 Nyamuwanga weeswe achiyaaye rikonderwa enene muno ku‑songa yeemwe!
Chitakutura wuri nooro na akatyari okusoosya risiima rya echimari inguru ya rikonderwa ryone eryo imbere yaaye.
10 Echisabhwa Nyamuwanga muno bhuri rusiku,
mu‑ngeta na mu‑mwisi ati,
achisakire chibhagosorere.
Echikena chibhugane na emwe,
korereki chibhasakire anu eriikirisya ryemwe rigerukire.
11 Mbe,
Nyamuwanga omwene,
Raata weeswe aamwi na Raatabhugenyi weeswe Yeesu,
achitangatire,
achisoosisye‑ko ebhisiki ku‑njira,
korereki chibhaaje‑ko bhwangu.
12 Raatabhugenyi abhoongesye eryenda,
korereki mugenderere okwendana muno emwe abheene kwa abheene,
mwende wone abhaanu abhandi bhoone,
rwa kutyo eswe wone echibheenda.
13 Akomeesye emitima jeemwe,
korereki mubhe abheeru,
bhanyamburwa esoro mu‑meeso ga Nyamuwanga Raata weeswe,
omwanya gunu Raatabhugenyi weeswe Yeesu arisubha aamwi na abheeru bhaaye bhoone.a