Abheeyigisya bha orubheeyi
4
1 Woori, Mwoyo Mweru kaayika abhwerubhweru ati, mu‑siku ja obhuteero, abhaanu abhandi bharisiga eriikirisya rya echimari, bharitegeresya emyoyo jinu ejiyabhya na bharigayuka ameeyigisyo ga amasyetaani. 2 Ameeyigisyo ago ageeyigisibhwa na abheerimaanya na abhabheeyi bhanu emitima jeebhwe jinyamukire chimwi rwa wuti jisingaarisiibhwe mu‑muriro. 3 Abhaanu abho ku‑meeyigisyo geebhwe, abhayingirira abhaanu bhasige okutwara, amwi bhasige okurya ebhiryo ebhirebhe. Nawe Nyamuwanga ꞉aabhibhumbire korereki abheekirisya bhabhiramire, bhamusiime na okubhirya kwa okubha abheene abhamenya echimari. 4 Ebhiinu bhyone bhinu Nyamuwanga abhumbire ni bhya kisi, noorwo chitari‑wo echiinu choonechoone cha okuremwa. Nawe Nyamuwanga asiimwe inguru ya ebhyo bhyone, 5 kwa okubha omusango gwa Nyamuwanga na risabhwa ryeswe, ebhyesya ebhiinu ebhyo.Omukosi wa ekisi wa Kirisito Yeesu
6 Ukeeyigisya abheejaasu bhoone emisango ejo, niwo uribha omukosi wa ekisi wa Kirisito Yeesu. Ka wone, uribhaga urererwe kisi mu‑chimari cha eriikirisya na ameeyigisyo ga ekisi ganu awe uruubhire. 7 Awe usige chimwi jingani ja abhaanu bha kara jinu jitari na obhugajuro bhwonebhwone, nawe wiikomeesye siku joone okwikara rwa kutyo Nyamuwanga keenda. 8 Jimenyekeene ati, “Okunasya omubhiri okubhona amanaga, kuri‑mo omuriiro mutooto era. Tari, okwikomeesya okwikara rwa kutyo Nyamuwanga keenda, kuri‑mo omuriiro gwa bhuri mbaga, kwa okubha rinu erichiyaana omurago gwa okubhona obhuwanga bhwa woori na bhunu bhuriija.” 9 Omusango ogwo ni gwa echimari na gwiyire okwikirisibhwa. 10 Ogwo nigwo ogukora nichiikomeesya na okukora emirimu ku‑managa goone, kwa okubha, echiiyikanya Nyamuwanga omuwanga. Omwene niwe Omuchungusi wa abhaanu bhoone, chimwichimwi bhanu abhamwikirisya.
11 Iyigisya na okuragirira abhaanu emisango ejo. 12 Omuunu woonewoone asige okukugaya, kwa okubha ati uchaari musigaji, tari wiikomeesye okubha echijekekanyo cha ekisi ku‑bheekirisya mu‑nyaayika, mu‑tungwa, mu‑ryenda, mu‑riikirisya na mu‑bhwima. 13 Ikomeesya okusomera abhaanu, okubhakomeeresya na okubheeyigisya Ebhikaame Ebhyeru okukingira anu niriija. 14 Komeera okukorera emirimu echiyaanwa chinu Nyamuwanga akuyaaye ku‑njira ya emisango ja obhuragi na okutuurirwa‑ko amabhoko aamwi na abhakaruka bha rikanisa. 15 Wiikomeeresye okukora ejo mu‑mutima gwawo gwone, korereki abhaanu bhoone bharore amagenderero gaawo. 16 Iyangarira awe omwene, inguru ya jitungwa jaawo na ameeyigisyo gaawo na ugenderere okukora kutyo. Ukakora ejo urichunguka awe omwene aamwi na abhaanu bhanu abhakutegeresya.