Jikuma ja abhaangarisi bha rikanisa
3
1 Omusango gunu ni gwa echimari, “Omuunu unu keegomba emirimu ja okubha omwangarisi wa rikanisa, oyo keegomba emirimu ja ekisi.” 2 Mbe, bhuri mwangarisi wa rikanisa, abhe omuunu unu atari‑ko esoro. Abhe murume wa omugasi umwi era, abhe omwiyingirisi, ka wone abhe na obhwengeeso, omuunu unu kaayaanwa echibharo, omufura na abhe omuunu unu kaamenya okwiyigisya. 3 Asige okubha omukorwa, asige okubha omurwani, tari abhe mworooro, abhe omwendi wa omurembe na asige okubha na inamba imbiibhi ya okubhona jipirya. 4 Abhe omuunu wa okwimereegururu kisi omusi gwaye, unu kaamenya okwiyigisya abhaana bhaaye korereki bhabhe nibhamugayuka na okumuyaana echibharo. 5 Okubha omuunu unu atakutura okwimereegururu omusi gwaye kisi, kaatura kutiki okwangarira abheekirisya mw‑ikanisa rya Nyamuwanga? 6 Ka wone, asige okubha omuunu unu aamamara okuchunguka, korereki aasiga okwikuuya. Okwikuuya okwo okutura okumukora aramurwe rwa kutyo Syetaani ꞉aaramuuywe. 7 Tari, abhe omuunu unu kaayikwa kisi noorwo na bhanyateekirisya, korereki aasiga okwayikwa kubhiibhi na okukomwa mu‑rutuura rwa Syetaani.Jikuma ja abhasakisi bha rikanisa
8 Abhasakisi bha rikanisa wone, bhabhe na jitungwa ja ekisi, bhasige okubha abhabheeyi, bhasige okubha abhakorwa, bhasige okubha na inamba imbiibhi ya okubhona jipirya. 9 Tari, bhabhe abhaanu bhanu abhagwatana mu‑mutima gwa ekisi na echimari cha eriikirisya chinu Nyamuwanga asweruuye. 10 Abho wone bharegeejwe okwamba. Bhaakamara okubhonekana ati bhatari‑ko esoro, niwo bhakore emirimu ejo. 11 Abhagasi bheebhwea wone, bhabhe abha jitungwa ja ekisi, bhasige okubha abharomi bha abhaanu, bhabhe bha okwiyingirira, ka wone, bhabhe abheeyikanyibhwa mu‑misango joone. 12 Abhasakisi bha rikanisa, bheenderwe bhuri umwi abhe na omugasi umwi era. Ka wone, bhabhe nibheemereegururu kisi abhaana bheebhwe na emisi jeebhwe. 13 Okubha abhasakisi bhanu abhakora kisi emirimu ja obhusakisi, abheebhonera echibharo. Wone, abhabhona ebhaasi nene rya okuraasya emisango ja eriikirisya ryebhwe mu‑Kirisito Yeesu.
Echimari cha eriikirisya ryeswe
14 Enikukaamira inyarubha inu, noorwo kutyo eniiyikanya okuuja kw‑awe omwanya gutari mureera. 15 Nawe aribha naakoora, umenye jinu jiiyire abhaana bha Nyamuwanga bhakore. Abhaana abho nibho rikanisa rya Nyamuwanga omuwanga na rikanisa niryo ingʼingi na orufuka rwa echimari. 16 Echimari chinu Nyamuwanga asweruuye ni cha okuruguusya na nicho chinu,
Kirisito ꞉eesweruuye mu‑mubhiri,
ˆnaayikwa na Mwoyo Mweru ati ni murengeresi,
ˆnaabhonekana ku‑bhamaraayika,
ˆnaaraasibhwa mu‑maanga goone,
ˆneekirisibhwa na abhaanu bha mu‑chaaro,
ˆnaagegwa okuja inguru mw‑ikusyo.