Ameeyigisyo inguru ya okuromba
2
1 Nyabharinyabhari, enibhakomeeresya mukore risabhwa rya bhuri mbaga inguru ya abhaanu bhoone. Musabhwe Nyamuwanga asakire na okuyaana abhaanu bhoone amabhando. Ka wone, mumubhwire kutyo omumusiima inguru ya abhaanu abho bhoone. 2 Omukenwa okusabhirwa abhakama na abhatangasya abhandi bhoone, korereki chiikare na omurembe, nichikoraga rwa kutyo Nyamuwanga keenda na chiri na jitungwa ja ekisi. 3 Omusango ogwo ni gwa ekisi, ka wone gukondeeye Nyamuwanga Omuchungusi weeswe. 4 Nyamuwanga keenda abhaanu bhoone bhachungurwe na okumenya echimari. 5 Ari‑wo Nyamuwanga umwi era. Wone omugwatanya agati ya abhaanu na Nyamuwanga ni umwi era, niwe omuunu Kirisito Yeesu. 6 Omwene ꞉aasoosiisye obhurame bhwaye, korereki eerure abhaanu bhoone. Bhunu nibhwo obhubhambaasi bhunu Nyamuwanga ꞉aachiyaaye ku‑mwanya gunu ꞉aateeye‑wo. 7 Nikwo okukora anye ꞉naateeywe‑wo okubha omuraasya na okubha itumwa. Ka wone ꞉naateeywe‑wo okubha omwiyigisya wa abhaanu bhanu bhatari Bhayawudi, korereki nibhe nindaasya emisango ja eriikirisya na echimari. Enaayika echimari, nitakubheeya wuri.8 Kurwa ejo, bhuri rubhaara runu omwikumanya okusabhwa, eneenda abharume bhasabhwega bheenamusiisye amabhoko inguru. Bhakore kutyo kwa omutima omweru, okubhiyirwa wuri noorwo okubhambasyanya. 9 Kutyokutyo, eneenda abhagasi wone, bhafware emyenda jinu jiiyire ku‑bhagasi, bhabhe na jitungwa ja ekisi na bheeyingirire. Bhasige okwinojoorya kwa okusuka jifwiri, amwi kwa okufwara ebhiinu bhya jinaaryo na bhinu ebhibharangisya, amwi emyenda ja obhugusi obhurambu. 10 Tari, bhakore ebhikorwa bhya ekisi, bhinu bhiiyire ku‑bhagasi bhanu bheekirisiisye okuramya Nyamuwanga. 11 Abhagasi, bhaakabha nibheeyigira, bhabhe bheetegeresya na abhagayuki. 12 Nitakwikirisisya abhagasi okwiyigisya noorwo okutunga abharume, tari bhabhe bheetegeresya. 13 Enaayika kutyo, kwa okubha Nyamuwanga ꞉aabhumbire Adaamu okwamba, neeya ˆnaabhumba Aawa. 14 Ka wone, atari Adaamu unu injoka ꞉yaajigire, tari omugasi niwe ꞉aajigirwe, ˆnaabha omunyamusi wa amaragiriro ga Nyamuwanga.a 15 Nawe omugasi arichungurwa ku‑njira ya orwibhuro rwaye, akagenderera okwikomeesya mu‑riikirisya, mu‑ryenda, mu‑bhweru na okwiyingirira.