Inyarubha ya okwamba ya Pawuro
ku‑Timoteewo
Obhukeesya bhwa Pawuro ku‑Timoteewo
1
1 Inyarubha inu, niikaamire anye Pawuro, itumwa ya Yeesu Kirisito. Anye nitumirwe okubha itumwa ya Kirisito Yeesu ku‑chiragiriro cha Nyamuwanga Omuchungusi weeswe na Kirisito Yeesu niwe obhwiyikanyo bhweswe. 2 Enikukaamira awe Timoteewo, omwana waani wa echimari mu‑riikirisya.Obhwitiriranya, echigongo na omurembe okusooka ku‑Raata Nyamuwanga na ku‑Kirisito Yeesu Raatabhugenyi weeswe, bhibhe aamwi na awe.
Okwikenga ameeyigisyo ga orubheeyi
3 Omwanya gunu ꞉neemukire okugenda mu‑mukoowa gwa Makedooniya, ꞉naakusabhirwe ubhe mu‑musi gwa Yefeeso. ꞉Naakusabhirwe ukore kutyo korereki ugonye abhaanu bhanu abheeyigisya ameeyigisyo ga orubheeyi. 4 Ubhagaanye bhasige okugwatira jingani ja kara jinu jitari na obhugajuro na okwinyaasya na emiroobho ja amasiina ga bhasaaja ganu gatari na obhuteero. Emisango ejo joone ejireeta jimamba era, jitakusakira abhaanu okwikirisya Nyamuwanga, rwa kutyo bhuri obhutinge bhwaye bhwa okuchungura abhaanu. 5 Obhukarariiye bhwa amaragiriro ago ni ati abheekirisya bheendane kwa omwoyo gwa ekisi, mu‑mutima mweru na mu‑riikirisya rya echimari. 6 Nawe abheeyigisya bha orubheeyi abho ꞉bhaasigire ejo, bhayindukire, abhaayika emisango jinu jitari na omuriiro. 7 Abheenda bhabhe abheeyigisya bha ebhiraagiro bhya Muusa,a noorwo kutyo jinu abhaayika na okukomeeresya bhatakujimenya.
8 Nawe eswe chimenyere ati ebhiraagiro bhya Muusa ni bhya ekisi, araabha omuunu kaabhiruubha rwa kutyo jeenderwe. 9 Wone jiiyire okumenya ati, ebhiraagiro bhitateeywe‑wo inguru ya abharengeresi, tari inguru ya bhanu abhanyamura ebhiraagiro na inguru ya bhanyatagayuka, ku‑bhanu bhatakuramya Nyamuwanga na ku‑bhakosi bha ebhibhiibhi, ku‑bhanu bhatari na mitima myeru na ku‑bhajabhi, ku‑bhanu abheeta bheesemwene, bhanyiramwene na ku‑bheeti bha abhaanu, 10 ku‑bharomesi na ku‑bhanu abhasambuka abharume abheejaabho, ku‑bhanu abheetegaanira abhaanu na okubhagusya mu‑bhugaya, abhabheeyi na ku‑bhanu abharayira ku‑rubheeyi. Ebhiraagiro bhiteeywe‑wo ku‑misango joone jinu jitakwikirisyanya na ameeyigisyo ga echimari. 11 Ameeyigisyo ago agabhonekana mu‑Misango ja Ekisi, jinu ejeeresya rikusyo rya Nyamuwanga wa amabhando goone. Emisango ejo nijo ꞉naayaaywe na Nyamuwanga nijiraasye.
Echigongo cha Kirisito Yeesu ku‑Pawuro
12 Enisiima Kirisito Yeesu Raatabhugenyi weeswe unu ꞉aanaaye amanaga okukora emirimu jaaye. Enimusiima kwa okubha andorere ati niiyire okubha omukosi waaye, 13 noorwo kutyo ku‑bhwambiro naamufumaga na okunyaasya abhaanu bhaaye, naariga niri murakoko. Nawe, omwene ꞉aanfwiriiye echigongo, kwa okubha naariga ninkora ejo mu‑bhumuumu na naariga nitari na eriikirisya. 14 Chimari, Raatabhugenyi weeswe Kirisito Yeesu ꞉aanyitiriiye obhwitiriranya bhwafu muno. Ka wone, ꞉aanaaye eriikirisya na eryenda mu‑kubha na obhumwi nage.
15 Omusango gunu ni gwa echimari na gwiyire okwikirisibhwa ati “Kirisito Yeesu ꞉eejire mu‑chaaro, korereki achungure abha ebhibhiibhi.” Anye niri owa ebhibhiibhi okukira abho bhoone. 16 Noorwo kutyo, Yeesu Kirisito ꞉aanfwiriiye echigongo! ꞉Aanyeresiisye obhwigumiirisya bhwaye, anye owa ebhibhiibhi okukira bhoone, korereki nibhe echijekekanyo ku‑bhoone bhanu abhaja okumwikirisya na okuramira obhuwanga bhwa akajaanende koone. 17 Nyamuwanga niwe omukama unu atari na obhuteero, atakufwa na atakubhonekana, atari‑wo owundi rwa omwene. Omwene ayaanwe echibharo na rikusyo akajaanende koone. Jibhe kutyo.
Pawuro kaaragirira Timoteewo okugwata amaragiriro
18 Omwana waani Timoteewo, enikuyaana amaragiriro ago, okuruubhana na emisango ja obhuragi jinu ꞉jaayikirwe inguru yaawo. Emisango ejo jikusakire okukora emirimu ja Nyamuwanga rwa okurwana riremo kisi. 19 Ugwatirire eriikirisya na okubha na omutima gwa ekisi. Abhaanu abhandi abhagaya okukora emisango jinu abhamenya ati ni chimari, eryo rikorere nibhasiga okwikirisya Nyamuwanga. 20 Mu‑bhaanu abho ari‑mo Imenaayob na Arekijanda. Abho nibhasigiiye Syetaanic korereki bheeyigire, bhasige okufuma Nyamuwanga.