Amaragiriro ku‑bheekirisya mw‑ikanisa
5
1 Waasiga okugonya omukaruka, tari umutongere rwa kutyo owutongera esomwana. Abhasigaji ubhatongere rwa abhamura bhaanyu, 2 abhakwekuru ubhatongere rwa bhaanyokomwana na abhayarakaji ubhatongere rwa abhayara bhaanyu. Ukore kutyo kwa omutima omweru.3 Uyaane echibharo abhatumbagasi bhanu bharabheeye abhatumbagasi katakata. 4 Nawe omutumbagasi woonewoone akabha ari na abhaana amwi abheechukuru, ejikenwa abhaana na abheechukuru abho nibho bhabhe bha okwamba okwiyigira okukora emirimu ja okusakira abhayiri bheebhwe. Ku‑njira eyo abhariya abheebhusi bheebhwe ku‑ja ekisi jinu abheene wone ꞉bhaabhakoreeye. Kutyo nikwo Nyamuwanga keenda. 5 Omutumbagasi wa echimari unu atari na omuunu wa okumusakira, oyo keeyikanya Nyamuwanga, kaamuramya na okusabhwa obhusakisi ku‑mwene mu‑ngeta na mu‑mwisi. 6 Nawe omutumbagasi unu atakutura okwiyangarira, oyo ari rwa omufuuwe noorwo kutyo kaabhonekana okubha omuwanga. 7 Ukomeeresye abheekirisya emisango ejo, korereki bhaasiga okubha na esoro. 8 Nawe omuunu woonewoone unu atakusakira abhaanu bhaaye, chimwichimwi bharya bha mu‑musi gwaye, oyo kaabha asigire eriikirisya, ka wone, ni mubhiibhi okukira unu atari mwikirisya.
9 Omutumbagasi unu kaakenwa okutuurwa mu‑bhutinge bhwa abhatumbagasi, ni unu akingiisye emiguuga makumi gataanu na rimwi, ka wone, aariga atari omuromerwa.a 10 Abhe omuunu wa jikuma ja ekisi, abhe eeyigisiisye abhaana bhaaye jitungwa ja ekisi, abhe akumire abhagenyi, abhe oosiisye abheeru amaguru, abhe asakiiye abhaanu bhanu bhari mu‑nyaako, ka wone, abhe eekomeesiisye okukora ebhikorwa bhyone bhya ekisi. 11 Nawe mu‑bhutinge bhwa abhatumbagasi, siga okwingisya‑mo abhatumbagasi bhanu bhachaari abhasigaji, kwa okubha abheene orukubho rukabhakubha, abhasiga emirimu ja Kirisito nibheekurura na okukena okutwarwa rindi. 12 Ku‑chikorwa echo bhariramurwa, kwa okubha bhasigire omurago gwebhwe gwa okwamba ku‑Kirisito gwa okusigara bhatatwawe rindi. 13 Aamwi na ejo, abheeyigira jitungwa ja obhurenga, bhutari bhurenga era, nawe ni bharomi na abhayengiyengi mu‑misi ja abhaanu abhandi. Jitari ejo era, abheeyingisya wone, mu‑misango ja abhaanu abhandi na okwayika emisango jinu jiteeyire. 14 Woori, anye enikena abhatumbagasi abhasigaji, bhabhe nibhatwarwa, bheebhure abhaana na okwangarira jinyuumba jeebhwe abheene, korereki abhasoko bheeswe bhaasiga okuchayika kubhiibhi. 15 Okubha abhatumbagasi abhandi bhaamarire okubhura na okuruubha Syetaani.
16 Araabha omugasi omwikirisya ari na abhatumbagasi mu‑bhayiri bhaaye, abhasakire, korereki rikanisa risige okusitoyerwa. Kutyo, rikanisa riribha na omwanya gwa okusakira abhatumbagasi abhandi bhanu bhatari na obhusakisi.
17 Abhakaruka bhanu abhaangarira rikanisa kisi, bhayaanwe echibharo na okukorerwa ja ekisi,b chimwichimwi bhanu abheesoosya okuraasya na okwiyigisya. 18 Enaayika kutyo, kwa okubha jikaamirwe mu‑Bhikaame Ebhyeru ati, “Iingʼa ikabha niiwuura obhuro, waasiga okuyibhoya omunwa.”c Ka wone, jikaamirwe, “Omukosi wa emirimu eeyire okuriywa omuyeero gwaye.”d
19 Waasiga okwikirisya okubhuurwa inguru ya omukaruka wa rikanisa, tari ku‑bhubhambaasi bhwa abhaanu bhabhiri amwi bhasatu. 20 Nawe abhakaruka bhanu abhagenderera okukora ebhibhiibhi, ubhagonye imbere ya abhaanu abhandi bhoone, korereki abho wone bhoobhaye.
Timoteewo kaagonywa
21 Enikuragirira imbere ya Nyamuwanga, imbere ya Kirisito Yeesu na imbere ya bhamaraayikae abhasorwa ati, ukorega ejo, waasiga okwiwuta okusoosya indamu amwi okubha na isoroore ku‑rubhaara rumwi. 22 Waasiga okwiwuta okutuura omuunu ku‑mirimu ja Raatabhugenyi, kwa okubha ukatuura‑ko omuunu omubhiibhi ku‑mirimu ejo, awe wone owubha usangiiye ebhibhiibhi bhyaye. Wiyangarire omwene, korereki ugenderere okubha omweru.
23 Okwambira woori, awe usige okunywa amanji era, tari ubhe nuunywa na echifuufuf echitooto inguru ya obhurwaye bhwawo bhwa inda na amarwara agandi ganu agakunyaasya.