Amaragiriro ku‑bhagaya abheekirisya
6
1 Abhagaya bhoone bhanu bhari bheekirisya, bhagayuke abhaami bheebhwe. Bhaakakora kutyo, abhaanu bhatakuja okufumirisya Nyamuwanga noorwo ameeyigisyo geeswe. 2 Araabha abhagaya bhari na abhaami abheekirisya bhasige okubhagaya, kwa okubha abheene wone ni bhayiri. Abhagaya abho, abhakenwa bhabhakorere ja ekisi muno, kwa okubha abhabha nibhasakira abheekirisya abheejaabho, ka wone ni bheendwa bheebhwe. Ejo ujiiyigisye na okujikomeeresya.Ameeyigisyo ga orubheeyi na obhuniibhi bhwa echimari
3 Bhari‑wo abhaanu bhanu abheeyigisya ameeyigisyo ga orubheeyi. Abheeyigisya ameeyigisyo ganu gatakwikirisyanya na ameeyigisyo ga echimari ga Raatabhugenyi weeswe Yeesu Kirisito, ka wone gatakwikirisyanya na ameeyigisyo ganu agasakira abhaanu okwikara rwa kutyo Nyamuwanga keenda. 4 Abho bheejuuywe orwikuuya, ka wone bhatakusombookerwa echiinu choonechoone. Abhaanu abho bhoomiriiye jimamba keenu jitari na omuriiro gwonegwone inguru ya emisango emitoototooto. Mu‑misango ejo nimwo orusooka orwiso, inyombo, amafumo na obhwiganirisya obhubhiibhi, 5 ka wone nijo ejinyamura obhungwani siku joone. Abhaanu abho obhwenge bhwebhwe bhunyamukire, bhatari‑mo echimari mu‑myoyo jeebhwe. Abheetogera ati okwikara rwa kutyo Nyamuwanga keenda niyo injira ya okubhona obhuniibhi.
6 Chimari, okurama rwa kutyo Nyamuwanga keenda okukora omuunu abhe omuniibhi muno, araabha akeeywa na ebhiinu bhinu ari nabhyo. 7 Mu‑chaaro chinu, chiteejire na echiinu choonechoone, ka wone chitariimuka na echiinu choonechoone. 8 Mbe, araabha chikabha na ebhiryo na emyenda ja okufwara, chiiywe na ebhyo. 9 Nawe abhaanu bhanu bhari na obhurigire bhwa obhuniibhi, abhagwa mu‑maregeejo, nibhakomwa mu‑tuura na mu‑namba nyafu ja obhutaamutaamu. Obhurigire obhwo obhubhanyamura okukingira bhasingaarisibhwe. 10 Okubha inamba imbiibhi ya okubhona jipirya nibhwo obhwambiro bhwa ebhibhiibhi bhyafu bhya bhuri mbaga. Abhaanu abhandi bhanu abheegomba obhuniibhi kutyo, bhajigirwe na bhasigire eriikirisya. Woori, abhaanu abho bheeretereeye obhusurumbaaye bhwafu mu‑myoyo jeebhwe.
Timoteewo kaatongerwa
11 Nawe awe, omuunu wa Nyamuwanga, wiiruke ejo. Uruubhega rirenga, okurama rwa kutyo Nyamuwanga keenda, eriikirisya, eryenda, okwigumiirisya na obhworooro. 12 Komeera okurwana kisi riremo rya eriikirisya, korereki wiibhonere obhuwanga bhwa akajaanende. Obhuwanga obhwo nibhwo ꞉waabhirikiriiywe. Awe omwene ꞉waasoosiisye obhubhambaasi bhwa echimari imbere ya abhabhambaasi bhaafu. 13 Enikuragirira imbere ya Nyamuwanga unu kaatuura obhuwanga mu‑bhiinu bhyone, na imbere ya Kirisito Yeesu unu ꞉aasoosiisye obhubhambaasi bhwa echimari imbere ya Pootiyo Piraato ati, 14 ni bhusibhusi ugayuke amaragiriro ganu okubha na esoro wuri, okukingira anu Raatabhugenyi weeswe Yeesu Kirisito arisubha. 15 Aribha gwakinga omwanya gunu Nyamuwanga ateeye‑wo, arituma rindi Yeesu Kirisito ku‑chaaro. Nyamuwanga niwe kaakusibhwa, omwene era niwe owa obhuturo, Omukama wa abhakama na Raatabhugenyi wa bharaatabhugenyi. 16 Nyamuwanga era, niwe atakufwa, eenyanjire mu‑bhweru bhunu omuunu woonewoone atakutura okubhufogera‑ko. Ka wone, atari‑wo omuunu unu aramurorere, noorwo unu kaatura okumurora. Echibharo na obhuturo ari nabhyo omwene, akajaanende koone. Jibhe kutyo.
17 Ukomeeresyega abhaniibhi bha ebhiinu bhya mu‑chaaro munu ati bhasige okwikuuya, noorwo okwiyikanya obhuniibhi bhwebhwe. Obhuniibhi obhwo ni bhwa kasinjeeke era. Tari bheeyikanye Nyamuwanga unu mu‑bhufura bhwaye kaachiyaana ebhiinu bhyone bhinu echikena, korereki chibhikondererwe. 18 Ka wone, bhabhwire bhakore ja ekisi, niwo bharibha abhaniibhi mu‑bhikorwa bhya ekisi. Bhabhe bhafura na okusangira ebhiinu bhyebhwe aamwi na abhaanu abhandi. 19 Ku‑njira eyo, bhariibhiikira abheene ebhiinu okubha rwa orufuka rwa ekisi ku‑siku jinu ejiija. Omwanya ogwo niwo bhariramira obhuwanga bhwa echimari.
20 Timoteewo wangarire kisi echimari chinu Nyamuwanga akuyaaye. Wiikenge na emisango emijabhi jinu jitari na obhugajuro na jimamba ja echitaamutaamu, kwa okubha bhitakureeta echibharo ku‑Nyamuwanga. Abhaanu abhandi, abhatoga emisango ejo ati ni obhusombookerwa, nawe chimari bhutari obhusombookerwa. 21 Abhaanu abharebhe bhaasigire eriikirisya ryebhwe, kwa okubha bheekirisiisye emisango ejo.
Obhwitiriranya bhwa Nyamuwanga bhubhe aamwi na emwe.