Okuroma iniku ya okwita Yeesu
14
1 Jaariga jisigaaye‑wo siku ebhiri, okubha ichikukuru ya Okwambuka na ichikukuru ya emikaate jinu jitakutuurwa‑mo echifwimbya.a Abhakuru bha abhagabhisi na abheeyigisya bha ebhiraagiro bhya Muusa bhaariga nibhayenja injira ya okugwata Yeesu bhurigerige, korereki bhamuramure na okumwita. 2 Okubha ꞉bhaayikeene ati, “Chaasiga okukora jinu ku‑chikukuru ya Okwambuka, abhaanu bhaasiga okukora injogere.”Omugasi omurebhe kaabhambaga Yeesu amafuta
3 Omwanya ogwo Yeesu aariga ari mu‑ruguuyo rwa Bheetaniya, mu‑nju ya Simooni unu kara aariga arwaye ebhigenge. Omwanya gunu Yeesu aariga eenyanjire ku‑nenda okurya, omugasi umwi ˆnaamujaa‑ko ari na ichupa ya arabhasita. Mu‑chupa eyo, gaariga gari‑mo amafuta ga ebhirange na ga obhurambu bhunene muno. Omugasi oyo ˆnaabhutura omunwa gwa ichupa eyo, ˆnaasuka amafuta ago ku‑mutwe gwa Yeesu. 4 Abhaanu abharebhe bhanu bhaariga bhari mu‑nju eyo, nibhabhiyirwa. Nibhaamba okwayikana abheene kwa abheene ati, “Bhamura! Kurwa ki omugasi unu kaanyamura amafuta ga obhurambu bhunene kutyo? 5 Jikabheeye kisi araabha amafuta ganu gakagusiibhwe kwa jipirya nyafu muno,b na okugabhira abhataka.” Nibhagonya muno omugasi wurya.
6 Nawe, Yeesu ˆnaayika ati, “Musige omugasi oyo. Kurwa ki omumunyaasya? Omwene aankorera omurimu gwa ekisi muno. 7 Abhataka bhari aamwi na emwe siku joone. Omutura okubhakorera ja ekisi omwanya gwonegwone gunu omwenda. Nawe anye nitaribha na emwe siku joone. 8 Omugasi unu aakora omusango gunu ari ˆnaatura okukora. Atangata okubhambaga omubhiri gwani amafutac ganu, okunyiraabha orusuku rwa okusiikwa kwani. 9 Ni chimari enibhabhwira ati, woonewoone anu Emisango ja Ekisi inguru yaani jiriraasibhwa ku‑chaaro choone, omusango gwa ekisi gunu omugasi unu aankorera guryayikwa, na abhaanu bharimwichuka.”
Yuuda Isikariyooti keekirisya okuromera Yeesu iniku
10 Niwo Yuuda Isikariyooti, umwi ku‑bheeyigisibhwa ekumi na bhabhiri bha Yeesu, ˆnaagenda ku‑bhakuru bha abhagabhisi, okumuromera iniku, na okubheeresya kutyo abhaja okugwata Yeesu. 11 Bhejire bhoongwa omusango ogwo, nibhakonderwa muno. Nibhamuraga ati abhaja okumuyaana jipirya. Niwo Yuuda Isikariyooti ˆnaamba okuyenja injira ya okutuura Yeesu mu‑mabhoko geebhwe.
Yeesu kaarya ebhiryo bhya Okwambuka na abheeyigisibhwa bhaaye
12 Ku‑rusuku rwa okwamba rwa ichikukuru ya emikaate jinu jitakutuurwa‑mo echifwimbya, nirwo orusuku runu abhaanu bheetaga omwana wa inaama wa Okwambuka,d abheeyigisibhwa bha Yeesu, nibhamubhuusya ati, “Oweenda chije aaki chikwiraabhire ebhiryo bhya Okwambuka?”
13 Niwo Yeesu ˆnaatuma abheeyigisibhwa bhaaye bhabhiri, ˆnaabhabhwira ati, “Mugende mu‑musi. Omuja okubhugana na omumura umwi unu eetwikire echituumo cha amanji, mumuruubhe anu kaarosya. 14 Mu‑nju inu kaja okwingira‑mo, mugende mubhwire omwene inju eyo ati, ‘Omwiyigisya kaasabhwa ucheeresye echisago chinu kaja okuriira‑mo ebhiryo bhya Okwambuka aamwi na abheeyigisibhwa bhaaye.’ 15 Niwo omwene inju kaja okubheeresya echisago echinene mu‑bhutingo. Echisago echo chiri‑mo bhuri chiinu. Muchiiraabhire ebhiryo bhya Okwambuka omwo.” 16 Abheeyigisibhwa bhaaye nibheemuka, nibhagenda mu‑musi gwa Yerusareemu. Nibhasongʼana joone jiri rwa kutyo Yeesu ꞉aabhabhwiriiye, nibheeraabha ebhiryo bhya Okwambuka.e
17 Yejire yaakinga keegoro, Yeesu ˆnaakinga mu‑nju irya aamwi na abheeyigisibhwa bhaaye ekumi na bhabhiri bharya. 18 Omwanya gunu bhaariga nibharya, Yeesu ˆnaayika ati, “Ni chimari enibhabhwira ati, umwi mw‑imwe unu keenyirisya aamwi na anye, arintuura mu‑mabhoko ga abhasoko.” 19 Abheeyigisibhwa bhaaye nibhaamba okusurumbara. Nibhaamba umwiumwi okubhuusya Yeesu ati, “Angu, naanye unu nirikutuura mu‑mabhoko ga abhasoko?”
20 Yeesu ˆnaabhabhwira ati, “Ni umwi mw‑imwe ekumi na bhabhiri, unu keenyirisya mu‑rutubha rumwi na anye. 21 Anye Omwana wa Omuunu niriitwa rwa kutyo jikaamirwe mu‑Bhikaame Ebhyeru. Nawe jiribhona omuunu unu arintuura mu‑mabhoko ga abhasoko! Jikabheeye kisi ku‑muunu oyo araabha ataakeebhuuywe.”
Ebhiryo bhya Raatabhugenyi
22 Omwanya gunu bhaariga nibharya, Yeesu ˆnaagega omukaate, ˆnaasiima Nyamuwanga, ˆnaagubheganya, ˆnaayaana abheeyigisibhwa bhaaye, ˆnaayika ati, “Mugege, murye, gunu nigwo omubhiri gwani.” 23 ˆNaagega omutawo gunu gwariga guri‑mo echifuufu, ˆnaasiima Nyamuwanga, ˆnaabhayaana, bhoone nibhanywa. 24 ˆNaabhabhwira ati, “Echifuufu echo, niyo isagama yaani ya indagano.f Isagama yaani iriitika inguru ya abhaanu bhaafu. 25 Ni chimari enibhabhwira ati, okusookerera reero, nitarinywa echifuufu rindi okukingira ku‑rusuku runu nirinywa echifuufu echiyaaya mu‑bhukama bhwa Nyamuwanga.” 26 Niwo nibhamariisya kwa okwimba orwimbo rwa okukusya Nyamuwanga. Nibheemuka awo, nibhagenda ku‑chiima cha Emijeyituuni.
Yeesu kaayika ati Peetero arimwigaana
27 Omwanya gunu bhaariga bhari ku‑njira, Yeesu ˆnaabhwira abheeyigisibhwa bhaaye ati, “Emwe bhoone omuja okunyiiruka ku‑jinu ejija okukorekana. Jiribha rwa kutyo Nyamuwanga ꞉aayikire mu‑Bhikaame Ebhyeru ati,
‘Niriita omureefi wa jinaama,
na jinaama jaaye jirinyarambuka.’g
28 “Nawe omwanya gunu nirisuuruka, niribhatangatira okugenda Gariraaya.”
29 Niwo Peetero ˆnaamubhwira ati, “Noorwo araabha abheejaasu bhoone bharikusiga, anye nitarikusiga wuri.” 30 Yeesu ˆnaamubhwira ati, “Ni chimari enikubhwira ati, reero, mu‑ngeta inu, rikookorome richaari okukookoroma kabhiri, owubha waanyigaanire kasatu.” 31 Nawe Peetero ˆnaagenderera okukomeeresya ˆnaayikaga ati, “Noorwo araabha jikeendwa nifwe aamwi na awe, anye nitarikwigaana wuri!” Abheeyigisibhwa abhandi bhoone wone nibhaayika kutyokutyo.
Yeesu kaasabhwa Nyamuwanga mw‑isambu rya Getisemaani
32 Niwo nibhakinga mw‑isambu rinu eribhirikirwa ati Getisemaani. Yeesu ˆnaabhwira abheeyigisibhwa bhaaye ati, “Mwinyanje anu, omwanya gunu anye enibha ninsabhwa.” 33 ˆNaagega Peetero, Yakobho na Yowana, ˆnaagenda nabho kura‑wo kutooto, ˆnaamba okusurumbara na okunyaaka muno mu‑mwoyo gwaye. 34 ˆNaabhabhwira ati, “Omwoyo gwani gusurumbaaye muno okukingira okwenda okufwa. Mwinyanje anu, mutengeeje aamwi na anye.”
35 Yeesu ˆnaafogera imbere kutooto, ˆnaagwa bhwifumbike, ˆnaasabhwaga Nyamuwanga ati, jikaturikana, amusoosisye‑wo omwanya gwa ebhinyaasyo. 36 Mw‑isabhwa eryo ꞉aayikire ati, “Abha, Raata, kw‑awe joone ejiturikana. Enikusabhwa unsoosisye‑wo omutawo gunu gwa ebhinyaasyo. Nawe jisige okubha rwa kutyo anye eneenda, tari rwa kutyo awe oweenda.”
37 Ejire aasubha ku‑bheeyigisibhwa bhaaye abhasatu bharya, ˆnaasongʼana bhawongeeye tiro. ˆNaabhuusya Peetero ati, “Simooni, uwongeeye tiro? Angu, waataamibhwa okutengeeja noorwo esaa rimwi?” 38 Niwo ˆnaabhabhwira ati, “Mutengeeje na okusabhwa Nyamuwanga, korereki mwasiga okuregeejwa. Omwoyo ogwenda okwigumiirisya amaregeejo, nawe omubhiri gugotookere.”
39 Ka wone Yeesu ˆneemuka, ˆnaagenda rindi ku‑mbari okusabhwa, ˆnaasubhiirira okusabhwa emisango jiryajirya. 40 Ejire aasubha rwa kabhiri, ˆnaasongʼana abheeyigisibhwa bhaaye bhawongeeye, kwa okubha ameeso geebhwe gaariga geejuuywe tiro. Ejire aamara okubharafya, ꞉bhataabheeye na ogwa okumusubhya.
41 Yeesu ejire aasubha rwa kasatu, ˆnaabhabhwira ati, “Mbawo muchaawongeeye na okwigorora? Mbe jeeya. Omwanya gwa ebhinyaasyo gwakinga. Ringira, anye Omwana wa Omuunu enija okugwatwa na okutuurwa mu‑mabhoko ga abhakosi bha ebhibhiibhi. 42 Mwimuke, chigende. Ringira, omuunu unu kaja okuntuura mu‑mabhoko ga abhasoko ari yeeyi.”
Yeesu kaagwatwa
43 Omwanya gunu Yeesu aariga achaaroma emisango ejo, awoawo Yuuda, umwi ku‑bheeyigisibhwa bhaaye ekumi na bhabhiri, ˆnaakinga na abhaanu bhaafu abha jimbanda na jindungu. Abhaanu abho bhaariga bhatumirwe na abhakuru bha abhagabhisi, abheeyigisya bha ebhiraagiro bhya Muusa na abhakuru bha Abhayawudi.h 44 Yuuda unu kaagenda okumutuura mu‑mabhoko ga abhasoko, atangatire okweresya abhaanu abho echibharikisyo. ꞉Aabhabhwiriiye ati, “Omuunu unu enija okukeesya kwa okumufumbeera, niwe omwene. Mumugwate, mumusire mumwangariiye.”
45 Mbe, Yuuda ejire aakinga arya, ˆnaafogerera Yeesu, ˆnaayika ati, “Omwiyigisya!” Niwo ˆnaamufumbeera. 46 Abhaanu abho nibhagwata Yeesu. 47 Niwo umwi mu‑bhaanu bhanu bhaariga bhari aamwi na Yeesu, ˆnaasoromora bhwangu imbanda yaaye, ˆnaabhuma na okutema‑ko okutwi kwa omugaya wa omugabhisi omukuru.
48 Yeesu ˆnaabhwira abhaanu bha echise echo ati, “Angu, mwaja na jimbanda na jindungu okungwata wuti anye niri musaakusi? 49 Mbawo siku joone naariga niniiyigisya mu‑rubhuga rwa Riyekaru rya Nyamuwanga, nawe ꞉mutaangwatire! Nawe jinu joone jaakorekana, korereki jikuumire jinu ꞉jaakaamirwe mu‑Bhikaame Ebhyeru.”i
50 Mbe, abheeyigisibhwa bhaaye bhoone nibheeruka, nibhasiga Yeesu omwene.
51 Aariga ari‑wo omusigaji umwi unu aariga afwaye isuuka yenyere, aariga ˆnaaruubha Yeesu. Nibharegeeja wone okumugwata, 52 nawe, omwene ˆnaawugunyuka mu‑mabhoko geebhwe, ˆnaabhasigira isuuka yaaye, ˆnaabhirima ari tuyu.
Abhasitaaka Yeesu mw‑ibharaja
53 Niwo abhaanu abho nibhasira Yeesu ku‑mugabhisi omukuru.j Mu‑nju ya omugabhisi oyo, nimwo ꞉bheekumanyiisye abhakuru bhoone bha abhagabhisi, abhakuru bha Abhayawudi na abheeyigisya bha ebhiraagiro bhya Muusa. 54 Omwanya gunu bhaagendaga, Peetero aaruubhiriraga Yeesu ari‑wo kura. ˆNaagenda okukingira ku‑rubhuga rwa inju ya omugabhisi omukuru. ˆNeenyanja okwo aamwi na abhariisi bha omugabhisi omukuru, ˆnaabhiraga omuriro.
55 Abhakuru bha abhagabhisi na ribharaja rikuru ryone rya Abhayawudi,k bhaariga nibheenda obhubhambaasi bhwa okusitaaka Yeesu, korereki bhamuramure na okumwita. Nawe, ꞉bhataabhwene obhubhambaasi bhwonebhwone bhunu ꞉bhwabheeyire. 56 Mu‑bhubhambaasi obhwo, abhaanu bhaafu bhaariga nibhasoosya obhubhambaasi bhwa orubheeyi okusitaaka Yeesu, nawe obhubhambaasi bhwebhwe bhwariga nibhutaasyanya. 57 Abhaanu abhandi abharebhe nibheemereeguru, nibhasoosya obhubhambaasi bhwa orubheeyi, nibhaayikaga ati, 58 “Eswe abheene ꞉choonguuwe omuunu unu ˆnaayikaga ati, ‘Anye nirifumya Riyekaru rya Nyamuwanga rinu ꞉ryombakirwe na abhaanu. Ka wone, niriryumbaka rindi mu‑siku esatu era, eryo ritaryumbakwa na abhaanu.’” 59 Noorwo kutyo, obhubhambaasi bhunu wone bhwariga nibhutaasyanya.
60 Niwo omugabhisi omukuru ˆneemereeguru imbere yeebhwe, ˆnaabhuusya Yeesu ati, “Angu, utakusubhya noorwo omusango gwonegwone ku‑jinu abhaanu bhanu abhakusitaaka?” 61 Nawe Yeesu ˆnaajibhira jibhijibhi, ꞉ataasubhiisye omusango gwonegwone. Omugabhisi omukuru ˆnaagenderera okumubhuusya rindi ati, “Angu, naawe Kirisito, Omwana wa Nyamuwanga unu kaakusibhwa?” 62 Yeesu ˆnaamusubhya ati, “Anye niwe. Emwe murindora anye Omwana wa Omuunu niinyanjire orubhaara rwa ebhuryo rwa Nyamuwanga owa amanaga goone,l niniija niri mu‑meere ga mu‑rwire.”m
63 Niwo omugabhisi omukuru ˆnaatemura emyenda jaaye okweresya ati abhiyiiywe muno, ˆnaayika ati, “Ni bhabhambaasi ki rindi bhanu echeenda? 64 Mweyungwirwa emwe abheene kutyo keefumirisya Nyamuwanga! Woori emwe, omwayika ki?” Ribharaja ryone niriramura ati eeyire okwitwa.
65 Niwo abhandi nibhaamba okumufubhurira amachwata, okumufundikira ameeso na okumubhuma jinguumi, keenu nibhamubhwiraga ati, “Bharikisya niga unu aakubhuma!” Abhariisi bhanu bhaariga bhari arya, nibhamugega, nibhamubhuma.
Peetero keegaana Yeesu
66 Ku‑mwanya ogwo, Peetero aariga eenyanjire mu‑rubhuga, emwaro ya echisago chinu Yeesu aariga ˆnaabhusibhwa‑mo. ˆNaaja omukosi umwi wa echigasi agati ya abhakosi bha omugabhisi omukuru. 67 ˆNaarora Peetero ˆnaabhiraga omuriro, ˆnaamuringira nekeneke. ˆNaamubhwira ati, “Awe wone waariga uri aamwi na Yeesu, Omunajareeti urya.” 68 Nawe Peetero ˆneegaana, ˆnaayikaga ati, “Jinu owaayika, anye nitakujisombookerwa, noorwo na akatyari!” Peetero ˆnaagenda kw‑irango rya orugo. Omwanya guryagurya, rikookorome nirikookoroma.
69 Omukosi wa echigasi wurya ˆnaarora rindi Peetero, ˆnaamba okubhwira abhaanu bhanu bhaariga bheemereeguuyu arya ati, “Noorwo omuunu unu wone ari aamwi nabho.” 70 Nawe, Peetero ˆneegaana rindi.
Katungu katooto okutura, abhaanu bhanu bhaariga bheemereeguuyu arya wone nibhabhwira Peetero ati, “Chimari noorwo awe uri aamwi nabho, kwa okubha awe wone uri Mugariraaya.” 71 Nawe, Peetero aariga ˆneeyendera omwene amabhiibhi na okurayira ˆnaayikaga ati, “Omuunu unu omwayikira anye nitakumumenya!” 72 Awoawo, rikookorome nirikookoroma rwa kabhiri. Awoawo, Peetero ˆneechuka omusango gunu Yeesu ꞉aamubhwiriiye ati, “Rikookorome richaari okukookoroma kabhiri, owubha waanyigaanire kasatu.” Peetero ejire eechuka ogwo, ˆnaarira amasiga mogomogo.