Maryamu kaabhambaga Yeesu amafuta
12
1 Bhunu ꞉jaasigaaye siku etaanu na rumwi okukinga ichikukuru ya Okwambuka, Yeesu ˆnaakinga rindi Bheetaniya, mu‑ruguuyo runu ꞉aasuuruuye Rajaaro okusooka mu‑bhafuuwe. 2 Mbe, mu‑ruguuyo awo nibhamuteekera ebhiryo bhya mu‑ngeta. Maarita ˆnaamufurubhenderaga. Rajaaro aariga ari umwi wa abhaanu bhanu bhaariga bheenyanjire ku‑meeja aamwi na Yeesu. 3 Mbe, Maryamu ˆnaagega ichupa inu gaariga gari‑mo amafuta ga ebhirange na ga obhurambu bhunene muno. ˆNaabhambaga amaguru ga Yeesu amafuta ago, ˆnaamara ˆnaamufwafuuta na jifwiri jaaye. Orurango rwa amafuta ago niruswirana mu‑nju yoone.4 Nawe owumwi wa abheeyigisibhwa bha Yeesu unu aatogwaga ati Yuuda Isikariyooti, omwene niwe kaja okuromera Yeesu iniku, ˆnaayika ati, 5 “Kurwa ki amafuta ago gataakagusiibhwe kwa jidinaari magana gasatu (300),a na okugabhira abhataka?” 6 Yuuda ꞉ataayikire kutyo inguru ya okwigana abhataka, tari kwa okubha aariga ari mwifi. Omwene niwe aabhiikaga isagwa ya jipirya. Ka wone eebhaga bhinu bhyabhiikwaga mu‑sagwa omwo. 7 Mbe, Yeesu ˆnaasubhya Yuuda ati, “Nuumusige, kwa okubha ambambaga amafuta okunyiraabha orusuku rwa okusiikwa kwani. 8 Abhataka bhari na emwe siku joone. Nawe anye nitaribha aamwi na emwe siku joone.”
Abhatangasya bha Abhayawudi abhayenja injira ya okwita Rajaaro
9 Mbe, Abhayawudi bhaafu nibhoongwa ati Yeesu aariga ari awo, nibhagenda okumurora, atari omwene era, tari noorwo okurora Rajaaro unu Yeesu ꞉aasuuruuye okusooka mu‑bhafuuwe. 10 Niwo, abhakuru bha abhagabhisi nibhakora obhutinge bhwa okwita Rajaaro wone, 11 okubha okuruubhana na okusuururwa kwa Rajaaro, Abhayawudi bhaafu ꞉bhaasigeene na abhatangasya bheebhwe, nibheekirisya Yeesu.
Yeesu kaaramirwa Yerusareemu kwa esandabha
12 Mwejo yende‑ko, echise echinene cha abhaanu bhanu ꞉bheejire ku‑chikukuru ya Okwambuka, nibhoongwa ati Yeesu ari ku‑njira kaaja Yerusareemu. 13 Mbe, nibhagega amatabhi ga jikinda, nibhagenda okuramira Yeesu. Nibhaamura obhuraka nibhaayikaga ati,
“Wosaana!b
Ayaanwe amabhando unu kaaja kw‑isiina rya Raatabhugenyi Nyamuwanga!
Ayaanwe amabhando omukama wa Abhayisirayeeri.”c
14 Mbe, Yeesu ˆnaasongʼana echinyara cha isikiri, ˆnaachiriinya‑ko rwa kutyo jikaamirwe mu‑Bhikaame Ebhyeru ati,
15 “Emwe abhaanu bha omusi gwa Sayuuni,d musige okuubhaya!
Ringira, omukama weemwe kaaja kw‑imwe,
kaaja ariinyire ku‑chinyara cha isikiri!”e
16 Omwanya ogwo, abheeyigisibhwa bha Yeesu ꞉bhataasombookeeywe emisango ejo. Nawe Yeesu ejire eengʼengibhwa inguru mw‑ikusyo, niwo nibheechuka ati ejo jaariga jikaamirwe na nikwo kutyo ꞉bhaamukoreeye.
17 Abhaanu bhanu bhaariga bhari na Yeesu omwanya gunu ꞉aabhirikiiye Rajaaro okusooka mu‑fwa na okumusuurura okusooka mu‑bhafuuwe, nibho bhaariga bhaaraasiisye inguru ya emisango jinu Yeesu ꞉aakorere. 18 Kurwa ejo, abhaanu bhaafu ꞉bhoonguuwe emisango ja echibharikisyo chinu ꞉aakorere, nikwo okukora ꞉bhaasookere Yerusareemu nibhagenda okumuramira. 19 Nawe Abhafarisaayo nibhaayikana abheene kwa abheene ati, “Omurora? Chitakutura okukora choonechoone! Ringira, abhaanu bhoone abhamuruubha.”
Yeesu kaasimura inguru ya okufwa kwaye
20 Bhaariga bhari‑wo abhaanu bhanu bhaariga bhatari Bhayawudi mu‑bhaanu bhanu ꞉bhaagendere Yerusareemu okuramya Nyamuwanga mu‑chikukuru ya Okwambuka. 21 Mbe, abhaanu abho nibhagenda ku‑Firipo unu ꞉aasookere Bhetisaayida mu‑mukoowa gwa Gariraaya, nibhamusabhwa, nibhaayika ati, “Mwami, eswe echeenda okubhugana na Yeesu.” 22 Firipo ˆnaagenda okubhwira Andereya emisango ejo, niwo bhoone ku‑bhubhiri bhwebhwe nibhagenda okubhwira Yeesu. 23 Yeesu ˆnaabhasubhya ati, “Omwanya gwakinga gwa Omwana wa Omuunu okukusibhwa. 24 Ni chimari enibhabhwira ati, araabha oruro rwa ingano rukasigwa okusiikirwa mu‑mayaru rwa omuunu unu afuuwe, rutakutura okumera. Nawe araabha rukasiikirwa, orumera na okutwasya amatwasyo maafu. 25 Omuunu woonewoone unu keenda okuwonʼya obhurame bhwaye, aribhusya obhuwanga bhwa akajaanende koone. Nawe omuunu woonewoone unu atakwigana obhurame bhwaye ku‑chaaro kunu, oyo kaabhwangarira okukingira obhuwanga bhwa akajaanende koone. 26 Omuunu woonewoone unu kaankorera emirimu, jeenderwe anduubhe. Ka wone orubhaara rwonerwone anu anye niri, niwo omukosi waani wone kaja okubha. Raata kaja okuyaana echibharo omuunu woonewoone unu kaankorera emirimu.”
27 Neeya Yeesu ˆnaayika ati, “Woori omwoyo gwani guri na obhusurumbaaye bhwafu. Naayike ki? Angu, naayike ati, ‘Raata, enikusabhwa ummonʼye ku‑mwanya gunu gwa ebhinyaasyo?’ Wuri, nitakutura okusabhwa kutyo noorwo na akatyari, kwa okubha niijire ku‑chaaro anu, korereki nibhone ebhinyaasyo ebhyo. 28 Raata Nyamuwanga, yeeresya rikusyo rya risiina ryawo.”
Mbe, obhuraka okusooka mu‑rwire nibhwayika ati, “Neeresya rikusyo rya risiina ryani, ka wone nirigenderera okukora kutyo.” 29 Echise cha abhaanu bhanu bhaariga bheemereeguuyu awo, bhejire bhoongwa obhuraka okusooka mu‑rwire, abhandi nibhaayika ati, “Ribharuka erirunduma,” na abhandi nibhaayika ati, “Maraayika wa Nyamuwanga niwe kaaroma nage.” 30 Nawe Yeesu ˆnaabhwira abhaanu abho ati, “Obhuraka bhunu mwoongwa bhwari bhutari inguru yaani, tari inguru yeemwe. 31 Woori gwakinga omwanya gwa Nyamuwanga okuramura echaaro chinu. Woori gwakinga omwanya gwa Nyamuwanga okubhirimya Syetaani okusooka ku‑bhutungi bhwa ku‑chaaro kunu. 32 Omwanya gunu anye nirisungwa inguru ya echaaro, nirikurura abhaanu bhoone bhaaje kw‑anye.” 33 Yeesu ꞉aayikire kutyo okweresya kutyo arifwa.
34 Mbe, echise cha abhaanu nichisubhya Yeesu ati, “Eswe chisomere mu‑Bhikaame Ebhyeru ati, Kirisito kaarama akajaanende koone.f Mbe, ni kurwa ki owaayika ati jeenderwe Omwana wa Omuunu anungwe inguru? Angu, Omwana wa Omuunu niga?” 35 Yeesu ˆnaabhabhwira ati, “Obhweru bhuchaari aamwi na emwe kwa omwanya mufuyi era. Mugenderere okuribhata mu‑bhweru bhunu omwanya gunu bhuchaari‑wo, korereki echisuute chaasiga okubhayiga, kwa okubha omuunu unu kaaribhata mu‑chisuute, atakumenya anu kaagenda. 36 Omwanya gunu muri na obhweru, mwikirisye obhweru obhwo, korereki mubhe abhaana bha obhweru.” Yeesu ejire aamara okwayika emisango ejo, ˆnaasiga echise echo, ˆnaagenda okwiyibhisa.
Abhayawudi bhaafu abharema okwikirisya Yeesu
37 Noorwo kutyo Yeesu ꞉aakorere ebhibharikisyo bhyafu imbere yeebhwe, nawe abhaanu bhaafu ꞉bhataamwikirisiisye. 38 Ejo ꞉jaabheeye kutyo, korereki gukuumire omusango gunu omuragi Iisaya ꞉aayikire ati,
“Raatabhugenyi, niga unu eekirisya emisango jeeswe?
Ka wone, niga unu ꞉eeresiibhwe amanaga ga Raatabhugenyi?”g
39 ꞉Bhataamwikirisiisye kwa okubha Nyamuwanga ꞉aayikire okutura ku‑muragi Iisaya ati,
40 “Naawofufya ameeso geebhwe,
na okukora emyoyo jeebhwe okubha emikomeeye,
korereki bhaasiga okurora kwa ameeso geebhwe,
na bhaasiga okusombookerwa kwa emyoyo,
bhaasiga okunyindukira
nimbachungura.”h
41 Iisaya ꞉aayikire emisango ejo inguru ya Yeesu, kwa okubha ꞉aarorere rikusyo ryaye.
42 Nawe noorwo, mu‑bhatangasya bha Abhayawudi bhaariga bhari‑mo bhaafu bhanu ꞉bheekirisiisye Yeesu. Nawe ꞉bhataayikire abhwerubhweru ati bhamwikirisya, kwa okubha bhoobhayaga okukindikwa na Abhafarisaayo okusooka mu‑nju ja ameekofyanyo. 43 Abhatangasya abho ꞉bheendere muno okuyaanwa echibharo na abhaanu, okukira okuyaanwa echibharo na Nyamuwanga.
Abhaanu bhariramurwa na emisango jinu Yeesu ꞉aayikire
44 Mbe, Yeesu ˆnaamura obhuraka ˆnaayika ati, “Omuunu unu kaanyikirisya, atakwikirisya anye era, tari keekirisya na unu antumire. 45 Omuunu unu aandora anye, aarora na unu antumire. 46 Anye niijire ku‑chaaro kunu rwa obhweru, korereki bhuri muunu unu kaanyikirisya asige okusigara mu‑chisuute.
47 “Omuunu woonewoone unu kaategeresya emisango jaani, nawe ˆnaarema okujiruubha, anye nitakumuramura, kwa okubha ꞉niteejire ku‑chaaro anu okuramura abhaanu, tari niijire okubhachungura. 48 Omuunu woonewoone unu kaandema anye aamwi na emisango jaani, ari‑wo unu arimuramura. Emisango jinu enaayika nijo jirimuramura ku‑rusuku rwa obhuteero. 49 Anye nitaayika emisango ejo ku‑bhuturo bhwani omwene, tari Raata unu antumire, niwe ꞉aandagiriiye emisango ja okwayika, na kutyo enija okujaayika. 50 Ka wone, nimenyere ati echiraagiro chaaye echiyaana abhaanu obhuwanga bhwa akajaanende koone. Kurwa ejo, anye enaayika era jinu Raata ꞉aandagiriiye okwayika.”