Emisango ja Ekisi ja Yeesu Kirisito
rwa kutyo jikaamirwe na
Ruuka
Obhutangati
Echitabho chinu ꞉chaakaamirwe na Ruuka. Omwene aariga atari wumwi wa abheeyigisibhwa ekumi na bhabhiri bha Yeesu Kirisito. Chitari na emisango myafu inguru ya Ruuka, nawe chimenyere ati, omwene aariga ari muragusi na ꞉aagendere aamwi na Pawuro itumwa mu‑ngʼendo jaaye jindebhe (Abhakorosaayi 4:14; 2 Timoteewo 4:11; Firemooni 24). Ruuka ꞉aakaamiiye omuunu omurebhe unu aariga ˆnaatogwa ati Tewofiiro. Ruuka aariga ˆneenda omuunu oyo, amenye echimari inguru ya obhurame bhwa Yeesu, emirimu jaaye na jinu ꞉jaakorekeene okutura ku‑bhukosi bhwaye. Ogwo nigwo ꞉gwakorere ˆnaakaama echitabho chinu (1:3-4). Ka wone, ꞉aakaamire echitabho echindi, chinu echitogwa ati, Ebhikorwa bhya Jitumwa.
Echitabho cha Ruuka echisimura misango myafu inguru ya obhurame bhwa Yeesu omwanya gunu aariga ari ku‑chaaro kunu. Echisimura kutyo Yeesu ꞉eebhuuywe, na obhukosi bhwaye bhwa okuraasya Emisango ja Ekisi ja obhukama bhwa Nyamuwanga. Ka wone Ruuka ꞉aakaamire inguru ya okufwa kwa Yeesu, na okusuuruka kwaye, na kutyo ꞉aagegerwe okugenda mu‑rwire.