Yeesu kaasuuruka
16
1 Isabhaato yejire yaatura, Maryamu okusooka mu‑musi gwa Magidara, Saroome na Maryamu nyiramwene Yakobho omutooto, nibhagura amafuta ganu agarangirira kisi, bhagende bhabhambage omubhiri gwa Yeesu. 2 Orusuku rwa okwamba rwa obhwoyo katondo, omwanya gunu risuubha ꞉ryambire okuwuruka, nibhagenda ku‑chituuro cha Yeesu. 3 Omwanya gunu bhaariga bhari ku‑njira, nibhaamba okwibhuusya ati, “Woori, niga unu kaja okuchiyiringisisya ribhuyi okusooka ku‑muryango gwa ku‑chituuro?” 4 Nawe omwanya gunu bhaakingire, nibharora ribhuyi rirya riyiringisiibhwe, riri ku‑mbari, noorwo kutyo ryariga riri nene muno.5 Bhejire bheengira mu‑fwa, nibhakanguka okurora omumura umwi unu afwaye omwingiro omureera mweru. Omumura oyo, eenyanjire orubhaara rwa ebhuryo mu‑fwa. 6 Niwo ˆnaabhabhwira ati, “Musige okutangʼangʼara. Enimenya ati omuyenja Yeesu wa Najareeti, unu ꞉aabhambirwe ku‑musarabha. Aasuuruka, atari‑wo anu! Murore anu ꞉bhaamumaamiisye. 7 Woori mugende, mubhwire abheeyigisibhwa bhaaye, chimwichimwi Peetero ati, ‘Aabhatangatira okugenda Gariraaya. Omuja okumusongʼana erya, rwa kutyo ꞉aabhabhwiriiye.’ ”a 8 Niwo nibhaamba okuyarara kwa obhuubha na okuruguura. Nibhawuruka anja okusooka mu‑fwa, nibhabhirimaga. ꞉Bhataabhwiriiye omuunu woonewoone, ꞉bhoobhayire muno.
Yeesu kaasoromokera Maryamu okusooka mu‑musi gwa Magidara
[ 9 Yeesu ejire aasuuruka mu‑ruguru orusuku rwa okwamba rwa obhwoyo, ˆnaasoromokera okwamba Maryamu okusooka mu‑musi gwa Magidara, unu aariga amusoosisye‑ko amasambwa gataanu na gabhiri. 10 Maryamu oyo ˆnaagenda, ˆnaabhwira bhanu bhaariga bhari aamwi na Yeesu, na omwanya ogwo bhaariga nibharira na okusurumbara. 11 Nawe bhejire bhoongwa okusooka ku‑Maryamu ati aarora Yeesu ari muwanga kerechu, ꞉bhateekirisiisye.
Yeesu kaasoromokera abheeyigisibhwa bhabhiri
12 Orusuku ruryarurya, Yeesu ˆnaasoromokera abheeyigisibhwa bhaaye bhabhiri bharya. Abheeyigisibhwa abho bhaariga bhari ku‑njira, nibhagendaga mu‑masambu. Nibhataamibhwa okumumenya, kwa okubha aariga ari na orususo orundi. 13 Bhejire bhaamumenya, nibhasubha okubhwira abheeyigisibhwa abheejaabho, nawe abho ꞉bhateekirisiisye emisango jeebhwe ejo.
Yeesu kaasoromokera abheeyigisibhwa ekumi na umwi
14 Ku‑bhuteero, Yeesu ˆnaasoromokera abheeyigisibhwa bhaaye ekumi na umwi, omwanya gunu bhaariga bhari aamwi, nibharyaga ebhiryo. ˆNaabhagonya inguru ya obhukomeeye bhwa emyoyo jeebhwe, kwa okubha ꞉bhaaremere okwikirisya emisango ja abheejaabho bhanu ꞉bhaarorere Yeesu omwanya gunu ꞉aasuuruuywe okusooka mu‑bhafuuwe. 15 Niwo ˆnaabhabhwira ati, “Mugende mu‑chaaro choone, muraasisye abhaanu bhoone Emisango jaani ja Ekisi. 16 Omuunu woonewoone unu anyikirisiisye na okubhatiijibhwa, arichungurwa. Nawe, omuunu woonewoone unu aremere okunyikirisya, ariramurwa. 17 Abhaanu bhanu bheekirisiisye, abhaja okukora ebhibharikisyo bhinu, bharibhaga nibhasoosya amasambwa ku‑bhaanu kw‑isiina ryani na okwayika mu‑nyaayika inyaaya. 18 Noorwo araabha bhakagwata injoka, amwi bhaakanywa echiinu choonechoone chinu echiita, chitaribhasingaarisya. Bharibhaga nibhatuura amabhoko geebhwe ku‑bharwaye, bhoone bhariwora.”
Yeesu keengʼengya mu‑rwire
19 Raatabhugenyi Yeesu ejire aamara okwayika nabho, Nyamuwanga ˆnaamugega ˆnaamwingʼengya mu‑rwire. ˆNeenyanja orubhaara rwa ebhuryo ku‑Nyamuwanga. 20 Abheeyigisibhwa bhaaye bharya nibhasooka arya. Nibhagenda okuraasya Emisango ja Ekisi woonewoone. Raatabhugenyi Yeesu abhayaanaga amanaga ga okukora ebhibharikisyo. Nikwo kutyo aariga ˆneeresya emisango ejo ati ni ja chimari.]