Yeesu kaasitaakibhwa ku‑Piraato
15
1 Mwejo yende‑ko katondo, ribharaja ryone, nikwo okwayika ati, abhakuru bha abhagabhisi aamwi na abhakuru bha Abhayawudi, na abheeyigisya bha ebhiraagiro bhya Muusa, nibheenyanja echinyanjo. Nibharamura okukora obhutinge korereki bharore kutyo Yeesu kaja okwitwa. Niwo nibhamubhoya, nibhamusira na okumutuura mu‑mabhoko ga Piraato, omutungi wa Echiruumi unu aariga ˆnaatangasya echaaro cha Yuudeya.2 Piraato ˆnaabhuusya Yeesu ati, “Angu, awe naawe omukama oyo wa Abhayawudi?” Yeesu ˆnaamusubhya ati, “Naawe omwayiki.”
3 Abhakuru bha abhagabhisi bhaariga nibhasitaaka Yeesu ati akorere amabhiibhi maafu. 4 Piraato ˆnaamubhuusya rindi, ˆnaayikaga ati, “Utakusubhya omusango gwonegwone? Ringira amabhiibhi maafu ganu abhakusitaaka.” 5 Nawe Yeesu ꞉ataamusubhiisye omusango gwonegwone. Piraato ˆnaaruguura muno.
Piraato kaaramura Yeesu
6 Bhuri muguuga mu‑chikukuru ya Okwambuka, Piraato aariga ari na itungwa ya okwigurira omubhoywa umwi, unu abhaanu bhaasabhwaga eegurirwe. 7 Ku‑mwanya ogwo mw‑ibhoyero omwo bhaariga bhari‑mo abhaanu bhanu ꞉bhaakorere obhugaramusi, na obhugaramusi bhwebhwe ꞉bhwareetereeye obhwiti. Owumwi wa abheeti abho aariga ˆnaatogwa Bharaabha. 8 Mbe, echise echinene cha abhaanu nichigenda ku‑Piraato, nibhamusabhwa abheegurire omubhoywa umwi, rwa kutyo anarirega okubhakorera.
9 Piraato ˆnaabhabhuusya ati, “Woori, omwenda nibheeguririre omukama wa Abhayawudi?” 10 ꞉Aayikire kutyo, kwa okubha ꞉aamenyere ati abhakuru bha abhagabhisi ꞉bhaasirire Yeesu ku‑mwene inguru ya orwiso era. 11 Niwo abhakuru bha abhagabhisi nibhakungirisya echise cha abhaanu bharya ati, bhasabhwe Piraato abheegurire Bharaabha, aasiga okubheegurira Yeesu, nibhamusabhwa kutyo. 12 Piraato ˆnaabhabhuusya rindi ati, “Mbe woori, nikore kutiki omuunu unu omwayika ati ni mukama wa Abhayawudi?” 13 Abhaanu bhoone nibheekirisya kwa okumwaya rindi, nibhaayikaga ati, “Mubhumiirire ku‑musarabha!”
14 Piraato ˆnaabhabhuusya rindi ati, “Akorere chikayo ki?” Nawe abheene nibhoongesya okumwaya, nibhaayikaga ati, “Mubhumiirire ku‑musarabha!”
15 Piraato aariga neenda okukondisya echise cha abhaanu bharya, kutyo ˆnaabheegurira Bharaabha. ˆNaaragirira abhasirikare bhaaye bhabhume Yeesu jijaridi, bheeye bhamugege bhamubhumiirire ku‑musarabha.
Abhasirikare abhasiijaaka Yeesu
16 Abhasirikare bha omutungi wa Echiruumi nibhagega Yeesu, nibhagenda nage mw‑iyumba rya obhutungi rya Piraato. Abhasirikare abhandi wone nibhaaja nibheekofyanya awo. 17 Nibhafwafya Yeesu omwingiro gwa ijambarawu gwa echikama. Nibhasinga orutengya rwa amawa, nibhamufwafya ku‑mutwe. ꞉Bhaakorere kutyo, korereki abhonekane wuti ni mukama, okumuworoomera. 18 Nibhaamba okumukeesya kwa okumusiijaaka nibhaayikaga ati, “Kasinge, omukama wa Abhayawudi!” 19 Bhaariga nibhamubhuma na risekeyanda ku‑mutwe, na okumufubhurira amachwata, bheefukamaga imbere yaaye nibhamuyaanaga echibharo kwa okumusiijaaka. 20 Bhejire bhaamara okumuworoomera, nibhamufuura ingubho ya ijambarawu irya, na okumufwafya rindi emyenda jaaye. Nibhamuwurusya anja, nibheemuka nage okugenda okumubhamba ku‑musarabha.
Yeesu kaabhumiirirwa ku‑musarabha
21 Bhari ku‑njira, nibhabhugana na omuunu unu aariga ˆnaasooka mw‑isambu, ˆnaayitingʼana mu‑musi gurya, aariga ˆnaatogwa Simooni, omwinengo wa mu‑musi gwa Kureene. Omuunu wurya aariga ari semwene Arekijanda na Ruufo. Abhasirikare abho nibhamusinyiirisya okwitwika omusarabha gwa Yeesu. 22 Nibhasira Yeesu anu aatogwaga ati Gorigoota, obhugajuro bhwagwo ni chiyanga cha omuunu. 23 Nibhayaana Yeesu echifuufu chinu bhaariga bhasaasiisye‑mo omuti,a nawe omwene ˆnaarema okuchinywa. 24 Niwo nibhamubhumiirira ku‑musarabha, nibhagabhana emyenda jaaye,b kwa okwitongya,c korereki bharamure ati, niga unu kaja okugega ingubho ki. 25 Omwanya gunu ꞉bhaamubhumiiriiye ku‑musarabha, yaariga iri saa esatu katondo.
26 Nibhatuura akabhaawu ku‑musarabha inguru, kakaamirwe‑ko echikayo chaaye. Kaariga kakaamirwe‑ko ati, “unu ni mukama wa abhayawudi.” 27 ꞉Bhaamubhumiiriiye na abhasaakusi bhabhiri ku‑misarabha, owumwi orubhaara rwa ebhuryo rwa omusarabha gwa Yeesu, na owundi orubhaara rwa ebhumoosi. [ 28 Niwo nibhikuumira Ebhikaame Ebhyeru bhinu ebhyayika ati, “꞉Aabhariiywe aamwi na bhakosi bha ebhibhiibhi.”d]
29 Abhaanu bhanu bhaaturaga ku‑njira awo, bhaariga nibhamufuma enu nibhasingisyaga emitwe jeebhwe nibhaayikaga ati, “Aahaha! Awe unu weeroraga ati ukafumiisye Riyekaru rya Nyamuwanga na okuryumbaka rindi ku‑mwanya gwa siku esatu!e 30 Woori, iwonʼya omwene chirore, iika okusooka ku‑musarabha okwo!”
31 Abhakuru bha abhagabhisi na abheeyigisya bha ebhiraagiro bhya Muusa bhoone aamwi, nibhamusiijaaka nibhaayikaga ati, “꞉Aawoniisye abhandi, nawe atakutura okwiwonʼya omwene! 32 Bhati, omwene ꞉aayikire ati niwe Kirisito, omukama wa Abhayisirayeeri. Mbe neeke okusooka ku‑musarabha, korereki chimurore na okumwikirisya!” Noorwo abhaanu bhanu bhaariga bhabhumiiriiywe ku‑misarabha aamwi nage, abheene wone bhaamufumaga.
Yeesu kaafwa
33 Mbe, okwambira saa etaanu na imwi mu‑mwisi, echisuute nichiingira ku‑chaaro choone okukingira saa etaanu na ena. 34 Niwo saa etaanu na ena, Yeesu ˆnaamura obhuraka ˆnaarira ati, “Eroyi! Eroyi! Raama sabhakitaani?” Obhugajuro bhwa emisango ejo ni ati, “Nyamuwanga waani! Nyamuwanga waani! Kurwa ki waansiga?”f
35 Abhaanu abharebhe mu‑bhanu bhaariga bheemereeguuyu awo, bhejire bhoongwa jinu Yeesu aayikaga, nibhaayika ati, “Bhamura mutegeresye, kaabhirikira omuragi Yeeriya.” 36 Omuunu umwi ˆnaabhirima bhwangu, ˆnaaja na rigaafu, ˆnaariina mu‑sese inu yaariga itari nduru, ˆnaaribhoya kw‑isekeyanda rireera. ˆNaarinamusya inguru, ˆnaayaana Yeesu, korereki anywe. Omuunu oyo ˆnaayika ati, “Siga chirore araabha Yeeriya kaja okumwisya okusooka ku‑musarabha okwo!”
37 Yeesu ˆnaamura obhuraka ˆnaarira, niwo ˆnaafwa. 38 Awoawo, ripajiyag rinu ryariga niryawukanya Ayeeru na Ayeeru a Ayeeru mw‑Iyekaru rya Nyamuwanga niryatika bhibhaara bhibhiri okusooka inguru okukingira emwaro. 39 Omwangarisi wa abhasirikare unu aariga eemereeguuyu ˆnaaragamiraga Yeesu, ejire aarora kutyo Yeesu ꞉aafuuwe, ˆnaayika ati, “Chimari, omuunu unu aariga ari Mwana wa Nyamuwanga!”
40 Bhaariga bhari‑wo abhagasi bhanu bhaariga nibharingira bhari kura‑wo. Mu‑bhagasi abho aariga ari‑mo Maryamu okusooka mu‑musi gwa Magidara, Saroome na Maryamu nyiramwene Yakobho omutooto na Yoose. 41 Abhagasi abho bhaariga nibharuubha Yeesu na okumufurubhendera omwanya gunu aariga ari mu‑mukoowa gwa Gariraaya. Bhaariga bhari‑wo na abhagasi abhandi bhaafu bhanu ꞉bheejire aamwi nage mu‑Yerusareemu.
Jejefu wa Arimataaya kaasiika Yeesu
42 Yejire yaakinga keegoro, kwa okubha orusuku orwo rwariga ruri rusuku rwa okwiraabha inguru ya Isabhaato,h nikwo okwayika ati rusigaaye orusuku rumwi okuyikingira, 43 ˆnaaja omuunu unu aariga ˆnaatogwa Jejefu, omwinengo wa oruguuyo rwa Arimataaya. Aariga ari muunu wa echibharo muno, aariga ari wumwi wa abhatongesi bha mw‑ibharaja rikuru rya Abhayawudi, na aariga ˆnaarindirira obhukama bhwa Nyamuwanga bhuuje. Omwene ˆnaagenda ku‑Piraato kwa ribhaasi, ˆnaasabhwa agege omutumbi gwa Yeesu.
44 Piraato ejire oongwa ati Yeesu aafwa bhwangu kutya, ˆnaaruguura. ˆNaabhirikira omukuru wa abhasirikare, korereki amenye araabha chimari Yeesu aafwa. 45 Omukuru wa abhasirikare ejire aamubhwira ati Yeesu aafwa, Piraato ˆneekirisisya Jejefu agege omutumbi ogwo. 46 Niwo Jejefu ˆnaagura risanda rya obhurambu bhunene. ˆNaagenda ku‑musarabha arya, ˆneesya omutumbi gwa Yeesu, ˆnaamusinga mw‑isanda. ˆNaamusiika mu‑fwa inu ꞉yaasimbirwe ku‑rutare, ˆnaayiringisya ribhuyi rinene na okusibha ku‑muryango gwa iifwa. 47 Maryamu okusooka mu‑musi gwa Magidara, na Maryamu nyiramwene Yakobho omutooto na Yoose, bhoone nibharora anu ꞉bhaamusiikire.