Yeesu kaasuuruka
28
1 Orusuku rwa Isabhaato rwejire rwatura, mu‑ruguru orusuku rwa okwamba rwa obhwoyo, Maryamu okusooka mu‑musi gwa Magidara aamwi na Maryamu owundi wurya, nibhagenda okuringira echituuro.2 Awoawo, niritura rinyamutikima rinene rya echaaro, kwa okubha maraayika wa Raatabhugenyi aariga eekire okusooka mu‑rwire. Maraayika oyo, ˆnaagenda ku‑chituuro, ˆnaayiringisya ribhuyi rirya, ˆnaarituura ku‑mbari, ˆnaariinyanja‑ko. 3 Maraayika oyo, aariga ˆnaangʼarabhya rwa obhweru bhwa orurabhyo na emyenda jaaye jaariga jeerere pee. 4 Abhasirikare bharya bhejire bhaarora ejo, nibhoobhaya muno, nibhayuutuka.
5 Nawe maraayika oyo, ˆnaabhwira abhagasi bharya ati, “Musige okuubhaya! Enimenya ati mwijire okuyenja Yeesu unu ꞉bhaabhumiiriiye ku‑musarabha. 6 Atari‑wo anu! Aasuuruka okusooka mu‑bhafuuwe, rwa kutyo aariga abhabhwiriiye. Muuje murore anu bhaariga bhamumaamiisye. 7 Woori, mugende bhwangu, mubhwire abheeyigisibhwa bhaaye ati, ‘Aasuurukire okusooka mu‑bhafuuwe, na kaabhatangatira okugenda Gariraaya. Eyo niyo omuja okumusongʼana!’a Woori, naamara okwayika jinu naari niijire okubhabhwira!”
8 Niwo abhagasi abho, nibhagenda bhwangu okusooka ku‑fwa awo bhari na obhuyayu na rikonderwa enene. Nibhabhirima okugenda okubhwira abheeyigisibhwa bha Yeesu jinu maraayika oyo aabhabhwira. 9 Mbe, bhunu bhaariga bhachaagenda okubhwira abheeyigisibhwa bhaaye, awoawo Yeesu ˆnaabhugana nabho, ˆnaabhabhwira ati, “Naabhakeesya!” Nibhamujaa‑ko, nibhamuramya kwa okugwata amaguru gaaye. 10 Niwo Yeesu ˆnaabhabhwira ati, “Musige okuubhaya! Mugenda mubhwire abhayiri bhaanib bhagende Gariraaya, eyo niyo abhaja okundora.”
Abhasirikare abhaayika orubheeyi
11 Mbe, bhunu abhagasi abho bhaariga bhachaari ku‑njira nibhagendaga, abhasirikare abharebhe bhanu bhaariga nibharinda echituuro cha Yeesu nibhagenda mu‑musi gwa Yerusareemu. Bhejire bhaakinga, nibheeresya abhakuru bha abhagabhisi bhoone jinu jaakorekana.
12 Niwo abhakuru bha abhagabhisi abho nibhabhugana aamwi na abhakuru bha Abhayawudi, nibhaayikana na okuramura kutyo abhaja okukora. Nibhayaana abhasirikare abho jipirya nyafu, 13 nibhabhabhwira ati, “Araabha omuunu woonewoone akabhabhuusya inguru ya gunu gwakorekana, mwayike ati, ‘Mu‑ngeta bhunu chaari chiwongeeye, abheeyigisibhwa bhaaye bhaaja nibheebha omutumbi gwaye.’ 14 Araabha Piraato akoongwa omusango ogwo, eswe echija okusimura nage, korereki mwasiga okubhona inyaako.” 15 Niwo abhasirikare nibhagega jipirya nibhakora rwa kutyo ꞉bhaabhwiriiywe na abhakuru abho. Emisango jeebhwe ja orubheeyi ejo nijiswirana muno mu‑Bhayawudi na bhachaajitonda okukingira reero.
Amaragiriro ga obhuteero ga Yeesu ku‑bheeyigisibhwa bhaaye
16 Abheeyigisibhwa bha Yeesu ekumi na umwi nibhaja Gariraaya ku‑chiima chinu Yeesu ꞉aabharagiriiye. 17 Eyo niyo ꞉bhaamurorere. Bhejire bhaamurora, nibhamuramya, nawe abhaanu abharebhe agati yeebhwe nibhajira echiitimaato araabha ni Yeesu. 18 Mbe, Yeesu ˆnaabhafogera‑ko, ˆnaabhabhwira ati, “Nyamuwanga anaaye obhuturo bhwone bhwa mu‑rwire na obhwa ku‑chaaro. 19 Mbe, mugende ku‑bhaanu bha amaanga goone mubhakore okubha abheeyigisibhwa bhaani. Mugende mukore kutyo kwa okubhabhatiija kw‑isiina rya Raata, na erya Omwana na erya Mwoyo Mweru, 20 na okubheeyigisya okugwata joone jinu ꞉naabharagiriiye. Mwichuke ati, anye niri aamwi na emwe siku joone, okukingira ku‑bhuteero bhwa echaaro.”