Yoona i

Yoona

Obhutangati bhwa echitabho cha Yoona

Yoona aariga ari muragi wa Nyamuwanga okusookerera mu‑chaaro cha Yisirayeeri. Omwene aariga ari mwana wa Amitaayi wa mu‑ruganda rwa Jaabhurooni. Aariga ari‑wo omwanya gunu Yerobhoowamu wa kabhiri aariga ari mukama wa echaaro cha Yisirayeeri (2 Abhakama 14:25). Kwa omwanya omureera, echaaro cha Yisirayeeri chaariga chitoongwene na echaaro cha Asyuru. Nawe ku‑mwanya ogwoogwo niwo Nyamuwanga ˆnaatuma Yoona okugenda mu‑musi omukuru gwa Asyuru. Omusi ogwo gwatogwaga Ninaawi. Yoona ˆnaarema okugenda, kwa okubha aariga ˆneeganirisya ati, bhakategeresiisye omusango gwa Nyamuwanga na okuta ebhibhiibhi bhyebhwe, Nyamuwanga akabheeresiisye echigongo chaaye. Yoona aariga ˆneenda Nyamuwanga asingaarisye abhaanu bha Ninaawi inguru ya obhujabhi bhwebhwe. Kurwa ejo, ˆnaaregeeja okumwiruka. Nyamuwanga ˆnaamusubhya kwa ebhiruguusyo na okumuragirira rindi. Ku‑mwanya gunu ˆnaagayuka, ˆnaagenda Ninaawi, ˆnaagonya abhaanu, nibhata ebhibhiibhi bhyebhwe. Nyamuwanga ˆnaabheeresya echigongo chaaye.

Omusango omukuru mu‑chitabho chinu, ni ryenda rya Nyamuwanga ku‑bhaanu bhoone. Ka wone, mu‑chitabho chinu echirora obhuturo bhwa Nyamuwanga bhunu bhutakusingwa na echiinu choonechoone na omuunu woonewoone nooro ari muragi waaye. Echirora wone kutyo eriikirisya rya Yoona eritasyanya na erya abhawugi. Yoona aaramyaga Nyamuwanga, nawe abhawugi bhaaramyaga amasambwa. Aamwi na ejo, echirora Yoona ꞉aaremere okugayuka Nyamuwanga, nawe abhawugi ꞉bhaaramiisye Nyamuwanga kwa okurora bhinu ꞉bhyakorekeene ku‑Yoona.

Mu‑chitabho chinu, omusango Raatabhugenyi gugajuuye risiina rya Nyamuwanga. Nyamuwanga ꞉eesweruuye ku‑Bhayisirayeeri kw‑isiina rinu.