Bhoowaaji kaakuumisya omurago gwaye
4
1 Niwo Bhoowaaji ˆnaagenda,
ˆneenyanja kw‑irango rya okwingirira mu‑musi,
orubhaara runu abhaanu bhaariga nibheekumanyisyaga.
Omuunu urya Bhoowaaji ꞉aayikire ati aariga ari wa ayeeyi muno na Erimeereki mu‑ruganda,
ˆnaatura aryaarya.
Bhoowaaji ˆnaamubhirikira ˆnaamubhwira ati,
“Yiija wiyanje anu waasu.”
Omuunu oyo ˆnaaja,
ˆneenyanja.
2 Bhoowaaji ˆnaabhirikira abhakaruka ekumi bha mu‑musi gurya,
korereki bhoone bhabhe abhabhambaasi.
Abhakaruka bharya nibhaaja nibheenyanja.
3 Bhoowaaji ˆnaabhwira omunyaruganda waaye urya ati,
“Nawoomi ꞉aasubhire okusooka mu‑chaaro cha Mowabhu enu aariga eekaaye,
keenda okugusya risambu rinu ryariga riri rya omuyiri weeswe Erimeereki.
4 Enirora ati ni ja ekisi okukubhwira omusango gunu.
Woori araabha oweenda okugega risambu eryo,
waayike imbere ya abhakaruka bhanu,
okubha naawe wa okwamba okutangata okurigombora.
Araabha utakutura umbwire,
kwa okubha anye niri wa kabhiri.”
Omuunu urya ˆnaayika ati,
“Enija okurigombora risambu eryo.”
5 Niwo Bhoowaaji ˆnaasubhya ati,
“Nawe ni kisi umenye ati ukarigega,
owingirira na Ruutu Omumowabhugasi,
korereki risambu eryo risigare mu‑ruganda rwa Marooni.”
6 Omuunu oyo ˆnaayika ati,
“Araabha nikwo kutyo jiri nitakurigombora,
nisige okubhusya omwandu gwa abhaana bhaani.
Anye,
naakusigira awe urigombore,
kwa okubha anye naasingwa.”
7 Jitungwa ja Yisirayeeri mu‑siku jirya yaariga iri ati,
omuunu aakeenda okugura,
amwi okuyingyanya echiinu,
echibharikisyo chaariga chiri omuunu okufuura echiraato chaaye echimwi na okuyaana omugusi.
Abhayisirayeeri bhaariga nibhakora kutyo okweresya ati bheekirisyanya kisikisi.
8 Niwo omuunu urya ˆnaabhwira Bhoowaaji ati,
“Woori naakusigira awe ugombore risambu eryo.”
ˆNaafuura echiraato chaaye echimwi,
ˆnaayaana Bhoowaaji.
9 Bhoowaaji ˆnaabhwira abhakaruka na abhaanu bhoone bhanu bhaariga bhari arya ati,
“Woori emwe mwabha abhabhambaasi reero.
Mwarora kutyo naagega ebhiinu bhyone okusooka ku‑Nawoomi,
bhinu bhyariga bhiri bhya Erimeereki na abhaana bhaaye,
Marooni na Kiriyooni.
10 Ruutu,
Omumowabhugasi unu aariga ari mugasi wa Marooni,
naamwingirira,
aabha omugasi waani,
okwambira reero.
Kutyo nikwo echoongesya ebhiinu mu‑ruganda rwa omufuuwe korereki risiina ryaye risige okusimagira mu‑ruganda rwaye,
aamwi na mu‑ruguuyo runu.
Emwe mwabha abhabhambaasi orusiku rwa reero.”
11 Abhakaruka bharya na abhaanu bhoone bhanu bhaariga bhari arya nibhaayika ati,
“Ni chimari eswe chaabha abhabhambaasi.
Raatabhugenyi asakire omugasi unu,
agende akwibhurire abhaana bhaafu rwa Rayeeri na Reeya abhagasi bha Yakobho,
bhanu orwibhuro rwebhwe ꞉rwaambisiisye riyanga rya Yisirayeeri.
a Ka wone,
ugende ubhe omuunu wa amabhando mu‑ruganda rwa Efuraata na okumenyekana mu‑musi gwa Bhetereyeemu.
12 Abhaana bhanu Raatabhugenyi kaja okukuyaana ku‑mugasi unu,
bhasusane na orwibhuro rwa jaaji weeswe Pereesi,
unu Tamaari ꞉eebhuriiye Yuuda.”
13 Mbe,
Bhoowaaji ˆnaagega Ruutu okubha omugasi waaye.
Raatabhugenyi ˆnaayaana Ruutu amabhando,
Ruutu ˆnaagega inda,
ˆneebhura omwana wa echirume.
14 Abhagasi bha mu‑musi gurya nibhabhwira Nawoomi ati,
“Raatabhugenyi akusibhwe!
Omwene atakusigire ubhurwe omuyiri wa ayeeyi wa okukwangarira!
Omwana wa echirume unu amenyekane mu‑chaaro cha Yisirayeeri.
15 Omwana unu arikusimbiisya na okukwangarira mu‑bhukokoro bhwawo,
kwa okubha eebhurwa na omukamwana waawo unu akwendere muno.
Kw‑awe,
Ruutu ni wa ngʼoryo muno okukira abhaana bhaafu bha echirume.”
16 Niwo Nawoomi ˆnaagega omwana urya,
ˆnaamufumbeera,
ˆnaamba okumwangarira wuti omwana waaye.
17 Abheekasyanya bhaaye bha echigasi nibhaayika ati,
“Omwana wa echirume eebhurwa ewa Nawoomi.”
Nibhatoga omwana oyo risiina Obheedi.
Obheedi oyo ꞉eebhuuye Yeese,
Yeese ˆneebhura Dawudi.
18 Bhanu nibho bha mw‑irango rya Pereesi,
Pereesi ꞉eebhuuye Ejirooni,
19 Ejirooni ˆneebhura Araamu.
Araamu ˆneebhura Aminadaabhu,
20 Aminadaabhu ˆneebhura Nasyoni.
Nasyoni ˆneebhura Sarumooni,
21 Sarumooni ˆneebhura Bhoowaaji.
Bhoowaaji ˆneebhura Obheedi,
22 Obheedi ˆneebhura Yeese.
Yeese ˆneebhura Dawudi,
unu aariga ari omukama wa Abhayisirayeeri.b