Ruutu 3

Ruutu kaasabhwa Bhoowaaji amwangarire

1 Rusiku rumwi, Nawoomi ˆnaabhwira omukamwana waaye Ruutu ati, “Omwana waani, jeenderwe nikurondere omurume wa okukwangarira, korereki ubhone ja ekisi. 2 Bhoowaaji, omwene esambu anu owukoraga emirimu aamwi na abhakosi bhaaye bha echigasi, ni muyiri weeswe wa ayeeyi. Mu‑ngeta ya reero kaabha ˆnaawuura jisyayiri kw‑itare. 3 Woori awe nuugende wooge, wiibhambage amafuta ganu agarangirira kisikisi, ufware omwenda gwawo gwa ekisi, ugende kw‑itare arya. Nawe asige okukumenya ati naawe uri awo. Usige okwamba amare okurya na okunywa. 4 Ugende, urore na okumenyegesya kisi anu kaagenda okumaama, akawongera ugende usuukurure mu‑bhurambirisyo umaame awo. Omwene akarafya kaja okukubhwira gwa okukora.”

5 Ruutu ˆnaamusubhya ati, “Enija okukora joone jinu wambwira.” 6 Niwo ˆnaagenda kw‑itare arya, ˆnaakora bhuri chiinu rwa kutyo ꞉aaragiriiywe na nyaabhuko.

7 Ejire Bhoowaaji aamara okurya na okunywa, ˆnaasandabha. ˆNaagenda ayeeyi na ingʼumo ya jisyayiri, ˆnaawongera. Ruutu ˆnaagenda, ˆneefunya ku‑bhurambirisyo bhwaye, ˆnaamaama ku‑mbari awo. 8 Mu‑bhwire agati, Bhoowaaji ˆnaabhambuka, ˆneefirikya, ˆnaaruguura okusongʼana omugasi amaamire ku‑bhurambirisyo bhwaye. 9 ˆNaamubhuusya ati, “Naawe ga?”

Ruutu ˆnaamusubhya ati, “Naanye Ruutu omukosi waawo. Enisabhwa unswikire isuuka kwa okubha awe naawe owaasu wa ayeeyi, enisabhwa unyangarire.”

10 Bhoowaaji ˆnaayika ati, “Omuyaasya waani, Raatabhugenyi akuyaane amabhando ku‑joone jinu waakora. Obhufura bhwawo bhwa woori mu‑ruganda rweswe bhwakira bhwa ku‑bhwambiro, bhunu ꞉waakoreeye Nawoomi. ꞉Utaabhirimiiye abhasigaji abhataka amwi abhaniibhi, bhakwingirire. 11 Woori nuusige okuubhaya muyaasya waani, enija okukukorera choonechoone chinu oweenda, kwa okubha abhaanu bhoone bha mu‑musi gunu, abhamenya ati, uri na jitungwa ja ekisi. 12 Ni chimari ati, anye niri waanyu wa ayeeyi. Nawe ari‑wo omuunu owundi owaanyu wa ayeeyi muno okukira anye. 13 Woori awe rindirira anu mu‑ngeta inu, bhukacha, araabha akeekirisya okukwingirira, ejibha ja ekisi, nawe akarema, naarayira kw‑isiina rya Raatabhugenyi ati, enija okukwingirira. Woori awe nuuwongere anu okukingira mu‑ruguru.”

14 Niwo Ruutu ˆnaawongera ku‑bhurambirisyo bhwa Bhoowaaji. ˆNaamweja katondo mu‑ruguru, abhaanu bhasige okumurora, kwa okubha Bhoowaaji ꞉ateendere omuunu woonewoone amenye ati, Ruutu aariga ari kw‑itare arya.

15 Bhoowaaji ˆnaamubhwira ati, “Yanja orupande rwawo aasi.” Ruutu ˆnaanja. Bhoowaaji ˆnaamuyaana jisyayiri nijirebherera okwijura amadebhe gabhiri, ˆnaamutwika. Ruutu ˆnaasubha iika.

16 Ejire aakinga iika, nyaabhuko ˆnaamubhuusya ati, “Omuyaasya waani, emisango jaabha kutiki?”

ˆNaamutondera joone jinu Bhoowaaji aamukorera. 17 ˆNaagenderera okwayika ati, “Bhoowaaji aambwira ati, nitakutura okusubha mabhoko jubhagu ku‑mayibhuko, niwo ˆnaanaana jisyayiri jinu, jirebhereeye okwijura amadebhe gabhiri.”

18 Nawoomi ˆnaayika ati, “Woori, awe omuyaasya waani igumiirisya, urore joone jinu ejija okukorekana. Omuunu unu atakuja kujibhira, ni bhusibhusi kaja okukuumisya joone reero.”