Ruutu 2

Ruutu kaabhugana na Bhoowaaji

1 Nawoomi aariga ari na omuyiri wa omurume waaye, risiina ryaye ˆnaatogwaga Bhoowaaji, wa mu‑ruganda rwa Erimeereki. Bhoowaaji oyo aariga ari muniibhi na risiina ryaye ꞉rikumuukire muno.

2 Mbe, rusiku rumwi, Ruutu Omumowabhugasi ˆnaabhwira nyaabhuko ati, “Enisabhwa reero nigende mw‑isambu okuwumbirisya jisyayiri. Eniiganirisya kutyo niraabhone omuunu unu kaja okunyikirisisya nisookererega inyuma mw‑isambu ryaye akabha ˆnaagesa, nibhe niwumbirisyaga.”

Nawoomi ˆnaamubhwira ati, “Ambe, nuugende omuyaasya waani.”

3 Niwo Ruutu ˆnaagenda mu‑masambu eyo, ˆnaamba okuwumbirisya inyuma ya abhagesi, ˆnaabhoojeresyaga ebhyangara bhinu bhaasigaga. Kasi risambu rinu ꞉aasikiriiye‑mo, omwene waaryo aariga ari Bhoowaaji wa mu‑ruganda rwa Erimeereki.

4 Omwanya omutooto okutura, Bhoowaaji ˆnaakinga okusooka Bhetereyeemu. ˆNaakeesya abhagesi, ˆnaayikaga ati, “Raatabhugenyi abhe aamwi na emwe.”

Abheene nibhamusubhya ati, “Awe wone Raatabhugenyi akuyaane amabhando.”

5 Neeya Bhoowaaji ˆnaabhuusya omwangarisi wa abhagesi ati, “Ka, omuyarakaji urya ni muyaasya waaga?”

6 Omwangarisi oyo ˆnaamusubhya ati, “Ni mu‑Mowabhugasi, unu eejire aamwi na Nawoomi okusooka mu‑chaaro cha Mowabhu. 7 Aansabhwa nimwikirisisye aruubhirire abhagesi inyuma yeebhwe korereki aawumbirisyega mu‑mabhubha. Aakora emirimu okwambira katondo okukingira woori kutya, tari ari ˆneesya‑ko omwoyo mu‑chiwuuna omwo, mwanya mufuyi era.”

8 Niwo Bhoowaaji ˆnaabhwira Ruutu ati, “Nuuntegeresye muyaasya waani, okwambira woori, nuusige okugenda okuwumba ebhyangara mw‑isambu rindi, tari nuujega nuuwumba mu‑rinu era. Nuusiranega na abhakosi bha echigasi bhanu. 9 Ringira anu abhagesa, uruubhane nabho. Naabhaganyisye abhasigaji bhanu bhasige okukunyaasya. Na obhwiro bhukakwita, nuugende mu‑suwa unywe amanji ganu abhasigaji abho bhatayire.”

10 Niwo Ruutu ˆneefukamira Bhoowaaji kwa echibharo, ˆnaamubhwira ati, “Naabhona kutiki okwikirisibhwa na awe! Mbawo owunfwira echigongo, enu anye niri omuunu wa riyanga erindi?”

11 Bhoowaaji ˆnaamusubhya ati, “Nibhwiriiywe joone jinu ꞉waakoreeye nyakubhuko, okusookerera omurume waawo ꞉aafwiriiye. Enimenya kutyo ꞉waasigire abheebhusi bhaawo na echaaro chaawo na kutyo wiijire okwikara mu‑bhaanu bhanu utakumenya jitungwa jeebhwe. 12 Raatabhugenyi akuyaane amabhando ku‑joone jinu ukorere! Raatabhugenyi, Nyamuwanga wa Yisirayeeri, unu wirukiiye‑ko, akutuure mu‑mbabha jaaye. Akukorere emisango ja ekisi.”

13 Ruutu ˆnaamusubhya ati, “Omwami waani, wankorera bhwa ekisi muno, nooro kutyo anye nitari omukosi wa emirimu jaawo. Wansimbisya muno na okusimura na anye kisi.”

14 Omwanya gwa okurya nigukinga, Bhoowaaji ˆnaakuma Ruutu, ˆnaamubhwira ati, “Nuuje anu. Inyirisyaga omukaate mu‑chifuufu nuurya.” Ruutu ˆneenyanja aamwi na abhagesi. Bhoowaaji ˆnaamuyaana obhuro obhukarange, ˆnaarya, ˆneeguta obhundi nibhusigara.

15 Ejire Ruutu eemereeguru korereki agenderere okuwumbirisya jisyayiri, Bhoowaaji ˆnaabhwira abhagesi bhaaye ati, “Mumusige agege‑ko nooro ku‑ngʼumo jinooto. Mwasiga okumugonya! 16 Ka wone mumukururire‑ko ebhyangara okusooka ku‑ngʼumo jinene, mumusige era agege‑ko musige okumugaanya.”

17 Mbe Ruutu ˆnaagenderera okubhoojeresya ebhyangara okukingira keegoro. ˆNaabhiwuura, ejire aamara okuwuura ˆnaabhona ridebhe rimwi na obhusaago.

Ruutu kaasubha ku‑Nawoomi

18 Ruutu ˆneetwika jisyayiri ku‑mutwe, ˆnaasubha iika. Ejire aakinga ˆneeresya nyaabhuko indengo inu aawumba. Neeya ˆnaasoosya ebhiryo bhinu aasigasya, ˆnaamuyaana.

19 Niwo nyaabhuko ˆnaamubhuusya ati, “Wabhooja aaki bhyone bhinu? Wari uri mw‑isambu ryaga? Ari na amabhando omuunu unu aakusakira.”

Ruutu ˆnaabhwira nyaabhuko ati, risiina rya omwene esambu kaatogwa Bhoowaaji.

20 Nawoomi ˆnaabhwira omukamwana waaye ati, “Raatabhugenyi ayaane Bhoowaaji amabhando! Nyamuwanga omwene kaakuumisya omurago gwaye ku‑bhawanga na ku‑bhafuuwe!” Neeya ˆnaagenderera okwayika ati, “Omuunu oyo ni wa mu‑ruganda rweswe rwa ayeeyi na ni umwi wa abhaanu bhanu abhakenwa okuchaangarira.”

21 Neeya Ruutu ˆnaagenderera okumubhwira ati, “Ka wone aambwira ati nibhe aamwi na abhakosi bhaaye okukingira okumara orugeso rwone.”

22 Niwo Nawoomi ˆnaabhwira Ruutu ati, “Omwana waani, ni kisi ukore na abhakosi bhaaye bha echigasi. Ukagenda mu‑masambu agandi abhaanu abhatura okukunyaasya.”

23 Kurwa ejo Ruutu ˆnaasiranaga na abhakosi bha echigasi bha Bhoowaaji, ˆnaawumbirisyaga okukingira anu ꞉bhaamariiye okugesa jisyayiri na ingano. Ku‑siku ejo Ruutu aariga eekaaye aamwi na nyaabhuko.