Ruutu 1

Ruutu

1 Kara awo, omwanya gunu abharamusi bhaariga bhatungire echaaro cha Yisirayeeri, omweko ꞉gweengiiye mu‑chaaro omwo. Aariga ari‑mo omuunu umwi okusooka Bhetereyeemu mu‑chaaro cha Yuuda. Omuunu oyo aamwi na omugasi waaye na abhaana bheebhwe bha echirume bhabhiri, nibharamura okuja okwikara kwa omwanya mu‑chaaro cha ebhugenyi Mowabhu. 2 Omuunu oyo aariga ˆnaatogwa Erimeereki, omugasi waaye ˆnaatogwa Nawoomi. Abhaana bheebhwe owumwi aariga ˆnaatogwa Marooni, owundi Kiriyooni. Erimeereki oyo na abhaanu bhaaye bhaariga bhari bha mu‑ruganda rwa Efuraata okusooka Bhetereyeemu mu‑chaaro cha Yuuda. Nibhakinga mu‑chaaro cha Mowabhu, nibheekara omwo.

3 Omwanya gunu bhaariga bhari eyo, Erimeereki omurume wa Nawoomi ˆnaafwa. Nawoomi ˆnaasigara na abhaana bhaaye bhabhiri.

4 Abhasigaji abho nibhatwara abhayarakaji bha Echimowabhu. Owumwi aariga ˆnaatogwa Woripa, owundi ˆnaatogwa Ruutu. Bhejire bhaamara emyaka ekumi bhari Mowabhu eyo, 5 Marooni na Kiriyooni wone nibhafwa. Nawoomi ˆnaafwirwa omurume waaye na abhaana bhaaye bhoone.

Nawoomi kaasubha Bhetereyeemu

6 Omwanya okutura, Nawoomi ˆnoongwa emisango ati Raatabhugenyi aayaana amabhando abhaanu bhaaye bha mu‑chaaro cha Yisirayeeri kwa okubhayaana ebhiryo. Niwo ˆneeganirisya okusooka mu‑chaaro cha Mowabhu okusubha ewaabho, aamwi na abhakamwana bhaaye. 7 ˆNaasooka anu aariga eekaaye omwene na abhakamwana bhaaye, nibhagwata injira okusubha mu‑chaaro cha Yuuda.

8 Niwo Nawoomi ˆnaabhwira abhakamwana bhaaye ati, “Emwe, bhuri muunu asubhe ku‑nyiramwene. Enibhasabhirwa ku‑Raatabhugenyi abhakorere ja ekisi, rwa kutyo emwe mwariga nimunkorera ja ekisi na abharume bheemwe bhanu bharafuuwe. 9 Raatabhugenyi abhayaane amabhando mubhone abharume bha okubhatwara na mukatwarwa mwikare kisi na abharume bheemwe.” Ejire aamara okwayika ejo ˆnaabharaga, ˆnaabhafumbeera.

Niwo abheene nibhaamura obhuraka nibheewuuja okurira, 10 nibhamubhwira ati, “Jitari kutyo maayi! Tari, eswe echigenda aamwi na awe ku‑bhaanu bhaawo.”

11 Niwo Nawoomi ˆnaabheeririra muno, ˆnaayikaga ati, “Musubhe abhaana bhaani. Ni kurwa ki munduubhe? Omwitogera ati, niribhona rindi abhasigaji bha okubheengirira? 12 Musubhe ewaanyu abhaana bhaani, okubha anye naakokooye, nitakutura okutwarwa rindi. Nooro jaakabheeye ati naabhona omurume ingeta ya reero na okwibhura abhaana bha echirume, 13 angu, mukaturire okubharindirira bhakure? Angu, mutaakatwawe na abharume abhandi? Abhaana bhaani, omumenya ati ejo jitakuturikana. Emisango jinu Raatabhugenyi ankoreeye jaandetera obhusungu muno okukira bhunu muri nabhwo emwe.”

14 Ejire aayika ejo, abhakamwana bhaaye nibhaamura obhuraka nibheewuuja okurira rindi. Niwo Woripa ˆnaafumbeera nyaabhuko, ˆnaamuraga na okusubha iika ewaabho, nawe Ruutu, ˆnaamuumira‑ko.

15 Nawoomi ˆnaabhwira Ruutu ati, “Ringira oweejaanyu aasubha ewaabho na ku‑masambwa ga ewaabho, woori awe wone nuusubhe ewaanyu, uruubhane na oweejaanyu.”

16 Nawe Ruutu ˆnaamusubhya ati, “Siga okundembeeja ati nisigane na awe, amwi ati nisige okukuruubhirira!

Okubha woonewoone anu urija,

niwo anye wone nirija,

na anu uriikara,

niwo anye wone niriikara.

Abhayiri bhaawo,

bharibha abhayiri bhaani,

awe owuramya Nyamuwanga,

anye wone niwe niriramya.

17 Anu urifwira,

niwo anye wone nirifwira,

na anu urisiikwa,

niwo anye wone nirisiikwa.

Raatabhugenyi anaane ebhitiibha,

nikeekirisya echiinu choonechoone

chinu chirintaaganya na awe,

tari orufu rwenyere era.”

18 Nawoomi ejire aarora ati Ruutu aturuuye okuruubhana nage, ˆnaasiga okumurembeeja asigane nage.

19 Niwo ku‑bhubhiri bhwebhwe, nibhagenderera na orugendo, nibhakinga Bhetereyeemu. Bhejire bhaakinga eyo, abhaanu bhoone nibharuguura, abhagasi nibhabhuusyanyaga ati, “Chimari unu ni Nawoomi?”

20 Nawoomi ˆnaabhabhwira ati, “Musige okumbirikira rindi ati Nawoomi, mumbirikire ati Maara, okubha Nyamuwanga owa obhuturo bhwone akorere obhurame bhwani bhubhe bhukomeeye turuturu. 21 Nejire naasooka anu naariga niri na ebhiinu bhyafu, nawe woori Raatabhugenyi aansubhya ngaro nyeru. Ni kurwa ki omumbirikira Nawoomi enu Raatabhugenyi owa obhuturo bhwone ambumire na okuntuura mu‑nyaako?”

22 Nikwo kutyo Nawoomi na omukamwana waaye Ruutu Omumowabhugasi ꞉bhaasubhire okusooka mu‑chaaro cha Mowabhu. ꞉Bhaakingire Bhetereyeemu omwanya gunu abhaanu bhaariga nibhaamba okugesa jisyayiri.