Ruutu
Obhutangati
Echitabho chinu chiyaaywe risiina rya Ruutu. Ruutu unu aariga ari mu‑Mowabhugasi. Abhamowabhu bhaariga bhari bheekasyanya bha Abhayisirayeeri. Ejibhonekana ati, omwanya ogwo bhwariga bhuri‑wo obhungwani bhwa ekisi mu‑bhyaro ebhibhiri bhinu. Orugani rwa echitabho chinu, ruri na emisango jinu ꞉jaakorekeene okusookerera omwanya gunu abharamusi bhaariga nibhatunga mu‑Yisirayeeri. Ku‑mwanya ogwo, echaaro cha Abhayisirayeeri chaariga chichaari okwamba okutungwa na abhakama. Abharamusi bhaariga bhari bhaanu bhanu ꞉bhaabhirikiiywe na Nyamuwanga okutangasya Abhayisirayeeri okurwana riremo na okuramura emisango myafu mu‑Bhayisirayeeri (rora echitabho cha Abharamusi 2:10‑19).
Eriyigisyo rinene rinu echisombookerwa mu‑chitabho chinu ni ati, amabhando ga Nyamuwanga ni ga abhaanu bha amaanga goone. Nyamuwanga ꞉aayaaye Ruutu amabhando, ˆnaamukora okubha omwibhusi wa okwamba wa rirango rya abhakama. Omwo nimwo ꞉aasookereeye omukama Dawudi na Yeesu Kirisito. Mu‑chitabho chinu obhufura na echibharo cha Ruutu, mw‑irango rya omurume waaye bhimenyekeene. Obhwa ekisi bhwa echimari ku‑Nyamuwanga okukumanya abhaanu bhaaye omwanya gwa inyaako na okuyaana amanaga bhanu bhaariga nibhanyaaka jiri ku‑bhweru.
Mu‑chitabho chinu, omusango Raatabhugenyi gugajuuye risiina rya Nyamuwanga. Nyamuwanga ꞉eesweruuye ku‑Bhayisirayeeri kw‑isiina rinu.