Yoona
Omuragi Yoona keeruka Raatabhugenyi Nyamuwanga
1
1 Orusiku rumwi, Raatabhugenyi ꞉aabhwiriiye Yoona omwana wa Amitaayi ati, 2 “Iimuka ugende mu‑musi omukuru Ninaawi. Uraasisye abhaanu abhende‑mo, okubha ebhibhiibhi bhyebhwe bhyakanya muno mu‑meeso gaani.”3 Mbe, Yoona ejire oongwa kutyo, ˆnaamba‑ko orugendo, nawe ꞉ataagendere enu ꞉aaragiriiywe. ˆNaaramura okugenda mu‑musi gwa Tarisiisi, korereki eeruke Raatabhugenyi. ˆNaakinga ku‑chigobho cha omusi gwa Yoopa. Ejire aakinga awo, ˆnaasongʼana ingarabha iri yeeyi okwimuka. Niwo ˆnaatobha inawuri, ˆnaariinya mu‑ngarabha okugenda Tarisiisi aamwi na abhawugi, korereki eeruke Raatabhugenyi.
4 Nawe, bhunu bhaagendaga, Raatabhugenyi ˆnaatiimura omuyaga gwa echiiwure mu‑nyanja, amakonjo nigabhuma ingarabha, niirebherera okwatika. 5 Abhawugi bhoone nibhayaya na bhuri umwi weebhwe ˆnaaririra risambwa ryaye. Nibheesa mu‑manji emigugu ja mu‑ngarabha, korereki ingarabha ibhe nyaangu. Omwanya gunu bhaakoraga ejo, Yoona aariga awongeeye tiro sito muno mu‑chiyinda cha ingarabha.
6 Omugofi wa ingarabha eyo ˆnaamujaa‑ko, ˆnaamurafya, ˆnaamubhuusya ati, “Ejibha kutiki ati awe uwongeeye era? Iimuka, usabhwe risambwa ryawo. Amwi eritura okuchifwira echigongo, korereki chisige okusingaarika.”
7 Nibheeya abhawugi nibhaayikana ati, “Woori, chirore echisanyo korereki chiyenje unu aareterera inyaako inu yaachibhona.” Mbe, nibhakora kutyo, echisanyo echo nichibheeresya ati Yoona niwe aayireterera. 8 Niwo nibhaamba okubhuusirisya Yoona ati, “Mbe, woori nuuchibhwire! Ni kurwa ki inyaako inu yaachibhona? Emirimu jaawo ni jiiya? Uri muunu okusooka echaaro ki? Uri muunu wa nyaayika ki?”
9 Yoona ˆnaabhasubhya ati, “Anye niri Muyebhuraniya. Unu eniramya niwe Raatabhugenyi, Nyamuwanga wa mu‑rwire, omubhumbi wa inyanja na echaaro.” 10 ˆNaagenderera okubhabhwira ati, “Eniiruka Raatabhugenyi.”
Abhawugi bhejire bhoongwa ejo, nibhayaya muno. Nibhamubhwira ati, “Awe! Ni kurwa ki waakora omusango gunu?” 11 Ku‑mwanya gwone ogwo, inyanja ꞉yaagendereeye okufurunguka, kurwa ejo nibhabhuusya Yoona ati, “Chikukore kutiki inyanja ichisiiriikire?”
12 Yoona ˆnaabhasubhya ati, “Mumbature, muunyese mu‑nyanja, niwo inyanja eyija okubhasiiriikira. Enisombookerwa ati naanye unu naakora inyaako inu ibhabhone.”
13 Abhawugi abho nibharegeeja okufuga jingayi bhasubhye ingarabha yeebhwe ku‑ngego. Nawe ꞉bhataaturire, kwa okubha inyanja ꞉yaagendereeye okufurunguka muno. 14 Niwo nibheeririra Raatabhugenyi ati, “Ee Raatabhugenyi, echikusabhwa waasiga okuchisingaarisya inguru ya obhurame bhwa omuunu unu. Waasiga okuchirora ati chiri bhaanu bha ebhikayo kwa okwita omuunu unu atari na echibhiibhi. Tari awe Raatabhugenyi, weenda gunu gukorekane.” 15 Niwo nibhabhatura Yoona, nibhamwesa mu‑nyanja, awoawo inyanja nisiiriika. 16 Abhawugi abho bhejire bhaarora ejo, nibhayaana Raatabhugenyi echibharo muno. Nibhasoosya echiyaanwa ku‑Raatabhugenyi, nibharya imuuma nage ya okumukorera emirimu.
17 Mbe, Raatabhugenyi ꞉aaragiriiye iiswi inene imire Yoona bhurara. ˆNaabha mu‑nda ya iiswi eyo siku esatu mu‑ngeta na mu‑mwisi.