Yoona kaasabhwa ari mu‑nda ya iiswi
2
1 Bhunu Yoona aariga ari mu‑nda ya iiswi eyo, ˆnaasabhwa Raatabhugenyi, Nyamuwanga unu aaramyaga, 2 ˆnaayika ati,“Mu‑nyaako yaani inene ꞉naaririiye Raatabhugenyi,
omwene ˆnaanyitabhirwa.
Niri mu‑nyombe ꞉naakusabhirwe, awe Raatabhugenyi,
nuuwungwa risabhwa ryani.
3 Ku‑bhwambiro, ꞉waanyesere mu‑nyanja,
agatigati mu‑bhusibha,
amanji ga induruma niganyiyinda mbaara joone,
amakonjo gaawo goone
na induruma yaawo yoone nibhitura inguru yaani.
4 Neetogeraga ati nikindikirwe kura okusooka kw‑awe,
nisige okurora rindi Riyekaru ryawo eryeru.
5 Inyanja ꞉yaanyiyindire,
nintubhira ninkinga ku‑chitanda cha obhusibha,
amasaaki ga mu‑nyanja niganswikira omutwe.
6 ꞉Neekire ninkinga ku‑bhwambiro bhwa ebhiima,
ninkinga mu‑chaaro chinu jinjigi ja ende‑mo ꞉jeegaaywe inyuma yaani akajaanende.
Nawe awe Raatabhugenyi, Nyamuwanga unu eniramya,
꞉waansoosiisye mu‑ryobho rya orufu.
7 Omwanya gunu omutima gwani gwariga niguyuutuka,
ninkwichuka awe Raatabhugenyi,
na risabhwa ryani ꞉ryakukingiiye mw‑Iyekaru ryawo eryeru.
8 Bhanu abharamya amasusano keenu gateeyire okuramibhwa,
abhabhusya obhwitiriranya bhunu bhukabheeye bhwebhwe.
9 Nawe anye, nirikusoosisya echitambwa
aamwi na okukusiima kwa okukwimbira.
Ka wone, nirikuumisya joone jinu ꞉naariiye imuuma kw‑awe.
Okubha omweruro ogusooka kw‑awe era, awe Raatabhugenyi.”
10 Mbe, Raatabhugenyi ˆnaaragirira iiswi irya itanake Yoona ku‑chaaro. Eyeene wone niikora kutyo.