4
1 Enikuragirira jinu imbere ya Nyamuwanga na imbere ya Kirisito Yeesu, unu ariramura abhaanga na abhafuuwe. Kirisito arikora kutyo aribha aasubha rindi na bhuri muunu arimurora. Ka wone, ariija okutunga rwa omukama. 2 Genderera okuraasya Emisango ja Ekisi ja Nyamuwanga. Ubhe wimaririiye okukora kutyo, omwanya gunu gwiyire amwi gunu guteeyire. Kengyaga, gonyaga na simbagirisyaga abhaanu. Ukore kutyo, kwa okwiyigisya mu‑bhwigumiirisya bhwone. 3 Okubha guriija omwanya gunu abhaanu bharibhaga bhatakutegeresya ameeyigisyo ga echimari. Bharyenda okutegeresya ganu agabhakondisya era na okusora abheeyigisya bha okubheeyigisya ganu abheenda okuungwa. 4 Bharisiga okutegeresya echimari echo na bhariruubha jingani ja abhaanu bha kara jinu jitari na obhugajuro bhwonebhwone. 5 Nawe awe, ikenga ejo joone, igumiirisya mu‑bhinyaasyo, ukore emirimu ja okuraasya Emisango ja Ekisi, ukore ekisi mu‑bhukosi bhwawo bhwone.6 Enikubhwira ejo, kwa okubha omwanya gwani gwa okufwa gwafogeeye. Isagama yaani iri yeeyi okusoosibhwa rwa echoogo ku‑chigabhiro.a 7 Nirwanire riremo kisi, orugendo rwani nirumarire kisi, ka wone eriikirisya ryani nirigwatiriiye ngʼanyangʼanya. 8 Woori nirindirira era okuyaanwa orutengya rwa okurama kwa obhurengeresi. Raatabhugenyi Yeesu, omuramusi wa rirenga, arinaana orusuku runu arisubha. Orutengya orwo nitariyaanwa anye era, tari na abhandi bhoone bhanu abharindirira kwa obhwiro okusubha kwaye.
Risabhwa rya Pawuro ku‑Timoteewo
9 Timoteewo, ikomeesya okunyiija‑ko bhwangu. 10 Okubha Deema ꞉eegombere bhya ku‑chaaro kunu, ˆnaansiga ˆnaabhirimira mu‑musi gwa Tesaroonike. Kireseke ꞉aagendere okukorera Nyamuwanga mu‑mukoowa gwa Garaatiya. Nyabhuriko Tiito ꞉aagendere okumukorera mu‑mukoowa gwa Daramaatiya. 11 Ruuka eenyere era niwe asigaaye aamwi na anye anu okunsakira. Woori, ukaaja enu, gega Maariko, wuuje nage kwa okubha eeyire abhe omusakisi waani mu‑mirimu ja Nyamuwanga. 12 Nawe ꞉naatumire Tukiiko mu‑musi gwa Yefeeso eyo. 13 Ukaaja, undeetere rikabhuuti ryani rinu ꞉naasigire ewa Kaaripo mu‑musi gwa Turoowa. Ka wone wiichuke okundeetera ebhitabho bhyani, chimwichimwi bhirya bhya jinjayi.
14 Arekijanda, omuyeesi wa ebhyuma urya, ꞉aankoreeye emisango jinu ꞉jaawutasiisye omwoyo gwani muno. Nawe Raatabhugenyi Yeesu arimuramura okuruubhana na ebhikorwa bhyaye ebhibhiibhi ebhyo. 15 Awe wone, wiikenge omuunu oyo, kwa okubha ꞉aayajeene muno na Emisango ja Ekisi jinu charaasyaga.
16 Nejire neebhagira mw‑iramuriro omwanya gwa okwamba, ꞉nitaabhwene omuunu noorwo umwi unu ꞉eemereeguuyu orubhaara rwani, nawe bhoone ꞉bhaansigire. Enisabhwa Nyamuwanga abhafwire echigongo ku‑chikorwa echo cha okumbirima. 17 Nawe Raatabhugenyi Yeesu aariga ari aamwi na anye. ꞉Aanaaye amanaga ga okuraasya Emisango joone ja Ekisi, korereki abhaanu bhoone bhanu bhatari Bhayawudi wone bhajuungwe. Ka wone Yeesu ꞉aamonʼyiisye okusooka mu‑rufu, kwa okubha naariga wuti niri mu‑kanwa ka itare. 18 Enimenya ati arigenderera okumonʼya okusooka mu‑bhibhiibhi bhyone na okunyangarira, okukingira aankingye mu‑bhukama bhwaye mu‑rwire.
Raatabhugenyi Yeesu akusibhwe akajaanende koone. Jibhe kutyo.
Emisango ja okuragana
19 Nuukeesye Akiira na omugasi waaye Pirisikab na bhanu bhari iika wa Onesifooro. 20 Erasito ꞉aasigaaye mu‑musi gwa Koriito. Torofiimo aariga arwaye, kurwa ejo ꞉naamusigire mu‑musi gwa Mireeto. 21 Woori, kora bhwangu uuje enu omwanya gwa imbewo guchaari okukinga. Ewubhuro, Puude, Riino na Kirawudiya, aamwi na abheekirisya abhandi bhoone, abhakukeesya.
22 Raatabhugenyi Yeesu abhe aamwi na awe. Obhwitiriranya bhwaye bhubhe aamwi na emwe bhoone.