Yeesu kaaramirwa Yerusareemu kwa esandabha
11
1 Omwanya gunu Yeesu na abheeyigisibhwa bhaaye ꞉bhaarebhereeye Yerusareemu, ayeeyi na jinguuyo ja Bheetifaage na Bheetaniya, ku‑chiima cha Emijeyituuni, Yeesu ˆnaatuma abheeyigisibhwa bhaaye bhabhiri. 2 ˆNaabhabhwira ati, “Mugende mu‑ruguuyo runu ruri imbere yeemwe. Omwanya gunu omwingira omwo, omuja okusongʼana echinyara cha isikiri, chinu chichaari okuriinywa‑ko na omuunu, chisibhikirwe. Mbe muchisibhure muchindeetere anu. 3 Omuunu woonewoone akabhabhuusya ati, ‘Kurwa ki omukora kutyo?’ mumusubhye ati, ‘Raatabhugenyi kaachikena, kaja okuchisubhya anu rindi bhwangwe.’”4 Mbe nibhagenda, nibhasongʼana echinyara cha isikiri chisibhikirwe mw‑irango ku‑mwira mu‑rukondo, nibhachisibhura. 5 Abhaanu abharebhe agati ya bhanu bhaariga bheemereeguuyu arya, nibhabhabhuusya nibhaayikaga ati, “Emwe! Omukora ki awo? Kurwa ki omusibhura echinyara cha isikiri echo?” 6 Abheeyigisibhwa bharya nibhabhasubhya rwa kutyo Yeesu ꞉aabharagiriiye. Mbe abhaanu abho nibhabheekirisisya. 7 Nibhasira echinyara cha isikiri ku‑Yeesu, nibhaanja emyenda jeebhwe inguru yaacho. Yeesu ˆnaariinya, ˆneenyanja ku‑myenda okwo, ˆnaamba orugendo.a 8 Abhaanu bhaafu nibhaanja emyenda jeebhwe ku‑njira, abhandi nibhabhutura amatabhi amatooto mu‑masambu na okuganja ku‑njira okwo. 9 Abhaanu bhanu bhaariga bhatangatiiye Yeesu, na bhanu bhaariga nibhamuruubha inyuma, nibhaamura obhuraka nibhaayikaga ati,
“Wosaana!b
Ayaanwe amabhando unu kaaja kw‑isiina rya Raatabhugenyi Nyamuwanga!c
10 Ayaanwe amabhando Omukama wa obhukama bhwa saaja Dawudi bhunu obhuuja!
Wosaana Nyamuwanga unu ari mu‑rwire!”
11 Omwanya gunu Yeesu ꞉eengiiye Yerusareemu, ꞉aagendere aroobhere era, ˆneengira mw‑Iyekaru rya Nyamuwanga.d ˆNaaringira kisikisi ebhiinu bhyone bhinu bhyariga bhiri‑mo. Nawe kwa okubha yaariga iri keegoro, ˆneemuka, ˆnaagenda Bheetaniya aamwi na abheeyigisibhwa bhaaye ekumi na bhabhiri.
Yeesu keeyiima ritiini rwa echibharikisyo
12 Mwejo yende‑ko, omwanya gunu Yeesu na abheeyigisibhwa bhaaye bhaariga nibhasooka Bheetaniya, nibhasubhaga Yerusareemu, ˆnoongwa omweko. 13 ˆNaarora kura‑wo, riiti rinu eritogwa ati ritiini, ryariga riri na amasya maafu. ˆNaarifogerera arore araabha ryariga riri‑ko amatwasyo. Ejire aakinga arya, ˆnaasongʼana ritari‑ko amatwasyo, riijuuye amasya geenyere, kwa okubha omwanya gwa okunogora amatwasyo gwariga guchaari kukinga. 14 Mbe ˆnaabhwira riiti rirya ati, “Okwambira reero utaritwasya amatwasyo akajaanende!”e Abheeyigisibhwa bhaaye nibhoongwa emisango ejo.
Yeesu kaabhirimya abhasuruuja mw‑Iyekaru rya Nyamuwanga
15 Omwanya gunu ꞉bhaakingire Yerusareemu, Yeesu ˆneengira mu‑rubhuga rwa Riyekaru rya Nyamuwanga. Ejire eengira omwo, ˆnaamba okubhirimya abhaanu bhanu bhaariga nibhagusya na okugura ebhiinu. ˆNaagaramura jimeeja ja bhanu bhaariga nibhayingya jipirya, na ebhitebhe bhya bhanu bhaariga nibhagusya ebhiguuti. 16 Ka wone, ꞉ateekirisiisye omuunu woonewoone, okugega echiinu choonechoone cha okugusya ature nacho ku‑rubhuga rwa Riyekaru.
17 Neeya Yeesu ˆnaabheeyigisya, ˆnaayikaga ati, “Angu, jitakaamirwe mu‑Bhikaame Ebhyeru ati, Nyamuwanga ꞉aayikire ati, ‘Inju yaani iribha inju ya risabhwa ku‑bhaanu bha amaanga goone?’f Nawe emwe, muyikorere okubha isenga ya abhasaakusi!”g
18 Abhakuru bha abhagabhisi, aamwi na abheeyigisya bha ebhiraagiro bhya Muusa bhejire bhoongwa ejo joone, nibhaamba okuyenja injira ya okumwita, kwa okubha bhaariga nibhamuubhaya, nibharoraga kutyo abhaanu bhoone bhaariga nibharuguusibhwa na ameeyigisyo gaaye. 19 Keegoro yejire yaakinga, Yeesu na abheeyigisibhwa bhaaye nibhasooka mu‑musi omwo.
Okusabhwa Nyamuwanga uri na eriikirisya
20 Mwejo yende‑ko katondo, bhejire bhaasubha Yerusareemu, ꞉bhaansongʼeene ritiini rirya riwotokere okwambira ku‑misi jaaryo. 21 Peetero ˆneechuka emisango jinu Yeesu ꞉aayikire, niwo ˆnaabhwira Yeesu ati, “Omwiyigisya, ringira! Ritiini rinu ꞉weeyiimire, ryawotoka!”
22 Yeesu ˆnaabhabhwira ati, “Mwikirisye Nyamuwanga. 23 Ni chimari enibhabhwira ati, araabha omuunu kaabhwira echiima chinu ati, ‘Iiyika anu na okweswa mu‑nyanja,’ ejo ejija okukorekana rwa kutyo aayika. Omuunu oyo aasiga okwitimaata mu‑mwoyo gwaye, abhe na eriikirisya, joone jinu aayika ejija okukorekana. 24 Kurwa ejo enibhabhwira ati, emisango jinu omwirembeeresya nimusabhwa ku‑Nyamuwanga, mwikirisyega ati mwajiramira, murijibhona. 25 Nawe omwanya gunu omusabhwa, mufwire echigongo omuunu woonewoone unu abhakayiiye. Niwo Esomwana weemwe wa mu‑rwire aribhafwira echigongo ebhibhiibhi bhyemwe. [ 26 Nawe araabha emwe mutakufwira echigongo abhandi ebhikayo bhyebhwe, na Esomwana weemwe wa mu‑rwire wone ataribhafwira echigongo ebhibhiibhi bhyemwe.]”
Obhuturo bhwa Yeesu obhubhuusibhwa
27 Yeesu na abheeyigisibhwa bhaaye nibhakinga rindi Yerusareemu. Omwanya gunu bhaariga nibharibhata mu‑rubhuga rwa Riyekaru rya Nyamuwanga, abhakuru bha abhagabhisi, abheeyigisya bha ebhiraagiro bhya Muusa na abhakuru bha Abhayawudi nibharuubha Yeesu. 28 Nibhamubhuusya ati, “Jinu owukora, owujikora ku‑bhuturo ki? Niga unu akuyaaye obhuturo bhwa okukora ejo?”
29 Yeesu ˆnaayika ati, “Anye wone enija okubhabhuusya omusango gumwi. Araabha mukansubhya ogwo, niwo anye wone enija okubhabhwira ati ni bhuturo ki bhunu enikorera emisango jinu. 30 Angu, obhuturo bhwa Yowana Omubhatiija okubhatiija ꞉bhwasookere aaki? ꞉Bhwasookere mu‑rwire ku‑Nyamuwanga amwi ku‑bhaanu? Munsubhye chirore!”
31 Niwo nibhaamba okwayikana abheene era ati, “Araabha chikamubhwira ati, ‘꞉Bhwasookere ku‑Nyamuwanga,’ kaja okuchibhuusya ati, ‘Mbe, kurwa ki ꞉mutaamwikirisiisye?’ 32 Nawe, chikaayika ati, ‘꞉Bhwasookere ku‑bhaanu,’ abhaanu abhaja okuchibhiyirirwa.” Okubha bhaariga nibhoobhaya abhaanu, kwa okubha abhaanu bhoone bhaariga nibheetogera ati Yowana aariga ari muragi katakata. 33 Kurwa ejo, nibhamusubhya ati, “Chitakumenya.” Mbe, Yeesu wone ˆnaabhabhwira ati, “Anye wone nitakubhabhwira ati ni kwa obhuturo ki enikora emisango jinu.”