Okutwarana na okutaana
10
1 Niwo Yeesu na abheeyigisibhwa bhaaye nibhasooka Kaperinaawumu erya, nibhagenda mu‑mukoowa gwa Yuudeya. Nibhatura na okwambuka ku‑ngego ya omusima gwa Yorodaani. Ebhise bhyafu bhya abhaanu bhyamwiyindaga, na aabheeyigisyaga rwa kutyo aariga anarire okukora.2 Mbe, Abhafarisaayo nibhaaja okumuregeeja. Nibhamubhuusya ati, “Angu, ebhiraagiro bhya Muusa ebhiikirisisya omurume okutaana na omugasi waaye?” 3 Yeesu ˆnaabhasubhya ati, “Muusa ꞉aaragiriiye echiraagiro ki?” 4 Nibhamusubhya ati, “Muusa ꞉eekirisiisye ati omurume akaamire omugasi waaye, inyarubha ya obhutaani.”a
5 Yeesu ˆnaabhabhwira ati, “Muusa ꞉aabhakaamiiye echiragiriro echo kwa okubha emyoyo jeemwe ni mikomeeye. 6 Nawe, okusookerera ku‑bhwambiro bhwa obhubhumbi bhwa echaaro, Nyamuwanga ꞉aabhumbire omurume na omugasi,b 7 ‘Ku‑songa eyo, omumura arisiga esemwene na nyiramwene, arigwatana na omugasi waaye. 8 Abho ku‑bhubhiri bhwebhwe bharibha omubhiri gumwi.’c Kurwa ejo, abho bhatari bhabhiri rindi, tari bhaabha omubhiri gumwi. 9 Mbe, abhaanu bhanu Nyamuwanga agwatanyiisye aamwi, omuunu woonewoone aasiga okubhataaganya.”
10 Bhejire bheengira rindi mu‑nju, abheeyigisibhwa bhaaye nibhamubhuusya inguru ya omusango ogwo. 11 Yeesu ˆnaabhabhwira ati, “Omurume woonewoone unu kaataana na omugasi waaye neeya ˆnaatwara omugasi owundi, kaakora obhuromesi. 12 Omugasi unu kaataana na omurume waaye neeya ˆnaatwarwa na omurume owundi, kaakora obhuromerwa.”
Yeesu kaayaana abhaana abharera amabhando
13 Abhaanu bhaariga nibhareetera Yeesu abhaana abharera korereki abhakuunʼye‑ko na okubhasabhirwa amabhando. Nawe abheeyigisibhwa bhaaye nibhagonya abhaanu abho. 14 Yeesu ejire aarora abheeyigisibhwa bhaaye nibhakora kutyo, ˆnaabhiyirwa. ˆNaabhabhwira ati, “Musige abhaana abharera bhaaje kw‑anye, musige okubhagaanya, kwa okubha obhukama bhwa Nyamuwanga ni bhwa abhaanu bhanu bhari rwa abhaana bhanu. 15 Ni chimari enibhabhwira ati, woonewoone unu atakwikirisya obhukama bhwa Nyamuwanga rwa omwana omurera, ataringira mu‑bhukama obhwo noorwo na akatyari.” 16 Niwo ˆnaafumbeera abhaana abho, ˆnaabhakuunʼya ku‑mitwe, ˆnaabhasabhirwa amabhando.
Obhukomeeye bhwa omuniibhi okwingira mu‑bhukama bhwa Nyamuwanga
17 Yeesu ejire aamba orugendo, omuunu umwi ˆnaamubhirimira, ˆnaamwifukamira. ˆNaabhuusya Yeesu ati, “Omwiyigisya wa ekisi, nikore kutiki korereki nibhone obhuwanga bhwa akajaanende koone ku‑chaaro chinu echiija?” 18 Yeesu ˆnaamusubhya ati, “Kurwa ki owaayika ati anye niri wa ekisi? Atari‑wo omuunu woonewoone wa ekisi, tari Nyamuwanga wenyere. 19 Mbe woori, umenyere ebhiraagiro bhya Nyamuwanga bhinu ebhyayika ati, ‘Waasiga okwita, waasiga okukora obhuromesi, waasiga okwibha, waasiga okusoosya obhubhambaasi bhwa orubheeyi, waasiga okujiga, uyaane esomwana na nyokomwana echibharo.’”d 20 Omuunu oyo ˆnaayika ati, “Omwiyigisya, nigayukire ebhiraagiro ebhyo bhyone okwambira ku‑bhwana bhwani.”
21 Yeesu ˆnaamuringira nekeneke, ˆnaamwenda, ˆnaamubhwira ati, “Ugerukiiywe‑wo omusango gumwi. Genda ugusye ebhiinu bhyone bhinu uri nabhyo, jipirya jinu uribhona, ugabhire abhataka. Urikora kutyo uribhiikira ebhibhiikwa mu‑rwire. Urimara uuje, unduubhe.” 22 Nawe, omuunu oyo ejire oongwa omusango ogwo, ˆnaafwa omutima. ˆNaagenda asurumbaaye muno, kwa okubha aariga ari muniibhi muno.
23 Yeesu ˆnaaringira nekeneke abhaanu enu na erya, ˆnaabhwira abheeyigisibhwa bhaaye ati, “Jiribha bhikomeeye muno abhaniibhi okwingira mu‑bhukama bhwa Nyamuwanga.” 24 Abheeyigisibhwa bhaaye nibharuguura inguru ya emisango jaaye. Yeesu ˆnaabhabhwira rindi ati, “Abhaana bhaani, muringire kutyo kukomeeye ku‑bhaanu bhanu abheeyikanya obhuniibhi okwingira mu‑bhukama bhwa Nyamuwanga. 25 Ni bhwangu ingamiya okwiyiganya mw‑iwundu rya isinga okukira omuniibhi okwingira mu‑bhukama bhwa Nyamuwanga!”
26 Abheeyigisibhwa bhaaye nibharuguura muno inguru ya omusango ogwo, nibhamubhuusya ati, “Mbe woori, araabha nikwo kutyo jiri, niga unu kaatura okuchunguka?” 27 Yeesu ˆnaabharoreerera nekeneke, ˆnaabhabhwira ati, “Ku‑bhaanu jitakuturikana, nawe ku‑Nyamuwanga jitari kutyo, kwa okubha ku‑Nyamuwanga joone ejiturikana.”
28 Peetero ˆnaamubhwira ati, “Ringira, eswe chisigire bhuri chiinu, chikuruubhire awe.” 29 Niwo Yeesu ˆnaayika ati, “Ni chimari enibhabhwira ati, omuunu woonewoone unu asigire inju yaaye, amwi abhamura bhaabho, amwi abhayara bhaabho, amwi nyiramwene, amwi esemwene, amwi abhaana bhaaye, amwi amabhwi inguru yaani na inguru ya Emisango ja Ekisi, 30 Nyamuwanga kaja okumuyaana bhyafu muno okukira bhya okwamba. Noorwo ku‑chaaro chinu ariramira jinju, abhamura bhaabho, abhayara bhaabho, bhanyiramwene, abhaana bhaaye na amabhwi. Aamwi na ebhyo bhyone, aribhona ebhinyaasyo. Ku‑chaaro chinu echiija, ariramira obhuwanga bhwa akajaanende koone. 31 Nawe abhaanu bhaafu bhanu bhatangatire woori, bharisingirira. Ka wone, abhaanu bhaafu bhanu bhasingiriiye woori, bharitangata.”
Yeesu kaayika rwa kasatu inguru ya okufwa na okusuuruka kwaye
32 Omwanya gunu Yeesu na abheeyigisibhwa bhaaye bhaariga bhari ku‑njira okugenda Yerusareemu, Yeesu aariga abhatangatiiye. Abheeyigisibhwa bhaaye nibharuguura, na abhaanu abhandi bhanu bhaamuruubhaga, nibhoobhaya. Yeesu ˆnaabhirikira rindi ku‑mbari abheeyigisibhwa bhaaye ekumi na bhabhiri, ˆnaamba okubhabhwira emisango jinu ejija okumubhona. 33 ˆNaayika ati, “Ringira, echigenda Yerusareemu. Eyo niyo, anye Omwana wa Omuunu nirituurwa mu‑mabhoko ga abhakuru bha abhagabhisi na abheeyigisya bha ebhiraagiro bhya Muusa. Abho bharindamura ati niitwe. Ku‑bhuteero, bharintuura mu‑mabhoko ga abhaanu bhanu bhatari Bhayawudi. 34 Abhaanu abho bharinsiijaaka na okunfubhurira amachwata. Bharimbuma na jijaridi na okunyita. Nawe ku‑rusuku rwa kasatu, nirisuuruka.”
Omukuru akorere emirimu bhanu kaatangasya
35 Yakobho na Yowana, abhaana bha Jebhedaayo, nibhagenda ku‑Yeesu nibhamubhwira ati, “Omwiyigisya, echisabhwa uchikorere gwonegwone gunu chirakusabhwe.” 36 Yeesu ˆnaabhabhuusya ati, “Omwenda nibhakorere ki?” 37 Nibhamubhwira ati, “Omwanya gunu uryamba okutunga mw‑ikusyo ryawo, echisabhwa uchiikirisisye chinyanje aamwi na awe, owumwi orubhaara rwa ebhuryo, na owundi orubhaara rwa ebhumoosi.”
38 Yeesu ˆnaabhabhwira ati, “Mutakumenya jinu omusabhwa. Angu, omutura okunyaaka rwa kutyo enija okunyaaka,e amwi omutura okubhatiijibhwa obhubhatiijo bhwa okufwa bhunu enija okubhatiijibhwa?” 39 Nibhamusubhya ati, “Echitura.” Yeesu ˆnaabhabhwira ati, “Chimari, omuja okunyaaka rwa kutyo anye enija okunyaaka, na muribhatiijwa rwa kutyo anye enija okubhatiijwa. 40 Nawe, omuunu okwinyanja aamwi na anye, orubhaara rwani rwa ebhuryo amwi rwa ebhumoosi, ogwo gutari murimu gwani okubheekirisisya. Jimbaara ejo ni ja bhanu Nyamuwanga aamarire okwiraabhira.”
41 Abheeyigisibhwa bhaaye abhandi ekumi bhejire bhoongwa ejo, nibhaamba okubhiyirirwa Yakobho na Yowana. 42 Niwo Yeesu ˆnaabhabhirikira ˆnaabhabhwira ati, “Omumenya ati abhatangasya bha amaanga abhatunga abhaanu bheebhwe kwa amanaga, ka wone abhakuru bheebhwe abhabhakosya emirimu kwa amanaga. 43 Nawe jaasiga okubha kutyo kw‑imwe. Omuunu woonewoone unu keenda okubha omukuru agati yeemwe, keendwa abhe omukosi weemwe. 44 Omuunu unu keenda okubha wa okwamba agati yeemwe, keendwa abhe omugaya wa bhoone. 45 Noorwo anye Omwana wa Omuunu, ꞉niteejire okukorerwa, tari ꞉neejire okukorera emirimu abhaanu na okusoosya obhurame bhwani, korereki neerure abhaanu bhaafu.”
Yeesu kaawosya omuwofu
46 Mbe, nibhakinga mu‑musi gwa Yeeriko. Omwanya gunu Yeesu na abheeyigisibhwa bhaaye na echise echinene cha abhaanu ꞉bhaasookere mu‑musi gwa Yeeriko, omuunu umwi aariga eenyanjire ku‑mbarimbari ya injira, risiina ryaye Bhaatimaayo, omwana wa Timaayo. Omuunu oyo aariga ari muwofu, ˆnaasabhiirisyaga jipirya. 47 Ejire oongwa ati Yeesu wa Najareeti kaatura awo, ˆnaamba okwamura obhuraka, ˆnaayikaga ati, “Yeesu, Omwana wa Dawudi,f enisabhwa unfwire echigongo!” 48 Abhaanu bhaafu bhaariga nibhamugonya korereki ajibhire. Nawe omwene ˆnaagenderera okwamura obhuraka ˆnaayikaga ati, “Awe Omwana wa Dawudi, unfwire echigongo!”
49 Niwo Yeesu ˆneemereeguru ˆnaayika ati, “Mumubhirikire aaje anu.” Nibhabhirikira omuwofu wurya, nibhamubhwira ati, “Siiriika, imereeguru! Kaakubhirikira.” 50 Omwene ˆneesa omwambaro gwaye aasi, ˆneemereeguru bhwangubhwangu, ˆnaagenda ku‑Yeesu.
51 Yeesu ˆnaamubhuusya ati, “Oweenda nikukorere ki?” Omuwofu oyo ˆnaamusubhya ati, “Omwiyigisya, eneenda okurora.”
52 Yeesu ˆnaamubhwira ati, “Waawosibhwa ku‑songa ya eriikirisya ryawo. Genda iika.” Awoawo, omuunu oyo ˆnaamba okurora, niwo ˆnaamuruubha ku‑njira.