9
1 Yeesu ˆnaagenderera okwayika ati, “Ni chimari enibhabhwira ati, mu‑bhaanu bhanu bheemereeguuyu anu bhari‑wo abhandi bhanu bhatarifwa, bhachaari okurora obhukama bhwa Nyamuwanga nibhuuja na amanaga.”
Obhukama bhwa Nyamuwanga obhubhonekana ku‑Yeesu
2 Jejire jaatura siku etaanu na rumwi, Yeesu ˆnaagega Peetero, Yakobho na Yowana, ˆnaariinya nabho mu‑chiima echireera, anu abhaanu bhaariga bhatari. Nibharora Yeesu ˆnaayinduka orususo rwaye imbere yeebhwe. 3 Emyenda jaaye nijingʼarabhya muno. Nijibha myeru pee jitari‑wo emyenda joonejoone ku‑chaaro anu jinu jirafurirwe nijeera rwa ejo. 4 Yeeriya na Muusa, abharagi bha kara, nibhabhasoromokera, nibhasimuraga na Yeesu.
5 Peetero ˆnaabhwira Yeesu ati, “Omwiyigisya, ni kisi eswe okubha anu. Chuumbake ebhiwuuna bhisatu, echimwi chibhe chaawo, echimwi chibhe cha Muusa na echindi chibhe cha Yeeriya.” 6 ꞉Aayikire jinu aariga atakumenya, kwa okubha omwene na abheejaabho ꞉bhoobhayire muno.
7 Niwo eriire niriija, niribhafundikira. Nibhoongwa obhuraka okusooka mu‑riire eryo, nibhwayika ati, “Unu niwe Omwana waani omwendwa. Mumutegeresyega!” 8 Awoawo abheeyigisibhwa bharya nibhamagamaga enu na eyi, ꞉bhataarorere omuunu owundi, tari Yeesu eenyere.
9 Omwanya gunu bhaariga nibheeka okusooka ku‑chiima chirya, Yeesu ˆnaabharagirira ati bhaasiga okubhwira omuunu woonewoone jinu bhaarora, okukingira omwanya gunu Omwana wa Omuunu aribhaga asuurukire okusooka mu‑bhafuuwe. 10 Abheeyigisibhwa abho nibhagwata omusango ogwo, nawe nibhabhuusyanyaga abheene kwa abheene ati, “Okusuuruka okusooka mu‑bhafuuwe obhugajuro bhwagwo niki?”
11 Nibhabhuusya Yeesu ati, “Kurwa ki abheeyigisya bha ebhiraagiro bhya Muusa abhaayika ati, jeenderwe Yeeriya atangatire Kirisito okuuja?”a 12 Omwene ˆnaabhasubhya ati, “Chimari Yeeriya aritangata okuuja, korereki achumechume emisango joone. Aamwi na ejo, kurwa ki jikaamirwe mu‑Bhikaame Ebhyeru ati Omwana wa Omuunu arinyaasibhwa muno na okugaywa? 13 Nawe enibhabhwira ati, chimari Yeeriyab areejire, abheene nibhamukorera emibhiibhi joone jinu bheendaga,c rwa kutyo ꞉jaakaamirwe inguru yaaye.”
Yeesu kaawosya omwana unu awungirwe risambwa
14 Yeesu, Peetero, Yowana na Yakobho bhejire bhaakinga ku‑bheeyigisibhwa abhandi bharya, nibhasongʼana echise echinene cha abhaanu chibheeyindire. Abheeyigisya bha ebhiraagiro bhya Muusa bhaariga nibhabhambasyanya na abheeyigisibhwa abhandi abho. 15 Echise chirya chejire chaarora Yeesu, choone nichiruguura muno. Awoawo nibhamubhirimira, nibhamukeesya.
16 Yeesu ˆnaabhwira abheeyigisibhwa ati, “Omubhambasyanya ki na abheeyigisya bha ebhiraagiro bhya Muusa?”
17 Omuunu umwi mu‑chise echo ˆnaamusubhya ati, “Omwiyigisya, naakureetera omwana waani. Awungirwe risambwa rinu rimukorere okubha omujibhi. 18 Kwiya kaafu erimugwata, nirimugaragasya aasi, kaafukumba rifiro mu‑kanwa, na okuguguna ameeno na okuumagana omubhiri gwone. ꞉Naasabhirwe abheeyigisibhwa bhaawo ati bhamusoosye‑ko risambwa eryo, nawe ꞉bhaataamiibhwe.”
19 Yeesu ˆnaayika ati, “Emwe muri rwibhuro runu rutari na eriikirisya, niribha na emwe okukingira rusuku ri? Niribheegumiirisya okukingira rusuku ri? Mureete omwana oyo anu.”
20 Nibhamureeta ku‑Yeesu. Nawe risambwa ryejire ryarora Yeesu, awoawo nirireterera omwana oyo okugwa echitwe. ˆNaagwa aasi, ˆneegaragasya na okufukumba rifiro mu‑kanwa. 21 Yeesu ˆnaabhuusya esemwene omwana oyo ati, “Ebhinyaasyo bhinu bhyamwambire ri?” Esemwene ˆnaayika ati, “Okwambira ku‑bhwana bhwaye. 22 Kwiya kaafu risambwa eryo erimugwisya mu‑muriro na mu‑manji korereki rimwite. Woori araabha owutura okukora gwonegwone, uchifwire echigongo, uchisakire.”
23 Yeesu ˆnaamusubhya ati, “Kurwa ki owaayika ati, ‘Araabha owutura?’ Joone ejiturikana ku‑muunu unu keekirisya Nyamuwanga.” 24 Awoawo, esemwene omwana oyo ˆnaamura obhuraka ˆnaarira ˆnaayikaga ati, “Eniikirisya! Nawe eriikirisya ryani ritakwiya, nuunsakire nibhe na eriikirisya.”
25 Yeesu ejire aarora ati echise cha abhaanu echiiyongesya okumwiyinda, ˆnaagonya risambwa rirya, ˆnaayika ati, “Awe risambwa! Naawe owukora omwana unu okubha omujibhi na owa amatwi. Woori enikugonya, sooka mu‑mwana unu, na waasiga okuregeeja okumwingira rindi!” 26 Niwo risambwa eryo nirimwaya muno, nirigwisya omwana oyo aasi, nirimureterera okugwa echitwe, nirimusooka‑mo. Omwana oyo ˆnaabha wuti afuuwe, abhaanu bhaafu arya nibhaayika ati, “Aafwa!” 27 Nawe, Yeesu ˆnaamugwata okubhoko, ˆnaamwimusya, omwana oyo ˆneemereeguru.
28 Mbe, omwanya gunu Yeesu ꞉eengiiye mu‑nju, abheeyigisibhwa bhaaye nibhamujaa‑ko bhwitebhe, nibhamubhuusya ati, “Kurwa ki eswe ꞉chaataamiibhwe okumusoosya‑ko risambwa?” 29 Yeesu ˆnaabhabhwira ati, “Risambwa rya imbaga inu ritakutura okusoosibhwa‑ko tari kwa okusabhwa.”d
Yeesu kaayika rindi inguru ya okufwa na okusuuruka kwaye
30 Yeesu na abheeyigisibhwa bhaaye nibhasooka eyo, nibhatura agatigati ya omukoowa gwa Gariraaya. Yeesu ꞉ateendere abhaanu bhamenye ati ari awo, 31 kwa okubha aariga ˆneeyigisya abheeyigisibhwa bhaaye. ˆNaabhabhwira ati, “Anye Omwana wa Omuunu, nirituurwa mu‑mabhoko ga abhaanu na bhariinyita. Nawe ku‑rusuku rwa kasatu okusookerera okufwa kwani, Nyamuwanga arinsuurura.” 32 Abheeyigisibhwa bhaaye ꞉bhataasombookeeywe gunu aariga ˆnaayika, nawe nibhoobhaya okumubhuusya.
Obhukuru bhwa echimari
33 Yeesu na abheeyigisibhwa bhaaye nibhakinga mu‑musi gwa Kaperinaawumu. Bhejire bheengira mu‑nju, Yeesu ˆnaabhabhuusya ati, “Ni chiinu ki chinu muri nimubhambasyanya ku‑njira?” 34 Niwo abheeyigisibhwa bhaaye nibhajibhira jibhijibhi, kwa okubha bhaariga nibhabhambasyanya abheene kwa abheene ku‑njira ati, niga unu ari mukuru mu‑bheene. 35 Yeesu ˆneenyanja aasi, ˆnaabhirikira abheeyigisibhwa bhaaye ekumi na bhabhiri. ˆNaabhabhwira ati, “Omuunu woonewoone unu keenda okubha omukuru, eenderwe eekeeye okukira bhoone, na abhe omukosi wa bhoone.”
36 ˆNaagega omwana omurera, ˆnaamwimereegusyu agatigati yeebhwe. ˆNaamufumbeera, ˆnaabhabhwira ati, 37 “Omuunu woonewoone unu kaakuma omwana rwa unu kw‑isiina ryani, kaabha aankumire. Ka wone, omuunu unu kaankuma, kaabha atakumire anye era, tari kaabha akumire Nyamuwanga unu ꞉aantumire.”
Omuunu unu atakurema Yeesu ari aamwi nage
38 Yowana ˆnaabhwira Yeesu ati, “Omwiyigisya, ꞉chaarorere omuunu ˆnaasoosya amasambwa okusooka ku‑bhaanu kw‑isiina ryawo. Eswe nichimugaanya, kwa okubha atari aamwi na eswe.” 39 Nawe Yeesu ˆnaayika ati, “Musige okugaanya omuunu rwa oyo. Atari‑wo omuunu unu kaakora echiruguusyo kw‑isiina ryani, ˆnaamara ˆnaanyayika kubhiibhi. 40 Omuunu unu atakuchiyingirira, ari rubhaara rweswe. 41 Omuunu woonewoone unu aribhayaana omutawo gwa amanji ga okunywa isonga iri ati emwe muri bhaanu bha Kirisito, ni chimari enibhabhwira ati, Nyamuwanga atarisiga okuyaana omuunu oyo echiyaanwa chaaye.”
Obhukengya inguru ya okureterera abhaanu okukora ebhibhiibhi
42 Yeesu ˆnaagenderera okwayika ati, “Unu ariyabhya owumwi wa abhatooto bhanu abhanyikirisya, ˆnaareterera akore ebhibhiibhi, jikabheeye ja kisi omuunu oyo abhoyerwe mu‑bhicha orubhuyi runene rwa okuseera‑ko na okweswa mu‑nyanja. 43 Ka wone, araabha okubhoko kwawo nikwo okukureterera okukora ebhibhiibhi, kuteme‑ko. Ni akiri wingire mu‑bhuwanga bhwa akajaanende koone utari‑ko okubhoko okumwi, okukira okubha na amabhoko goone gabhiri na okugenda mu‑muriro gwa akajaanende koone. [ 44 Amanyoroosi geende‑mo gatakufwa, na omuriro gwende‑mo gutakusima.] 45 Ka wone, araabha okuguru kwawo nikwo okukureterera okukora ebhibhiibhi, kuteme‑ko. Ni akiri wingire mu‑bhuwanga bhwa akajaanende koone utari‑ko okuguru okumwi, okukira okubha na amaguru goone gabhiri, nuweeswa mu‑muriro gwa akajaanende koone. [ 46 Omwo nimwo amanyoroosi geende‑mo gatakufwa, na omuriro gwende‑mo gutakusima.] 47 Ka wone, eriiso ryawo rikakureterera okukora echibhiibhi, nuuriiye‑mo. Ni akiri wingire mu‑bhukama bhwa Nyamuwanga uri na isongo, okukira okubha na ameeso goone gabhiri na okweswa mu‑muriro gwa akajaanende koone. 48 Omwo nimwo amanyoroosi geende‑mo gatakufwa, na omuriro gwende‑mo gutakusima. 49 Okubha Nyamuwanga aritusya bhuri muunu mu‑bhinyaasyo bhinu bhiri rwa omuriro, rwa kutyo inyama ya echoogo yaariga nirungwa‑mo omuunyu ichaari okwochiibhwa.e 50 Omuunyu ni gwa kisi, nawe gukabhurwa obhusambaaruke, ogutura kutiki okubhona obhusambaaruke bhwagwo rindi? Emwe mubhe rwa omuunyu gunu gusambaarukire, mubhe na omurembe abheene kwa abheene.”