Yeesu kaariisya abhaanu bhiwumbi bhina
8
1 Ku‑mwanya ogwo, echise echindi echinene cha abhaanu nichiikofyanya rindi. Jisiku ndebhe jejire jaatura, abhaanu abho nibhabhurwa ebhiryo. Niwo Yeesu ˆnaabhirikira abheeyigisibhwa bhaaye, ˆnaabhabhwira ati, 2 “Enifwira echigongo abhaanu bhanu, kwa okubha cheekaaye nabho masuubha gasatu, na bhatari na ebhiryo bhyonebhyone. 3 Araabha nikabharaga nibhasubha mu‑misi jeebhwe keenu bhari na omweko, abhatura okuyuutukira ku‑njira, ka abhandi bhasookere kura.”4 Abheeyigisibhwa bhaaye nibhamusubhya ati, “Anu chiri mw‑ibhara, atari‑wo omuunu unu kaatura okubhona emikaate ja okwiya abhaanu bhanu bhoone.” 5 Yeesu ˆnaabhabhuusya ati, “Muri na emikaate eringa?” Nibhamusubhya ati, “Chiri na emikaate etaanu na ebhiri.”
6 Yeesu ˆnaaragirira abhaanu bhoone bheenyanje aasi. ˆNaagega emikaate etaanu na ebhiri jirya, ˆnaasiima Nyamuwanga, ˆnaajibheganya. ˆNaayaana abheeyigisibhwa bhaaye, bhagabhire abhaanu. 7 Ka wone, bhaariga bhari na ebhiswi bhityari era. Yeesu ˆnaasiima Nyamuwanga, ˆnaaragirira abheeyigisibhwa bhaaye ati, wone bhabhigabhire abhaanu.
8 Abhaanu nibharya, nibheeguta. Abheeyigisibhwa bhaaye nibhakofya ebhibhaara bhinu ꞉bhyasigaaye, nibheejusya ebhitukuru bhitaanu na bhibhiri. 9 Abhaanu bhanu ꞉bhaariiye ebhiryo bhirya bhaariga nibhakinga wuti bhiwumbi bhina (4,000). Yeesu ˆnaaraga abhaanu bharya, nibhasubha mu‑misi jeebhwe. 10 Awoawo ˆneengira mu‑ngama na abheeyigisibhwa bhaaye, nibhagenda mu‑chaaro cha Daarimanuta.
Abhafarisaayo abheenda echibharikisyo
11 Yeesu na abheeyigisibhwa bhaaye bhejire bhaakinga Daarimanuta, Abhafarisaayo nibhamuuja‑ko. Nibhaamba okubhambasyanya nage korereki bhamuteganye. Bhaariga nibheenda abheeresye echibharikisyo chinu echeeresya ati asookere ku‑Nyamuwanga.
12 Yeesu ˆnaasurumbara mu‑mwoyo gwaye, ˆnaabhabhwira ati, “Kurwa ki emwe abhaanu bha orwibhuro runu omwenda okurora echibharikisyo? Ni chimari enibhabhwira ati, nitakuja okubheeresya echibharikisyo choonechoone.” 13 ˆNaabhasiga, ˆneengira rindi mu‑ngama aamwi na abheeyigisibhwa bhaaye. Nibhaamba orugendo rwa okwambuka inyanja.
Emisango emibhiibhi ja Abhafarisaayo na eja Yeroode Atipaasi
14 Abheeyigisibhwa bha Yeesu bhaariga bharabhiiywe okugega emikaate ja okubheeya. Bhaariga bhari na omukaate gumwi era mu‑ngama. 15 Yeesu ˆnaabhakengya ati, “Mwiyangarire muno na okwikenga echifwimbyaa cha Abhafarisaayo na echa Yeroode.”
16 Abheeyigisibhwa bhaaye nibhaamba okwayikana abheene kwa abheene ati, “Kaayika kutyo, kwa okubha chitari na emikaate.” 17 Yeesu ꞉aamenyere joone jinu bhaariga nibhaayikana, ˆnaabhabhuusya ati, “Kurwa ki omwayikana ati, mutari na emikaate? Muchaari okumenya noorwo okusombookerwa echiinu? Mbawo emyoyo jeemwe ni mikomeeye? 18 Emwe muri na ameeso, nawe mutakurora echiinu? Muri na amatwi, nawe mutakuungwa echiinu? Woori, mbawo mutakwichuka? 19 Omwanya gunu ꞉naabheganyiisye emikaate etaanu jirya na okuyaana abhaanu bhiwumbi bhitaanu (5,000), ꞉mwejusiisye ebhitukuru bhiringa bhya ebhibhaara bhinu ꞉bhyasigaaye?” Nibhamusubhya ati, “Ekumi na bhibhiri.” 20 “Omwanya gunu ꞉naabheganyiisye emikaate etaanu na ebhiri na okuyaana abhaanu bhiwumbi bhina (4,000), ꞉mwejusiisye ebhitukuru bhiringa bhya ebhibhaara bhinu ꞉bhyasigaaye?” Nibhamusubhya ati, “Bhitaanu na bhibhiri.”
21 Neeya ˆnaabhabhuusya ati, “Noorwo woori muchaari kusombookerwa?”
Yeesu kaawosya omuwofu
22 Yeesu na abheeyigisibhwa bhaaye nibhakinga mu‑ruguuyo rwa Bhetisaayida. Abhaanu abharebhe nibhamureetera omuwofu umwi. Nibheerembeeresya Yeesu amukuunʼye‑ko na okumuwosya. 23 Yeesu ˆnaagwata omuwofu oyo okubhoko, ˆnaagenda nage anja ya oruguuyo rurya. ˆNaamufubhurira amachwata ku‑meeso, ˆnaatuura amabhoko ku‑meeso ga omuwofu oyo, ˆnaamubhuusya ati, “Angu woori, owurora echiinu choonechoone?” 24 Omuunu oyo ˆnaaringira enu na erya, ˆnaayika ati, “Enirora abhaanu, nawe bhari rwa amati ganu agaribhata.”
25 Yeesu ˆnaamutuura‑ko amabhoko rindi ku‑meeso, omuunu oyo ˆnaaringira nekeneke. ˆNaabha muwanga kerechu, ˆnaarora ebhiinu bhyone kisi. 26 Yeesu ˆnaamubhwira ati, “Subha iika ewaawo, waasiga okwingira noorwo mu‑ruguuyo.”
Peetero keekirisya ati Yeesu niwe Kirisito
27 Yeesu na abheeyigisibhwa bhaaye nibhasooka Bhetisaayida, nibhagenda mu‑nguuyo ja ayeeyi na Kayisaariya‑Firiipi. Omwanya gunu bhaariga nibharibhata ku‑njira, Yeesu ˆnaabhabhuusya ati, “Abhaanu abhaayika ati, naanye ga?” 28 Nibhamusubhya ati, “Abhandi abhaayika ati naawe Yowana Omubhatiija, abhandi abhaayika ati naawe omuragi Yeeriya, abhandi abhaayika ati naawe omuragi owundi wa kara wa Nyamuwanga.”
29 ˆNaabhabhuusya ati, “Woori emwe, omwayika ati naanye ga?” Peetero ˆnaamusubhya, ˆnaayika ati, “Awe naawe Kirisito.”b 30 Yeesu ˆnaabhakengya bhaasiga okubhwira omuunu woonewoone ati omwene niga.
Yeesu kaayika inguru ya okufwa na okusuuruka kwaye
31 Neeya Yeesu ˆnaamba okwiyigisya abheeyigisibhwa bhaaye ati jeenderwe omwene, Omwana wa Omuunu, anyaasibhwe muno, aremwe na abhakuru bha Abhayawudi, na abhakuru bha abhagabhisi, na abheeyigisya bha ebhiraagiro bhya Muusa, eetwe na ku‑rusuku rwa kasatu, arisuuruka. 32 Yeesu aariga ˆnaabhwira abheeyigisibhwa bhaaye omusango ogwo abhwerubhweru. Nawe Peetero ˆnaagenda nage ku‑mbari, ˆnaamba okumugonya. 33 Yeesu ˆneekebhuukira, ˆnaaroreerera abheeyigisibhwa bhaaye. ˆNaagonya Peetero ˆnaamubhwiraga ati, “Sooka anu Syetaani! Awe utakwiganirisya jinu jiri ja Nyamuwanga, tari wiganirisya jinu jiri ja abhaanu.”
34 ˆNaabhirikira echise cha abhaanu aamwi na abheeyigisibhwa bhaaye, ˆnaabhabhwira ati, “Omuunu woonewoone unu keenda okunduubha, keendwa eeyigaane omwene,c abhature omusarabha gwaye,d anduubhe. 35 Omuunu unu keenda okuwonʼya obhurame bhwaye, aribhusya obhuwanga bhwa akajaanende koone. Nawe omuunu unu kaabhusya obhurame bhwaye inguru yaani na inguru ya Emisango ja Ekisi, aribhona obhuwanga bhwa akajaanende koone. 36 Angu, omuunu aribhona omuriiro ki, araabha aakabhona ebhiinu bhyone bhya ku‑chaaro chinu, nawe ˆnaabhusya obhuwanga bhwa akajaanende koone? 37 Angu woori, omuunu kaatura okusoosya echiinu ki okuwonʼya obhurame bhwaye? Chitari‑wo! 38 Okubha omuunu woonewoone unu arindorera jiswaro anye, na emisango jaani, kw‑iyimbo rinu ribhiibhi, rinu abhaanu bhatari bheeyikanyibhwa imbere ya Nyamuwanga, anye Omwana wa Omuunu wone nirirorera omuunu oyo jiswaro, omwanya gunu niriija na bhamaraayika abheerue mw‑ikusyo rya Raata.”