Abhafarisaayo na Abhasadukaayo abheenda echibharikisyo
16
1 Niwo Abhafarisaayo na Abhasadukaayo nibhaaja ku‑Yeesu okumuregeeja. Nibhamusabhwa akore echibharikisyo cha okweresya ati, asookere ku‑Nyamuwanga. 2 Yeesu ˆnaabhasubhya ati, [“Wungwa keegoro yaakinga, omwayika ati, ‘Mutondo kwerere, kwa okubha orutumba rwerere.’ 3 Nawe bhukacha katondo nimwayika ati, ‘Reero, ingʼubha ya orwijogoro eyitura okugwa, kwa okubha orutumba rwirabhusiisye na ameere gayingire.’ Kasi emwe omumenya okusomboora orususo rwa orutumba, nawe ebhibharikisyo bhya emyanya jinu mutakutura okubhisomboora!] 4 Emwe muri yimbo ebhiibhi, mutari bheeyikanyibhwa imbere ya Nyamuwanga. Omwenda echibharikisyo, nawe nitaribheeresya echibharikisyo choonechoone. Tari murirora echibharikisyo rwa chirya cha omuragi Yoona era.” Niwo Yeesu ˆneemuka okusooka awo, ˆnaabhasiga.Ameeyigisyo amabhiibhi ga Abhafarisaayo na Abhasadukaayo
5 Mbe, abheeyigisibhwa bha Yeesu nibhaambuka inyanja okuja orubhaara orundi, nawe nibharabhirwa okugega emikaate. 6 Yeesu ˆnaabhabhwira ati, “Mwikenge echifwimbya cha Abhafarisaayo na Abhasadukaayo.” 7 Abheeyigisibhwa bhaaye nibhaamba okwayikana abheene kwa abheene ati, “Kaayika kutyo, kwa okubha chaarabhirwa okugega emikaate.”
8 Yeesu ꞉aamenyere jinu bhaariga nibhaayikana, ˆnaabhabhwira ati, “Emwe abhaanu bha eriikirisya ritooto! Kurwa ki omwayikana abheene kwa abheene ati mwarabhirwa okugega emikaate? 9 Noorwo woori, muchaari okusombookerwa? Mutakwichuka kutyo abhaanu bhiwumbi bhitaanu (5,000) ꞉bhaariiye emikaate etaanu jirya nibheeguta? ꞉Mwejusiisye ebhitukuru bhiringa bhya ebhibhaara bhinu ꞉bhyasigaaye? 10 Amwi mutakwichuka emikaate etaanu na ebhiri jinu abhaanu bhiwumbi bhina (4,000) ꞉bhaariiye nibheeguta? ꞉Mwejusiisye ebhitukuru bhiringa bhya ebhibhaara bhinu ꞉bhyasigaaye? 11 Mbawo mutakusombookerwa ati jinu naabhabhwira jitari inguru ya emikaate? Mbe, jinu enaayika ni ati, mwikenge echifwimbya cha Abhafarisaayo na Abhasadukaayo.” 12 Niwo, abheeyigisibhwa bhaaye nibhasombookerwa ati aariga atakubhabhwira okwikenga echifwimbya cha okufwimbya emikaate, tari inguru ya okwikenga ameeyigisyo ga orubheeyi ga Abhafarisaayo na Abhasadukaayo.
Peetero keekirisya ati Yeesu niwe Kirisito
13 Yeesu ejire aakinga orubhaara runu rwatogwaga ati Kayisaariya‑Firiipi, ˆnaabhuusya abheeyigisibhwa bhaaye ati, “Abhaanu abhaayika ati, anye Omwana wa Omuunu, naanye ga?” 14 Nibhamusubhya ati, “Abhandi abhaayika ati awe niwe Yowana Omubhatiija, abhandi abhaayika ati awe niwe Yeeriya na abhandi abhaayika ati awe niwe Yeremiya amwi owumwi wa abharagi bha Nyamuwanga.”
15 Yeesu ˆnaabhabhuusya ati, “Emwe omunyayika ati, naanye ga?” 16 Simooni Peetero ˆnaamusubhya ati, “Awe naawe Kirisito,a Omwana wa Nyamuwanga omuwanga.”
17 Yeesu ˆnaabhwira Peetero ati, “Awe Simooni omwana wa Yoona, uri na ribhando, kwa okubha atari‑wo omuunu woonewoone unu akuswerurira echimari echo, tari Raata waani wa mu‑rwire. 18 Anye enikubhwira ati, awe Peeterob uri rutare, inguru ya orutare runu, nikwo niryumbaka rikanisa ryani, noorwo amanaga ga nyombec gataririyiga wuri. 19 Anye nirikuyaana jinyiguriro ja obhukama bhwa mu‑rwire. Kurwa ejo, emisango joone jinu uriigara ku‑chaaro anu, Nyamuwanga wone kaabha ajiigaaye okusooka mu‑rwire. Ka wone, emisango joone jinu uriigura ku‑chaaro anu, Nyamuwanga wone, kaabha ajiiguuye okusooka mu‑rwire.”d 20 Niwo Yeesu ˆnaagaanya abheeyigisibhwa bhaaye ati, bhaasiga okubhwira omuunu woonewoone ati omwene niwe Kirisito.
Yeesu kaayika inguru ya okufwa na okusuuruka kwaye
21 Okusookerera omwanya ogwo, Yeesu ˆnaamba okubhwira abheeyigisibhwa bhaaye abhwerubhweru ati ni bhusibhusi agende Yerusareemu na okunyaasibhwa muno. ꞉Aabhabhwiriiye ati abhakuru bha Abhayawudi, abhakuru bha abhagabhisi na abheeyigisya bha ebhiraagiro bhya Muusa, bharimunyaasya okukingira okwitwa. Nawe ku‑rusuku rwa kasatu, arisuuruka. 22 Niwo, Peetero ˆnaagega Yeesu, ˆnaamusira ku‑mbari, ˆnaamba okumugonya, ˆnaamubhwiraga ati, “Raatabhugenyi, Nyamuwanga atusye ejo kura! Ejo jitarikubhona!” 23 Nawe Yeesu, ˆneekebhuukira, ˆnaabhwira Peetero ati, “Sooka anu Syetaani! Owuregeeja okunyingirira okukora jinu Nyamuwanga keenda! Awe utakwiganirisya jinu jiri ja Nyamuwanga, tari wiganirisya jinu jiri ja abhaanu.”
24 Mbe, Yeesu ˆnaabhwira abheeyigisibhwa bhaaye ati, “Omuunu woonewoone unu keenda okunduubha, keendwa eeyigaane omwene, abhature omusarabha gwaye, anduubhe. 25 Omuunu unu keenda okuwonʼya obhurame bhwaye omwene, niwe aribhusya obhuwanga bhwa akajaanende koone. Nawe omuunu unu kaabhusya obhurame bhwaye inguru yaani, niwe aribhona obhuwanga bhwa akajaanende koone. 26 Angu, omuunu aribhona omuriiro ki araabha aakabhona ebhiinu bhyone bhya echaaro chinu, nawe ˆnaabhusya obhurame bhwaye? Chitari‑wo echiinu cha obhurambu chinu omuunu kaatura okusoosya okuwonʼya obhurame bhwaye. 27 Okubha anye Omwana wa Omuunu, niriija aamwi na bhamaraayika bhaani mw‑ikusyo rya Raata waani. Niwo niririya bhuri muunu okuruubhana na ebhikorwa bhyaye. 28 Ni chimari enibhabhwira ati, bhari‑wo abhaanu abharebhe mw‑imwe anu, bhanu bhatarifwa bhachaari okundora anye Omwana wa Omuunu, niniija mu‑bhukama bhwani.”