Yeesu kaarema ameeyigisyo ga Abhafarisaayo
15
1 Mbe, Abhafarisaayo abharebhe na abheeyigisya bha ebhiraagiro bhya Muusa okusooka Yerusareemu nibhaaja ku‑Yeesu, nibhamubhuusya ati, 2 “Kurwa ki abheeyigisibhwa bhaawo abhanyamura jitungwa jinu bhasaaja weeswe ꞉bhaachisigiiye? Mbawo abheene abharya ebhiryo, bhateesaabhire amabhoko geebhwe rwa kutyo jeenderwe!”a3 Yeesu ˆnaabhasubhya ati, “Kurwa ki emwe wone omunyamura ebhiraagiro bhya Nyamuwanga kwa okuruubha jitungwa jeemwe? 4 Nyamuwanga ꞉aaragiriiye, ˆnaayika ati, ‘Uyaane esomwana na nyokomwana echibharo.’b Ka wone, ꞉aayikire ati, ‘Omuunu woonewoone unu kaafuma esemwene amwi nyiramwene, ni bhusibhusi eetwe.’c 5 Nawe emwe omwayika ati, omuunu keekirisibhwa okubhwira esemwene amwi nyiramwene ati, ‘Ebhiinu bhinu naakakuyaanire, naabhisoosiisye ku‑Nyamuwanga rwa echiyaanwa.’ 6 Kurwa ejo, omwayika ati omuunu atakukenwa okuyaana esemwene amwi nyiramwene echibharo. Nawe okwo nikwo okugaya omusango gwa Nyamuwanga kwa okuruubha jitungwa jeemwe. 7 Emwe abheerimaanya! Kasi jinu omuragi Iisaya ꞉aaragire inguru yeemwe, ni ja echimari.
8 ‘Nyamuwanga kaayika ati,
Abhaanu bhanu abhanaana echibharo kwa emisango era,
nawe emyoyo jeebhwe jiri kura na anye.
9 Abhandamya kutyo era,
kwa okubha emisango jinu abheeyigisya ni maragiriro ga abhaanu era.’d”
Emisango jinu ejijabhiyasya omuunu
10 Mbe, Yeesu ˆnaabhirikira echise cha abhaanu, ˆnaabhabhwira ati, 11 “Muntegeresye kisi na okusombookerwa emisango jinu enibhabhwira! Bhitari ebhiinu bhinu ebhiingira mu‑kanwa bhinu ebhijabhiyasya omuunu. Tari, emisango jinu ejisooka mu‑kanwa kaaye, nijo ejimujabhiyasya.”
12 Niwo abheeyigisibhwa bha Yeesu nibhamujaa‑ko, nibhamubhuusya ati, “Angu, owumenya ati Abhafarisaayo omwanya gunu ꞉bhoonguuwe emisango jaawo, ꞉bhaabhiyiiywe muno?” 13 Nawe omwene, ˆnaabhasubhya ati, “Ebhiyambwa bhyonebhyone bhinu Raata waani wa mu‑rwire ꞉ataayambire, aribhiiya. 14 Mubhasige, abho ni bhatangasya abhawofu bhanu abhatangasya abhawofu! Araabha omuwofu akatangasya omuwofu oweejaabho, bhoone ku‑bhubhiri bhwebhwe bharigwa mu‑ryobho.”
15 Mbe Peetero ˆnaabhwira Yeesu ati, “Chisomboorere echijekekanyo echo.” 16 Yeesu ˆnaamusubhya ati, “Noorwo emwe muchaari okusombookerwa? 17 Mutakusombookerwa ati echiinu choonechoone chinu echiingira mu‑kanwa, echija mu‑nda ya omuunu, nichiiya nichisooka mu‑mubhiri gwaye nichisirwa emwira? 18 Nawe omusango gwonegwone gunu ogusooka mu‑kanwa ka omuunu, ogusooka mu‑mwoyo gwaye. Ogwo nigwo gunu ogujabhiyasya omuunu. 19 Mu‑mwoyo gwa omuunu, nimwo obhusooka obhwiganirisya obhubhiibhi, obhwiti, obhuromesi, obhusengani, obhwifi, obhubhambaasi bhwa orubheeyi na amafumo. 20 Emisango ejo joone, nijo ejijabhiyasya omuunu. Nawe omuunu okurya ebhiryo ateesaabhire amabhoko kutakumukora ajabhiyare.”
Eriikirisya enene rya omugasi unu atari Muyawudi
21 Mbe, Yeesu ˆnaasooka arya, ˆnaagenda orubhaara rwa emisi ja Tiiro na Sidooni. 22 Niwo ˆnaabhugana na Omukanaanigasi umwi, aariga ari mwinengo wa enda‑wo. ˆNaaja ku‑Yeesu, ˆnaamura obhuraka, ˆnaamubhwira ati, “Raatabhugenyi, Omwana wa Dawudi,e unfwire echigongo! Omuyaasya waani awungirwe risambwa, ryamunyaasiisye muno.”
23 Nawe Yeesu ꞉ataamusubhiisye omusango gwonegwone. Niwo, abheeyigisibhwa bhaaye nibhaaja, nibhamwirembeeresya ati, “Nuumubhwire agende, kwa okubha omugasi unu kaachiyombera, keenu kaachiruubhirira.” 24 ˆNaabhasubhya ati, “Nyamuwanga ꞉aantumire inguru ya Abhayisirayeeri bheenyere, kwa okubha bhari rwa jinaama jinu jibhurire.”
25 Omugasi oyo ˆnaafogera ku‑Yeesu, ˆneefukama imbere yaaye, ˆnaamwirembeeresya ati, “Raatabhugenyi, nuunsakire!” 26 Yeesu ˆnaamusubhya ati, “Jitari ja ekisi okugega ebhiryo bhya abhaana na okwesera jimbwa.”f 27 Omugasi oyo ˆnaayika ati, “Nikwo kutyo Raatabhugenyi, nawe noorwo jimbwa wone ejirya obhusigara bhunu obhusooka ku‑meeja ja abhaami bhaajo.”
28 Yeesu ˆnaamusubhya ati, “Maayi, uri na eriikirisya enene! Nyamuwanga akukorere rwa kutyo oweenda.” Awoawo, omuyaasya waaye ˆnaawora.
Yeesu kaawosya abharwaye bhaafu
29 Mbe, Yeesu ˆnaasooka awo, ˆnaakererera ku‑njekekera ya inyanja ya Gariraaya. ˆNaariinya ku‑chiima ˆneenyanja okwo. 30 Abhaanu bhaafu muno nibhagenda ku‑Yeesu, nibhamusirira abhafuuwe bha amaguru, abhawofu, abharema, abhajibhi na abharwaye abhandi bhaafu. Abharwaye abho bhoone nibhatuurwa ayeeyi na amaguru ga Yeesu, omwene ˆnaabhawosya. 31 Abhaanu nibharuguura muno bhejire bhaarora abhajibhi nibharoma, abharema nibhawora, abhafuuwe bha amaguru nibharibhata na abhawofu nibharora. Nibhaamba okukusya Nyamuwanga wa Abhayisirayeeri.
Yeesu kaariisya abhaanu bhiwumbi bhina na obhusaago
32 Niwo Yeesu ˆnaabhirikira abheeyigisibhwa bhaaye, ˆnaabhabhwira ati, “Enifwira echigongo abhaanu bhanu, kwa okubha cheekaaye nabho masuubha gasatu na bhatari na ebhiryo. Nitakwenda okubharaga bhagende mu‑misi jeebhwe bhari na omweko, kwa okubha abhandi abhatura okuyuutukira mu‑njira.”
33 Abheeyigisibhwa bhaaye nibhamubhwira ati, “Anu chiri ibhara, ka wone abhaanu ni bhaafu. Angu, echija okubhona aaki emikaate ja okwiya abhaanu bhanu bhoone?” 34 Yeesu ˆnaabhabhuusya ati, “Muri na emikaate eringa?” Abheene nibhamusubhya ati, “Chiri na emikaate etaanu na ebhiri na ebhiswi bhityari era.”
35 Mbe, Yeesu ˆnaaragirira ati abhaanu bhoone bheenyanje aasi. 36 ˆNaagega emikaate etaanu na ebhiri jirya na ebhiswi bhirya, ˆnaasiima Nyamuwanga. Neeya, ˆnaabhibheganya, ˆnaayaana abheeyigisibhwa bhaaye, abheene wone nibhagabhira abhaanu. 37 Abhaanu bhoone nibharya, nibheeguta. Nibheeya, abheeyigisibhwa bhaaye nibhakofya ebhibhaara bhinu ꞉bhyasigaaye, nibheejusya ebhitukuru bhitaanu na bhibhiri. 38 Abhaanu bhanu ꞉bhaariiye ebhiryo bhirya bhaariga nibhakinga abharume bhiwumbi bhina (4,000), utabharire abhagasi na abhaana. 39 Mbe, Yeesu ˆnaaraga abhaanu bharya, ˆneengira mu‑ngama, ˆnaagenda orubhaara rwa omusi gwa Magadaani.