Yowana Omubhatiija kaatemwa‑ko omutwe
14
1 Ku‑mwanya ogwo, Yeroode Atipaasi,a niwe aariga ari mukama wa omukoowa gwa Gariraaya. Ejire oongwa inguru ya ebhikorwa bhinu Yeesu aariga ˆnaakora, 2 ˆnaabhwira abhakosi bhaaye ati, “Omuunu oyo, ni Yowana Omubhatiija! Noorwo kutyo ꞉aafuuwe amwi niwe aasuuruka okusooka mu‑bhafuuwe! Nikwo okukora ari na obhuturo bhwa okukora ebhiruguusyo.”3 Yeroode ꞉aayikire kutyo, kwa okubha niwe ꞉aagwatire Yowana, ˆnaamubhoya amaseega, ˆnaamutuura mw‑ibhoyero. ꞉Aamubhoyere, ku‑songa ya emisango jinu Yowana ꞉aayikire inguru ya obhutwarwa bhwa Yeroode na Yerodiya. Yerodiya oyo, ku‑bhwambiro aariga ari mugasi wa Firipo, omumura waabho Yeroode. 4 Okubha, Yowana aariga agonyiisye Yeroode ati, “Okuruubhana na ebhiraagiro bhya Nyamuwanga, jitari ja kisi okutwara omugasi wa omumura waanyu.”b 5 Mbe, Yeroode aariga ˆnaayenja injira ya okwita Yowana, nawe aariga ˆnoobhaya Abhayawudi kwa okubha abheene, bheekirisyaga ati, Yowana ni muragi wa Nyamuwanga.
6 Rwejire rwakinga orusuku rwa ichikukuru ya okwichuka okwibhurwa kwa Yeroode, omuyaasya wa Yerodiya ˆnaaja, ˆnaabhina imbere ya abhagenyi bhoone. Yeroode ˆnaakonderwa muno. 7 Niwo ˆnaarayira okuyaana omuyara oyo echiinu choonechoone chinu keenda. 8 Omuyara oyo, ˆnaakungirisibhwa na nyiramwene ati, asabhwe omutwe gwa Yowana Omubhatiija. Niwo omuyarakaji oyo, ˆnaabhwira Yeroode ati, “Nuuteere ku‑rutubha omutwe gwa Yowana Omubhatiija.” 9 Omukama Yeroode ˆnaasurumbara, nawe kwa okubha aariga amuragire kwa echirayiro imbere ya abhagenyi bharya, ˆnaaragirira ati, omuyarakaji oyo, ayaanwe omutwe ogwo. 10 Mbe, Yeroode ˆnaaragirira omuunu agende mw‑ibhoyero, ateme‑ko Yowana omutwe. 11 Niwo omutwe gwa Yowana nigureetwa guri ku‑rutubha, ˆnaayaanwa omuyarakaji oyo, omwene ˆnaagusirira nyiramwene. 12 Abheeyigisibhwa bha Yowana bhejire bhoongwa emisango ejo, nibhaaja nibhabhatura omutumbi gwaye, nibhagenda okugusiika. Nibheeya, nibhagenda okubhwira Yeesu joone jinu ꞉jaakorekeene.
Yeesu kaariisya abhaanu bhiwumbi bhitaanu na obhusaago
13 Yeesu ejire oongwa emisango ejo joone, ˆnaariinya mu‑ngama ˆnaasooka awo, ˆnaagenda anu abhaanu bhaariga bhatari. Nawe abhaanu bhejire bhoongwa ati, aasooka eyo, nibhasooka mu‑misi jeebhwe, nibharibhata maguru nibharuubha Yeesu anu aariga ari. 14 Mbe, ejire aakinga, ˆneeka okusooka mu‑ngama, ˆnaarora echise chinene cha abhaanu. ˆNaabhafwira echigongo ˆnaawosya abharwaye bheebhwe.
15 Keegoro yejire yaakinga, abheeyigisibhwa bhaaye nibhagenda, nibhamubhwira ati, “Anu chiri ibhara na ingeta yeengira. Nuurage abhaanu bhanu, korereki bhagende mu‑nguuyo bheegurire ebhiryo.” 16 Yeesu ˆnaabhasubhya ati, “Bhatakukenwa okuja eyo. Emwe, mubhayaane ebhiryo.” 17 Abheene nibhamusubhya ati, “Chitari na ebhiryo! Chiri na emikaate etaanu era na jiiswi ebhiri.” 18 Yeesu ˆnaabhabhwira ati, “Mubhindeetere anu.” 19 Mbe, ˆnaaragirira abhaanu bharya ati, bheenyanje aasi ku‑bhunyaasi. ˆNaagega emikaate etaanu jirya na jiiswi ebhiri jirya, ˆnaaragamira ku‑rwire, ˆnaasiima Nyamuwanga. Neeya, ˆnaabheganya emikaate jirya, ˆnaayaana abheeyigisibhwa bhaaye, abheene wone nibhagabhira abhaanu emikaate aamwi na jiiswi ejo. 20 Abhaanu bhoone nibharya, nibheeguta. Nibheeya, abheeyigisibhwa bhaaye nibhakumanya ebhibhaara bhinu ꞉bhyasigaaye, nibheejusya ebhitukuru ekumi na bhibhiri. 21 Abhaanu bhanu ꞉bhaariiye ebhiryo bhirya, bhaariga nibhakinga abharume bhiwumbi bhitaanu (5,000), utabharire abhagasi na abhaana.
Yeesu kaaribhata ku‑nyanja
22 Awoawo, Yeesu ˆnaaragirira abheeyigisibhwa bhaaye ati, bheengire mu‑ngama, bhatangate okugenda ku‑ngego ya inyanja ya Gariraaya, omwanya ogwo, omwene aariga achaaragana na echise cha abhaanu. 23 Yeesu ejire aamara okuragana na echise chirya cha abhaanu, ˆnaariinya ku‑chiima wenyere okusabhwa Nyamuwanga. Ingeta ꞉yeengiiye omwene achaari ku‑chiima eyo wenyere. 24 Omwanya ogwo, ingama irya, yaakingire ebhusibha, nawe amakonjo gaariga nigayibhumabhuma, kwa okubha omuyaga gwariga guri gwa ebhutwe.
25 Oruguru rwejire rwatema, Yeesu ˆnaakinga ku‑bheeyigisibhwa bhaaye, keenu ˆnaaribhataga ku‑nyanja. 26 Abheeyigisibhwa bhaaye bhejire bhaamurora ˆnaaribhata ku‑nyanja, nibhayaya muno, nibhaayika ati, “Rinu ni sambwa!” Nibhoobhaya muno, nibhakunga.
27 Awoawo, Yeesu ˆnaabhabhwira ati, “Musiiriike, musige okuubhaya! Naanye.”
28 Peetero ˆnaamusubhya ati, “Raatabhugenyi, araabha naawe chimari, nuundagirire niribhate ku‑nyanja nikuuje‑ko.” 29 Yeesu ˆnaamuragirira ati, “Iija!” Mbe, Peetero ˆneeka okusooka mu‑ngama, ˆnaamba okuribhata ku‑nyanja okugenda ku‑Yeesu. 30 Nawe Peetero ejire aarora omuyaga gwa echiiwure niguyemba, ˆnoobhaya, ˆnaamba okutubhira mu‑manji. ˆNaamura obhuraka, ˆnaayika ati, “Raatabhugenyi, nuunyerure!” 31 Awoawo, Yeesu ˆnaagorora okubhoko, ˆnaamugwata, ˆnaamubhwira ati, “Awe owa eriikirisya ritooto, kurwa ki owitimaata?”
32 Omwanya gunu Yeesu na Peetero ꞉bheengiiye mu‑ngama omwo, omuyaga nigutemekera. 33 Mbe, abheeyigisibhwa bhanu bhaariga bhasigaaye mu‑ngama, nibhamwifukamira, nibhaayikaga ati, “Chimari, awe uri Mwana wa Nyamuwanga!”c
Yeesu kaawosya abharwaye Genejareeti eyo
34 Yeesu na abheeyigisibhwa bhaaye bhejire bhaambuka inyanja, nibhakinga mu‑chaaro cha Genejareeti. 35 Abhaanu bheende‑yo bhejire bhaasombookerwa ati, Yeesu niwe ari‑wo, nibharaasya emisango jaaye mbaara ejo joone. Mbe, abhaanu nibhaaja na okureetera Yeesu abharwaye bheebhwe. 36 Abhaanu bhanu bhaariga bhareetere abharwaye, nibheerembeeresya Yeesu eekirisisye abharwaye abho bhakuunʼye ku‑bhisangʼarye bhya ku‑bhufunyiro bhwa omwenda gwaye era.d Niwo bhoone bhanu ꞉bhaabhikuniisye‑ko, nibhawora.