Echijekekanyo cha okusabhwa Nyamuwanga
18
1 Mbe, Yeesu ˆnaabhwira abheeyigisibhwa bhaaye echijekekanyo, korereki okubheeresya ati, bheenderwe bhagenderere okusabhwa Nyamuwanga okufwa omutima wuri. 2 ˆNaabhabhwira ati, “Aariga ari‑wo omuramusi umwi mu‑musi omurebhe. Omuramusi oyo, aariga atakugayuka Nyamuwanga, noorwo aariga atakuyaana omuunu woonewoone echibharo. 3 Mbe, mu‑musi ogwoogwo, aariga ari‑mo omutumbagasi umwi. Omutumbagasi oyo, aamuujaga‑ko kwiya kaafu, ˆnaamwirembeeresya ˆnaamubhwiraga ati, ‘Enisabhwa umbagire ku‑musoko waani, korereki nibhone rirenga ryani.’4 “Ku‑mwanya omureera, omuramusi oyo aariga aremere okubhagira omugasi oyo. Nawe ku‑bhuteero, ˆneeyayikira mu‑mutima gwaye ati, ‘Noorwo kutyo nitakugayuka Nyamuwanga, na nitakuyaana omuunu woonewoone echibharo, 5 enija okubhagira omutumbagasi unu, korereki abhone rirenga ryaye bhwangwe. Nikarema okukora kutyo, kaja okugenderera okunyaasya, ku‑bhuteero kaja okunfuruurusya.’”
6 Niwo, Raatabhugenyi Yeesu, ˆnaagenderera okwayika ati, “Mutegeresye emisango ja omuramusi omubhiibhi oyo jinu ꞉aayikire! 7 Nikwo okwayika ati, Nyamuwanga, ataribhagira abhaanu bhanu ꞉aasorere? Aribha bhaamuririra mu‑ngeta na mu‑mwisi, angu arikoora okubhategeresya? 8 Enibhabhwira ati, kaja okubhayaana rirenga rwebhwe bhwangwe. Nawe, anye Omwana wa Omuunu omwanya gunu nirisubha ku‑chaaro, angu nirisongʼana abhaanu bhachaanyikirisyaga?”
Echijekekanyo cha Omufarisaayo na omutobhesya wa rigooti
9 Ka wone, Yeesu ˆnaabhabhwira echijekekanyo echindi, inguru ya abhaanu bhanu abheerora ati, nibho abharengeresi imbere ya Nyamuwanga, keenu nibhagaya abhaanu abhandi. ˆNaayika ati, 10 “Rusuku rumwi, abhaanu bhabhiri ꞉bhaariinyire okugenda mw‑Iyekaru rya Nyamuwanga okumusabhwa. Owumwi aariga ari Mufarisaayo, na owundi aariga ari mutobhesya wa rigooti.
11 “Bhejire bhaakinga, Omufarisaayo ˆneemereeguru eenyere ku‑mbari, ˆnaasabhwa ati, ‘Enikusiima Nyamuwanga, kwa okubha anye nitari owa ebhibhiibhi rwa abhaanu abhandi. Abhaanu abhandi ni bhasaakusi, abhajabhi, na abharomesi, noorwo nitari rwa omutobhesya wa rigooti oyo! 12 Anye eniiyima ebhiryo kabhiri ku‑bhwoyo na kw‑ibhona rinu enibhona, enikusoosya‑ko ijaaka.’
13 “Nawe, omutobhesya wa rigooti oyo, omwene aariga eemereeguru kura, ꞉ateendere noorwo okuringira inguru ku‑rwire, tari eekunuunaga mu‑chifubha chaaye kwa obhusurumbaaye, ˆnaayikaga ati, ‘Nyamuwanga, nuunfwire echigongo, anye owa ebhibhiibhi!’”
14 Ka wone, Yeesu ˆnaagenderera okwayika ati, “Enibhabhwira ati, omutobhesya wa rigooti oyo, omwanya gunu ꞉eekire okusubha iika ewaaye, aariga aabharirwe okubha omurengeresi imbere ya Nyamuwanga. Nawe, oweejaabho urya ꞉ataafwiriiywe echigongo. ꞉Ataafwiriiye echigongo, isonga iri ati, omuunu woonewoone unu keeriinyagisya inguru, Nyamuwanga arimworomosya emwaro. Nawe omuunu woonewoone unu keekeeya, Nyamuwanga arimuriinyagisya inguru.”
Yeesu kaayaana abhaana abharera amabhando
15 Mbe, abhaanu nibhareetera Yeesu, noorwo abhaana bheebhwe abhajubha, korereki abhateere‑ko amabhoko abhayaane amabhando. Abheeyigisibhwa bhaaye bhejire bhaarora kutyo, nibhagonya abhaanu abho. 16 Nawe, Yeesu ˆnaabhirikira abhaana abho, ˆnaayika ati, “Musige abhaana abharera bhaaje kw‑anye, musige okubhagaanya, kwa okubha, obhukama bhwa Nyamuwanga ni bhwa abhaanu bhanu bhari rwa abhaana bhanu. 17 Ni chimari enibhabhwira ati, omuunu woonewoone unu atakwikirisya obhukama bhwa Nyamuwanga rwa omwana omutooto, omuunu oyo atakutura okwingira mu‑bhukama bhwa Nyamuwanga.”
Omutungi omuniibhi
18 Aariga ari‑wo omutungi umwi. Omutungi oyo, ˆnaabhuusya Yeesu ati, “Omwiyigisya wa ekisi, nikore kutiki, korereki ku‑bhuteero nibhone obhuwanga bhwa akajaanende koone?”
19 Yeesu ˆnaamusubhya ati, “Mbawo owumbirikira wa ekisi? Atari‑wo omuunu woonewoone wa ekisi, tari Nyamuwanga eenyere! 20 Owubhimenya kisi ebhiraagiro bhya Nyamuwanga, ‘Waasiga okukora obhuromesi, waasiga okwita, waasiga okwibha, waasiga okusoosya obhubhambaasi bhwa orubheeyi, uyaane esomwana na nyokomwana echibharo.’a”
21 Neeya, omutungi oyo, ˆnaamusubhya ati, “Nigayukire ebhiraagiro ebhyo bhyone, okwambira ku‑bhwana bhwani.”
22 Yeesu ejire oongwa ejo, ˆnaamubhwira ati, “Ugerukiiywe‑wo omusango gumwi era. Genda ugusye ebhiinu bhyone bhinu uri nabhyo. Jipirya jinu uribhona, ugabhire abhataka. Urikora kutyo uribhiikira ebhibhiikwa mu‑rwire. Ukamara uuje unduubhe.” 23 Omutungi oyo, ejire oongwa ejo, ˆnaasurumbara muno, kwa okubha aariga ari muniibhi muno.
24 Yeesu ejire aamurora asurumbaaye kutyo, ˆnaayika ati, “Jiribha bhikomeeye muno abhaniibhi okwingira mu‑bhukama bhwa Nyamuwanga! 25 Ni bhwangu ingamiya okwiyiganya mw‑iwundu rya isinga, okukira omuniibhi okwingira mu‑bhukama bhwa Nyamuwanga!”
26 Abhaanu bhejire bhoongwa ejo, nibhaayika ati, “Mbe woori, niga unu kaatura okuchunguka?” 27 Yeesu ˆnaabhabhwira ati, “Emisango jinu jitakuturikana ku‑bhaanu, ku‑Nyamuwanga ejiturikana.”
28 Mbe, Peetero ˆnaabhwira Yeesu ati, “Ringira! Eswe chisigire bhuri chiinu chikuruubhire awe!” 29 Yeesu ˆnaabhasubhya ati, “Ni chimari enibhabhwira ati, omuunu woonewoone unu ꞉aasigire inju yaaye, amwi omugasi waaye, amwi abhamura bhaabho, amwi abheebhusi bhaaye, amwi abhaana bhaaye inguru ya obhukama bhwa Nyamuwanga, 30 oyo aribhona ebhiinu bhyafu muno achaari ku‑chaaro anu, okukira ebhiinu bhinu ari nabhyo woori. Ka wone omwanya gunu oguuja, aribhona obhuwanga bhwa akajaanende koone.”
Yeesu kaayika rindi inguru ya okufwa na okusuuruka kwaye
31 Yeesu ˆnaabhirikira abheeyigisibhwa bhaaye ekumi na bhabhiri bhumbise, ˆnaabhabhwira ati, “Muringire! Echiriinya okugenda mu‑musi gwa Yerusareemu. Emisango joone jinu ꞉jaakaamirwe na abharagi inguru yaani, anye Omwana wa Omuunu, jirikuumira eyo. 32 Nirituurwa mu‑mabhoko ga abhaanu bhanu bhatari Bhayawudi. Abho, bharingaya, bharinfuma, bharinfubhurira amachwata. 33 Ka wone, bharimbuma na jijaridi, na okunyita. Nawe, ku‑rusuku rwa kasatu, nirisuuruka.”
34 Emisango jinu Yeesu ꞉aabhabhwiriiye, ꞉bhataajisombookeeywe wuri noorwo na akatyari, kwa okubha obhugajuro bhwajo bhwariga bhwiserekere. ꞉Bhataasombookeeywe ati obhugajuro bhwajo ki.
Yeesu kaawosya omuwofu
35 Yeesu ejire aarebherera omusi gwa Yeeriko, ˆnaasongʼana omuwofu umwi eenyanjirega ku‑mbarimbari ya injira, ˆnaasabhiirisyaga jipirya ku‑bhaanu. 36 Ejire oongwa abhaanu bhaafu nibhatura awo, ˆnaabhuusya ati, “Bhamura chiri‑wo ki?” 37 Nibhamubhwira ati, “Yeesu Omunajareeti kaatura awo.”
38 Awoawo, omuwofu oyo, ˆnaamura obhuraka, ˆnaayika ati, “Yeesu, Omwana wa Dawudi,b nuunfwire echigongo!” 39 Nawe, abhaanu bhanu bhaariga bhatangatire ku‑rugendo orwo, nibhamugonya, nibhamubhwira ati, “Jibhira!” Nawe omwene, ˆnaagenderera okwamura obhuraka muno, ati, “Yeesu Omwana wa Dawudi, nuunfwire echigongo!” 40 Yeesu ˆneemereeguru, ˆnaaragirira omuwofu oyo areetwe ku‑mwene. Omuwofu oyo ejire aamurebherera, Yeesu ˆnaamubhuusya ati, 41 “Oweenda nikukorere ki?” Omwene ˆnaamusubhya ati, “Raatabhugenyi, enisabhwa nirore rindi!” 42 Yeesu ˆnaamubhwira ati, “Nuurore rindi! Waawosibhwa ku‑songa ya eriikirisya ryawo.” 43 Awoawo, ˆnaarora rindi, ˆnaaruubha Yeesu, enu ˆnaakuuyaga Nyamuwanga. Abhaanu bhoone bhejire bhaarora ejo, nibhakuuya Nyamuwanga.