Echijekekanyo cha okuriya abhakosi bha emirimu
20
1 Yeesu ˆnaagenderera okwayika ati, “Obhukama bhwa mu‑rwire obhususana na omwene esambu unu ꞉eemukire mu‑ruguru ˆnaagenda okuyenja abhaanu bha okumukorera emirimu mw‑isambu ryaye rya emijabhiibhu. 2 Ejire aabhasongʼana, ˆneekirisyanya nabho ati, ariye bhuri muunu omuyeero gwa orusuku rumwi.a Niwo, ˆnaabhatuma mw‑isambu ryaye.3 “Yejire yaakinga saa esatu katondo, ˆneemuka rindi okugenda mw‑iguriro, ˆnaarora abhaanu abhandi bhatari na emirimu. 4 ˆNaabhabhwira ati, ‘Emwe wone mugende okukora emirimu mw‑isambu ryani rya emijabhiibhu. Niribhariya rwa kutyo eyikenwa.’ 5 Abheene wone nibhagenda.
“Mbe yejire yaakinga mu‑mwisi, ˆneemuka rindi ˆnaayaana abhaanu abhandi emirimu mw‑isambu ryaye. Gejire gaatura masaa gasatu, ˆnaakora kutyo rindi. 6 Omwanya gunu ꞉yaakingire saa ekumi na imwi keegoro, ˆneemuka rindi okugenda mw‑iguriro, ˆnaasongʼana abhaanu abhandi bhatari na emirimu. ˆNaabhabhuusya ati, ‘Kurwa ki mwimereeguuyu anu rusuku rukobhe mutari na emirimu joonejoone?’ 7 Abheene nibhamusubhya ati, ‘Ni kwa okubha atari‑wo omuunu unu achiyaaye emirimu.’ Omwene ˆnaabhabhwira ati, ‘Emwe wone mugende okukora emirimu mw‑isambu ryani rya emijabhiibhu.’
8 “Echisuute chejire cheengira, omwene esambu ˆnaabhwira omwangarisi wa emirimu jaaye ati, ‘Ubhirikire abhakosi bhoone, ubhariye omuyeero gwebhwe. Ukabhariya, wambe na abhakosi bhanu bhaaja ku‑bhuteero na umariisye na bhanu bhaaja ku‑bhwambiro.’
9 “Niwo abhakosi bhanu ꞉bhaambire emirimu keegoro, nibhaaja nibhayaanwa omuyeero gwa orusuku rumwi. 10 Abhakosi bhanu ꞉bhaambire emirimu katondo ꞉bheejire bheeyikanyisye ati bhakaramiiye omuyeero mwafu okukira abheejaabho bhanu ꞉bhaambire emirimu ku‑bhuteero. Nawe bhuri muunu ˆnaariywa jipirya jiryajirya ja omuyeero gwa orusuku rumwi. 11 Kurwa ejo, bhejire bhaamara okuramira omuyeero gwebhwe, nibhaamba okutongʼanira omwene esambu 12 nibhaayikaga ati, ‘Abhaanu bharya ꞉bhaakorere emirimu esaa rimwi era! Woori jaabha kutiki waachiriya bhwinganya aamwi nabho, omwanya ogwo eswe chikorere emirimu misito muno na risuubha ryachoocha orusuku rukobhe?’
13 “Omwene esambu ˆnaasubhya umwi mu‑bhakosi abho ati, ‘Musaani, nichaari kukwibhira choonechoone. Angu, ꞉chiteekirisyanyiisye ati owuja okukora emirimu ku‑muyeero gwa orusuku rumwi? 14 Gega jipirya jaawo, ugende ewaawo. Anye naaramura okuriya omuunu wa obhuteero omuyeero gunu ogwingana na ogwawo. 15 Angu, nitakwikirisibhwa okukorera jipirya jaani rwa kutyo eneenda? Amwi uri na orwiso kwa okubha anye ni wa ekisi muno ku‑bhandi?’”
16 Yeesu ˆnaamariisya kwa okwayika ati, “Kutyo, abhaanu bhanu bhasingiriiye woori, bharitangata. Ka wone, abhaanu bhanu bhatangatire woori, bharisingirira.”
Yeesu kaayika rwa kasatu inguru ya okufwa na okusuuruka kwaye
17 Omwanya gunu Yeesu aariga ari ku‑njira okugenda Yerusareemu, ˆnaagega ku‑mbari abheeyigisibhwa bhaaye ekumi na bhabhiri, ˆnaabhabhwira ati, 18 “Ringira, woori echigenda Yerusareemu. Eyo niyo, anye Omwana wa Omuunu, nirituurwa mu‑mabhoko ga abhakuru bha abhagabhisi na mu‑mabhoko ga abheeyigisya bha ebhiraagiro bhya Muusa. Abho bharindamura ati niitwe. 19 Ku‑bhuteero, bharintuura mu‑mabhoko ga abhaanu bhanu bhatari Bhayawudi, korereki bhansiijaake, bhambume na jijaridi, na okumbumiirira ku‑musarabha. Nawe ku‑rusuku rwa kasatu, Nyamuwanga arinsuurura.”
Omukuru akorere emirimu bhanu kaatangasya
20 Niwo, omugasi wa Jebhedaayo ˆnaaja ku‑Yeesu aamwi na abhaana bhaaye bhabhiri, ˆneefukama imbere yaaye, ˆnaamusabhwa amukorere omusango gumwi. 21 Yeesu ˆnaamubhuusya ati, “Oweenda nikukorere ki?” Omwene ˆnaamusubhya ati, “Enisabhwa ubheekirisisye abhaana bhaani bhabhiri bhanu, bheenyanje aamwi na awe mu‑bhukama bhwawo, owumwi orubhaara rwa ebhuryo na owundi orubhaara rwa ebhumoosi.”
22 Yeesu ˆnaamusubhya ati, “Mutakumenya jinu omusabhwa. Angu, omutura okunyaaka rwa kutyo enija okunyaaka?”b Nibhamusubhya ati, “Echitura.” 23 Yeesu ˆnaabhabhwira ati, “Chimari omuja okunyaaka rwa kutyo enija okunyaaka, nawe okwinyanja orubhaara rwani rwa ebhuryo amwi rwa ebhumoosi, ogwo gutari murimu gwani okubheekirisisya. Jimbaara ejo ni ja bhanu Raata waani aamarire okwiraabhira.”
24 Abheeyigisibhwa bhaaye abhandi ekumi bhejire bhoongwa ejo, nibhabhiyirirwa abheejaabho bhabhiri abho. 25 Niwo Yeesu ˆnaabhirikira bhoone, ˆnaabhabhwira ati, “Omumenya ati abhatangasya bha amaanga abhatunga abhaanu bheebhwe kwa amanaga, na abhakuru bheebhwe abhabhakosya emirimu kwa amanaga. 26 Nawe jaasiga okubha kutyo kw‑imwe. Omuunu woonewoone unu keenda okubha omukuru agati yeemwe, keendwa abhe omukosi weemwe. 27 Ka wone, omuunu woonewoone unu keenda okubha wa okwamba agati yeemwe, keendwa abhe omugaya weemwe.c 28 Jiri rwa kutyo anye Omwana wa Omuunu, ꞉niteejire okukorerwa emirimu, tari ꞉neejire okukorera emirimu abhaanu na okusoosya obhurame bhwani, korereki neerure abhaanu bhaafu.”
Yeesu kaawosya abhawofu bhabhiri
29 Omwanya gunu Yeesu na abheeyigisibhwa bhaaye ꞉bhaasookere mu‑musi gwa Yeeriko, echise chinene cha abhaanu nichibharuubha. 30 Ku‑mbarimbari ya injira inu Yeesu ꞉aaturire‑ko, bhaariga bhari‑wo abhawofu bhabhiri. Mbe, omwanya gunu ꞉bhoonguuwe ati Yeesu kaatura awo, nibhabhirikira kwa obhuraka bhunene ati, “Raatabhugenyi, Omwana wa Dawudi, echisabhwa uchifwire echigongo!” 31 Echise cha abhaanu nichibhagonya ati bhajibhire, nawe abheene nibhagenderera okwamura obhuraka nibhabhirikiraga ati, “Raatabhugenyi, Omwana wa Dawudi,d echisabhwa uchifwire echigongo!”
32 Mbe, Yeesu ˆneemereeguru, ˆnaabhabhirikira, ˆnaabhabhuusya ati, “Omwenda nibhakorere ki?” 33 Abhawofu abho nibhamusubhya ati, “Raatabhugenyi, echeenda ameeso geeswe gawore!” 34 Niwo Yeesu ˆnaabhafwira echigongo, ˆnaabhakuunʼya ku‑meeso geebhwe. Awoawo, ameeso geebhwe nigawora, wone nibharuubha Yeesu.