Yeesu kaasusanya abhatangasya na abharimi abhajabhi
12
1 Yeesu ˆnaamba okwayika na abhatangasya bha Abhayawudi bharya ku‑bhijekekanyo. ˆNaayika ati, “Aariga ari‑wo omuunu umwi unu aariga ari na risambu. Mw‑isambu omwo, aariga ayambire‑mo emijabhiibhu. ˆNaarisitira orugo, ˆnaasimba eryobho agatigati korereki amigirege‑mo omuta gwa emijabhiibhu, ka wone ˆnoombaka obhutara obhureeraa bhwa abhariisi. Ku‑bhuteero, ˆnaariweekesyab ku‑bharimi abharebhe, ˆnaagenda orugendo. 2 Omwanya gwa okugesa gwejire gwakinga, ˆnaatuma omugaya waaye ku‑bharimi abho, korereki amureetere omugabho gwaye gwa amatwasyo ga emijabhiibhu okusooka mw‑isambu ryaye. 3 Nawe, abharimi bharya nibhagwata omugaya wurya, nibhamubhuma na okumusubhya ngaro nyeru. 4 Omwene esambu ˆnaatuma omugaya owundi ku‑bharimi bharya. Oyo wone nibhamubhuma na okumwasya orubhaare, na okumukorera kubhiibhi muno. 5 ˆNaatuma omugaya waaye owundi, abharimi bharya nibhamwita. ꞉Aatumire abhagaya bhaaye abhandi bhaafu. Abharimi bharya nibhabhuma abhandi, na okwita‑ko abhandi. 6 Omwene esambu ˆnaasigara na omuunu umwi era wa okutuma, omwana waaye omwendwa. Ku‑bhuteero ˆnaamutuma ku‑bharimi bharya, ˆneetogera ati, ‘Abhaja okuyaana omwana waani echibharo.’7 “Nawe, ejire aakinga, abharimi bharya nibhaayikana ati, ‘Unu niwe aryanjura risambu rya esemwene rinu. Woori, chimwite. Omwandu gwaye gunu oguja okubha gweswe.’ 8 Mbe, nibhamugwata, nibhamwita, nibhamwesa anja ya risambu rirya.
9 “Woori, omwene esambu oyo arikora kutiki? Ariija na okusingaarisya abharimi bharya, na risambu eryo, aririweekesya ku‑bharimi abhandi. 10 Kasi, muchaariga okusoma jinu jikaamirwe mu‑Bhikaame Ebhyeru bhinu? Jikaamirwe ati,
‘Ribhuyi rinu abhoombaki ꞉bhaaremere,
niryo ryabha ribhuyi rinene rya orufuka.c
11 Raatabhugenyi niwe aakora ogwo,
na ogwo ni musango gwa okuruguusya kw‑iswe.’d”
12 Abhakuru bha abhagabhisi, abheeyigisya bha ebhiraagiro bhya Muusa na abhakuru bha Abhayawudi nibhasombookerwa ati echijekekanyo chirya echaayikira abheene. Niwo nibheenda okumugwata, nawe nibhoobhaya echise cha abhaanu, nibhamusiga, nibhagenda.
Ribhuusyo rya okuteganya Yeesu inguru ya okutobha rigooti
13 Niwo abhatangasya bha Abhayawudi nibhatuma Abhafarisaayo abharebhe aamwi na abharuubhirisya bha omukama Yeroode Atipaasi, bhateganye Yeesu okuruubhana na emisango jaaye omwene. 14 Bhejire bhaakinga nibhamubhwira ati, “Awe Omwiyigisya, chimenyere ati awe uri muunu wa echimari, na joone jinu owaayika ni ja echimari. Chimenyere ati awe utakuubhaya omuunu woonewoone, noorwo ari na echibharo cha inguru, echo chitari chiinu kw‑awe. Owiyigisya injira ya Nyamuwanga kwa echimari. Angu, ebhiraagiro bhya Muusa ebhichiikirisisya okutobha rigooti ku‑Kayisaari,e amwi wuri? Chitobhe amwi chisige okutobha?”f
15 Nawe Yeesu ꞉aamenyere obhwirimaanya bhwebhwe, ˆnaabhabhwira ati, “Mbawo omuregeeja okunteganya? Mundeetere idinaarig niyirore.” 16 Niwo nibhamusirira, ˆnaabhabhuusya ati, “Orususo runu na risiina rinu ni bhyaga?” Abheene nibhamusubhya ati, “Ni bhya Kayisaari.” 17 Yeesu ˆnaabhabhwira ati, “Ebhiinu bhya Kayisaari muyaane Kayisaari, na ebhya Nyamuwanga muyaane Nyamuwanga.” Bhoone nibhamuruguura muno.
Yeesu keeyigisya inguru ya obhusuuruko bhwa abhafuuwe
18 Niwo Abhasadukaayoh abharebhe nibhaaja ku‑Yeesu. Abheene abheeyigisyaga ati, bhutari‑wo obhusuuruko bhwa abhafuuwe. Nibheeya, nibhamubhuusya ati, 19 “Omwiyigisya, Muusa ꞉aachiragiriiye ati, ‘Araabha omurume aakafwa na okusiga omugasi waaye atari na omwana, omumura waabho keendwa eengirire omutumbagasi oyo, korereki eebhurire omumura waabho unu ꞉aafuuwe abhaana.’i 20 Mbe, bhaariga bhari‑wo abhamura bhataanu na bhabhiri bha inda imwi. Omumura omukuru ˆnaatwara omugasi, neeya omumura oyo ˆnaafwa atasigire‑ko omwana. 21 Omumura waabho wa kabhiri, ˆneengirira omutumbagasi oyo, omumura oyo, wone ˆnaafwa atasigire‑ko omwana ku‑mutumbagasi oyo. Nyabhuriko ku‑mumura wa kasatu wone nijibha kutyokutyo. 22 Abhamura abho bhoone bhataanu na bhabhiri nibhafwa bhatasigire‑ko omwana wuri. Ku‑bhuteero, omutumbagasi oyo wone ˆnaafwa. 23 Mbe nuuchibhwire, ku‑rusuku rwa obhusuuruko, bhunu emwe omwayika ati, abhaanu bharisuuruka, omutumbagasi oyo aribha omugasi waaga? Okubha abhamura bhoone bhataanu na bhabhiri ꞉bhaamwingiriiye na okumutwara.”
24 Yeesu ˆnaabhasubhya ati, “Emwe mubhurire, kwa okubha mutakumenya jinu jikaamirwe mu‑Bhikaame Ebhyeru noorwo obhuturo bhwa Nyamuwanga kutyo bhuri. 25 Omwanya gunu abhafuuwe bharisuuruka, bhataritwara noorwo okutwarwa kata. Bharibha rwa bhamaraayika wa Nyamuwanga mu‑rwire, abheene bhatakutwara noorwo bhatakutwarwa. 26 Nawe ni chimari ati, abhafuuwe bharisuuruka. Angu, muchaariga okusoma mu‑chitabho cha Muusa, kutyo Nyamuwanga ꞉aayikire mu‑chisaka chinu chaariga nichaaka omuriro? Mu‑chisaka arya, Nyamuwanga ꞉aabhwiriiye Muusa ati, ‘Anye niri Nyamuwanga wa Bhurayimu, Isaaka na Yakobho.’j 27 Mu‑misango ejo Nyamuwanga kaayika ati, omwene atari Nyamuwanga wa abhafuuwe tari ni Nyamuwanga wa abhaanga.k Emwe mubhurire muno.”
Echiraagiro echinene okukira bhyone
28 Omwanya gunu Yeesu aariga ˆnaabhambasyanya na Abhasadukaayo, omwiyigisya umwi wa ebhiraagiro bhya Muusa ˆnaakinga, ˆnoongwa chinu chaariga nichikora nibhabhambasyanya. Ejire oongwa ati Yeesu aabhasubhya kisi, ˆnaamubhuusya ati, “Mu‑bhiraagiro bhyone, ni chiraagiro ki chinu chiri cha okwamba?”
29 Yeesu ˆnaamusubhya ati, “Echiraagiro cha okwamba nicho chinu, ‘Emwe Abhayisirayeeri mutegeresye! Raatabhugenyi Nyamuwanga weeswe, niwe Raatabhugenyi eenyere. 30 Wendega Raatabhugenyi, Nyamuwanga waawo kwa omwoyo gwawo gwone, kwa omutima gwawo gwone, kwa obhwenge bhwawo bhwone na okwa amanaga gaawo goone.’l 31 Echiraagiro cha kabhiri nicho chinu, ‘Wendega oweejaanyu, rwa kutyo owiyenda omwene.’m Chitari‑wo echiragiriro echindi echinene okukira ebhibhiri ebhyo.”
32 Omwiyigisya wa ebhiraagiro oyo ˆnaabhwira Yeesu ati, “Waayika kisi Mwiyigisya! Waayika chimari ati Raatabhugenyi Nyamuwanga ni umwi era, atari‑wo owundi wuri, tari ni mwene eenyere. 33 Ka wone waayika ati, wendega Nyamuwanga kwa omwoyo gwawo gwone, kwa obhwenge bhwawo bhwone, kwa amanaga gaawo goone, na wendega wone oweejaanyu rwa kutyo owiyenda omwene. Ago nigo amaragiriro ga bhusibhusi muno. Emisango jinu ni ja bhusibhusi okukora okukira okusoosya ebhyogo bhyone bhya okwochiibhwa na ebhitambwan ebhindi bhyone.”
34 Yeesu ejire aarora ati omuunu oyo aasubhya kwa obhwengeeso, ˆnaamubhwira ati, “Awe utari kura mu‑kwingira mu‑bhukama bhwa Nyamuwanga.” Okwambira omwanya ogwo, atari‑wo omuunu noorwo umwi unu ꞉aaregeejere okubhuusya Yeesu amabhuusyo agandi.
Kirisito niwe orwibhuro rwa Dawudi na Raatabhugenyi wa bhoone
35 Omwanya gunu Yeesu eeyigisyaga abhaanu mw‑Iyekaru rya Nyamuwanga, ˆnaabhabhuusya ati, “Kurwa ki abheeyigisya bha ebhiraagiro bhya Muusa abhaayika ati Kirisito ni mwana wa Dawudi?o 36 Dawudi omwene omwanya gunu aatangasibhwaga na Mwoyo Mweru, ꞉aayikire ati,
‘Raatabhugenyi Nyamuwanga ꞉aabhwiriiye Raatabhugenyi waani ati,p
“Inyanja orubhaara rwani rwa ebhuryo,
okukingira omwanya gunu enija okutuura abhasoko bhaawo
emwaro ya amaguru gaawo.”’q
37 “Dawudi omwene kaayika ati Kirisito ni Raatabhugenyi waaye. Kurwa ejo, Kirisito atakutura okubha omwana waaye era, tari ni Raatabhugenyi waaye wone.” Abhaanu bha echise echinene echo bhaariga nibhategeresya Yeesu kwa rikonderwa.
Yeesu kaakengya inguru ya abheeyigisya bha ebhiraagiro bhya Muusa
38 Mu‑meeyigisyo gaaye agandi, Yeesu ˆnaayika ati, “Mwikengega abheeyigisya bha ebhiraagiro bhya Muusa. Abheene abheenda okuribhata ku‑njira bhafwayega emingiro jeebhwe emireera. Ka wone, abheenda muno bhakeesibhwe na abhaanu kwa echibharo mu‑maguriro. 39 Noorwo mu‑nju ja ameekofyanyo geebhwe, abhabhaga nibheenda okwinyanja ku‑bhitebhe bhya imbere bhya echibharo. Mu‑siku ja jichikukuru, abhabhaga nibheenda muno okwinyanja ku‑bhitebhe bhya abhagenyi abha echibharo. 40 Abheene abheerimaanyaga, kwa okubha abharandirisya muno risabhwa ryebhwe ku‑Nyamuwanga, korereki bheekondye ku‑bhaanu, nawe abhateesya abhatumbagasi jinju jeebhwe! Mbe, mumenye ati, ku‑rusuku rwa indamu, chimari bhariramira jimbuma nyafu muno okusooka ku‑Nyamuwanga!”
Omutumbagasi kaasoosya echoogo cha ekisi
41 Yeesu ˆneenyanja ayeeyi na echiinu cha okubhiikira‑mo echiyaanwa mw‑Iyekaru rya Nyamuwanga. Aaringiraga abhaanu nibhatuura ebhiyaanwa mu‑chiinu chirya cha okubhiikira‑mo. Abhaniibhi bhaafu bhaariga nibhasoosya jipirya nyafu. 42 ˆNaaja omugasi umwi, omutumbagasi omutaka, wone ˆnaasoosya jiyera ebhiri nooto era. 43 Yeesu ejire aarora ejo, ˆnaabhirikira abheeyigisibhwa bhaaye, ˆnaabhabhwira ati, “Ni chimari enibhabhwira ati, omutumbagasi omutaka oyo, aasoosya jipirya nyafu okukira bhoone bhanu bhaasoosya. 44 Enaayika kutyo kwa okubha abhandi bhanu bhoone bhaasoosya bhinu bhisaagire kw‑ibhona ryebhwe ryafu. Nawe omutumbagasi omutaka unu, ku‑bhutaka bhwaye, aasoosya bhyone bhinu aari ari nabhyo.”