Mataayo 23

Yeesu kaagonya Abhafarisaayo na abheeyigisya bha ebhiraagiro

(Maariko 12:38-40; Ruuka 11:37-52, 20:45-47)

1 Mbe, Yeesu ˆnaabhwira echise cha abhaanu na abheeyigisibhwa bhaaye ati, 2 “Abheeyigisya bha ebhiraagiro bhya Muusa na Abhafarisaayo bhari na obhuturo bhwa okwiyigisya abhaanu ebhiraagiro bhya Muusa. 3 Kurwa ejo, mugwate kisi jinu abhabheeyigisya na mukore joone. Nawe mwasiga okuruubha ebhikorwa bhyebhwe, kwa okubha abheene bhatakukora joone jinu abhabheeyigisya. 4 Abheene abhabhoya ebhiraagiro bhyone rwa emigugu emisito na okutwikya abhaanu ku‑mabhega, nawe abheene bhatakwenda okujikuunʼya‑ko noorwo na echaara, korereki bhasakire okujibhatura. 5 Joone jinu abhakora, abhakora korereki bharorwe na bhaanu. Abheebhoyaga ku‑bhisuusu na ku‑mabhoko jikobha jinene okukira bhya abhandi bhinu bhakaamire‑ko ebhiraagiro. Ka wone abhoongesya‑ko ebhisangʼarye bhya ku‑bhufunyiro bhwa emyenda jeebhwe bhibhe bhireera okukira bhya abhandi. 6 Mu‑siku ja jichikukuru, abhabhaga nibheenda muno okwinyanja ku‑bhitebhe bhya abhagenyi bha echibharo. Noorwo mu‑nju ja ameekofyanyo geebhwe, abhabhaga nibheenda okwinyanja ku‑bhitebhe bhya imbere bhya echibharo. 7 Ka wone, abheenda muno bhakeesibhwe na abhaanu kwa echibharo mu‑maguriro na bhabhe nibhabhirikirwa, ‘omwiyigisya.’

8 “Nawe emwe, musige okwikirisya okubhirikirwa, ‘omwiyigisya,’ kwa okubha muri na Omwiyigisya umwi era, na emwe bhoone muri bhayiri. 9 Ka wone, musige okubha nimubhirikira omuunu woonewoone, ‘raata’ ku‑chaaro kunu, kwa okubha muri na Raata umwi era unu ari mu‑rwire. 10 Ka wone, musige okubha nimwikirisya okubhirikirwa, ‘omutangasya,’ kwa okubha muri na Omutangasya umwi era, wone niwe Kirisito. 11 Omuunu woonewoone unu keenda okubha omukuru kw‑imwe, keendwa abhe omukosi weemwe. 12 Omuunu woonewoone unu keeriinyagisya inguru, Nyamuwanga arimworomosya emwaro. Nawe omuunu woonewoone unu keekeeya, Nyamuwanga arimuriinyagisya inguru.

13 “Jiribhabhona emwe abheeyigisya bha ebhiraagiro bhya Muusa na emwe Abhafarisaayo! Emwe muri bheerimaanya, kwa okubha omuyingirira abhaanu okwingira mu‑bhukama bhwa mu‑rwire kwa ameeyigisyo geemwe. Emwe abheene mutakwingira, ka wone mutakwikirisisya abhaanu abhandi bhanu abheenda okwingira.

[ 14 “Jiribhabhona emwe abheeyigisya bha ebhiraagiro bhya Muusa na emwe Abhafarisaayo! Emwe muri bheerimaanya, kwa okubha omurandirisya muno risabhwa ryemwe ku‑Nyamuwanga, korereki mwikondye ku‑bhaanu, nawe omuteesya abhatumbagasi ribhona ryebhwe. Mbe, mumenye ati ku‑rusuku rwa indamu, chimari muriramira jimbuma nyafu okusooka ku‑Nyamuwanga.]

15 “Jiribhabhona emwe abheeyigisya bha ebhiraagiro bhya Muusa na emwe Abhafarisaayo! Emwe muri bheerimaanya, kwa okubha omwiyinda mu‑chaaro choone na okwambuka inyanja, korereki mukongye omuunu unu atari Muyawudi abhe muruubhirisya weemwe. Nawe akamara okubheekirisisya, omumukora okubha omuunu unu eeyire mu‑muriro gwa akajaanende koone kwiya kabhiri okukira emwe abheene.

16 “Jiribhabhona emwe abhatangasya abhawofu, kwa okubha omwiyigisya abhaanu ati, ‘Araabha omuunu kaarayira kw‑Iyekaru rya Nyamuwanga, echirayiro chaaye echo chitari chiinu. Nawe araabha kaarayira ku‑naaryo inu isoosiibhwe mw‑Iyekaru rya Nyamuwanga, omuunu oyo keendwa akore rwa kutyo ꞉aarayiiye.’ 17 Yego, emwe muri bhataamutaamu, ka wone muri bhawofu! Ni chiiya chinu chiri na obhurambu bhunene okukira echindi, ni naaryo inu isoosiibhwe mw‑Iyekaru rya Nyamuwanga, amwi ni Riyekaru rya Nyamuwanga rinu eryesya inaaryo eyo? 18 Ka wone, omwiyigisya abhaanu ati, ‘Araabha omuunu kaarayira ku‑chigabhiro cha mw‑Iyekaru rya Nyamuwanga, echirayiro chaaye echo chitari chiinu. Nawe araabha kaarayira ku‑choogo chinu chisoosiibhwe ku‑chigabhiro echo, omuunu oyo, keendwa akore rwa kutyo ꞉aarayiiye.’ 19 Yego, emwe muri bhawofu! Ni chiiya chinu chiri na obhurambu bhunene okukira echindi, ni choogo amwi ni chigabhiro chinu echeesya echoogo echo? 20 Mbe, araabha omuunu kaarayira ku‑chigabhiro, kaarayira na ku‑bhyogo bhinu bhiri ku‑chigabhiro echo. 21 Ka wone, araabha omuunu kaarayira kw‑Iyekaru rya Nyamuwanga, kaarayira kw‑Iyekaru na ku‑Nyamuwanga unu eekaaye‑mo. 22 Ka wone, araabha omuunu kaarayira ku‑rwire, kaarayira ku‑chitebhe cha ingʼoma cha Nyamuwanga na ku‑Nyamuwanga omwene unu achiinyanjire‑ko.

23 “Jiribhabhona emwe abheeyigisya bha ebhiraagiro bhya Muusa na emwe Abhafarisaayo! Emwe muri bheerimaanya, kwa okubha omugwata ebhiraagiro bhya okusoosya imwi ya rikumi noorwo ku‑bhiinu bhya obhurambu bhutooto muno, rwa omutootoji, ebhinjari na obhukaanu. Nawe, musigire emisango ja bhusibhusi muno ku‑bhiraagiro bhya Muusa. Musigire okukora rirenga, okubha na echigongo na okubha abheeyikanyibhwa ku‑Nyamuwanga na ku‑bhaanu abhandi. Tari omukenwa okukora joone ejo, eminene na emitooto. 24 Emwe muri bhatangasya abhawofu, kwa okubha omufubhura imbu, nawe omumira ingamiya!

25 “Jiribhabhona emwe abheeyigisya bha ebhiraagiro bhya Muusa na emwe Abhafarisaayo. Emwe muri bheerimaanya, kwa okubha mu‑meeso ga abhaanu omwikora ati muri bhaanu abheeru imbere ya Nyamuwanga. Omwosya kisi anja ya omutawo na orutubha, nawe mutakwosya‑mo bhinu bhiri‑mo, ebhyo ni bhiinu bhinu mubhwene kwa obhwifi na okurema okwiyingirira. 26 Emwe Abhafarisaayo abhawofu! Nyabharinyabhari mutangate mute ebhibhiibhi bhinu bhiri mu‑myoyo jeemwe, rwa kutyo omwosya obhukoote bhunu bhuri mu‑mutawo. Nikwo kutyo, ebhikorwa bhyemwe wone ebhija okubha bhya ekisi, rwa kutyo omutawo anja ogubha gwerere gukabha gwosiibhwe.

27 “Jiribhabhona emwe abheeyigisya bha ebhiraagiro bhya Muusa na emwe Abhafarisaayo! Emwe muri bheerimaanya, kwa okubha muri rwa ebhituuro bhinu bhinaaribhwe na ichokaa. Anja ebhibhonekana ati bhikondere, nawe mu‑nda bhiijuuye amawa ga abhafuuwe na obhukoote bhwa bhuri mbaga. 28 Nikwo kutyo emwe wone, anja omubhonekana okubha abhaanu abharengeresi imbere ya Nyamuwanga, nawe echimari ni ati mu‑myoyo jeemwe mwijuuye obhwirimaanya na obhunyamuke.

29 “Jiribhabhona emwe abheeyigisya bha ebhiraagiro bhya Muusa na emwe Abhafarisaayo! Emwe muri bheerimaanya, kwa okubha omuumbaka ebhituuro bhya abharagi bha Nyamuwanga na okunojoorya kisi ebhituuro bhya abhaanu abhandi bhanu bhaariga bhari bharengeresi imbere ya Nyamuwanga. 30 Omumara nimwayika ati, ‘Chikabheeye chiri‑wo omwanya gunu bhasaaja bhaariga bhari bhaanga, chitakasangiiye aamwi nabho okwita abharagi bha Nyamuwanga.’ 31 Woori, kwa okwayika kutyo, omweresya ati emwe wone muri rwa bhasaaja waanyu bhanu ꞉bheetire abharagi bha Nyamuwanga! 32 Mbe, mugende mukuumisye ebhibhiibhi bhinu bhasaaja waanyu ꞉bhaambisiisye! 33 Emwe muri njoka na muri rwibhuro rwa jinjoka! Muriiruka kutiki indamu ya Nyamuwanga ya okweswa mu‑muriro gwa akajaanende koone?

34 “Ringira, nikwo okukora, enibhatumira abharagi bha Nyamuwanga, abhaanu bhanu abhasombookerwa kisi Ebhikaame Ebhyeru, na abheeyigisya bha ebhiraagiro bhya Nyamuwanga. Nawe abhaanu abharebhe ku‑bheene, muribheeta na okubhabhamba ku‑musarabha. Abhandi muribhabhuma na jijaridi mu‑nju ja ameekofyanyo geemwe, na abhandi muribharuubhirira mu‑bhuri musi na okubhanyaasya. 35 Kurwa ejo, Nyamuwanga aribharamura emwe ku‑songa ya okwita abhaanu abharengeresi bhoone. ꞉Mwakorere kutyo, okwambira omwanya gunu Kayini ꞉eetire Abheeri unu aariga atari na esoro ryoneryone, okukingira okwitwa kwa Jaakariya, omwana wa Bharaakiya, unu ꞉eetiiywe mw‑Iyekaru agatigati ya inju ingʼuru ya Nyamuwanga na echigabhiro. 36 Ni chimari enibhabhwira ati, Nyamuwanga ariramura abhaanu bha riyimbo rinu ku‑songa ya ebhibhiibhi ebhyo bhyone.”

37 Niwo Yeesu ˆnaayika ati, “Emwe abhaanu bha Yerusareemu! Abhaanu bha Yerusareemu! Omwita abharagi na okubhuma amabhuyi abhaanu bhanu Nyamuwanga ꞉aatumire kw‑imwe. Ni kwiya karinga neendere okubhakumanya rwa kutyo ingʼoko eyikumanya ebhyanakoko bhyayo mu‑mabhabha gaayo, keemwe nimurema! 38 Ringira, Nyamuwanga kaja okukora omusi gwemwe gubhe etongo. 39 Anye enibhabhwira ati, mutarindora rindi okukingira omwanya gunu muryayika ati, ‘Ayaanwe amabhando unu kaaja kw‑isiina rya Raatabhugenyi Nyamuwanga!’”