Yeesu kaaraga inguru ya okufumurwa kwa Riyekaru rya Nyamuwanga
13
1 Omwanya gunu Yeesu aariga ˆnaasooka mu‑rubhuga rwa Riyekaru rya Nyamuwanga aamwi na abheeyigisibhwa bhaaye, omwiyigisibhwa waaye umwi ˆnaamubhwira ati, “Omwiyigisya, rora amabhuyi amanene ganu na jinju jinene jinu kutyo ebhiruguusya!” 2 Yeesu ˆnaamusubhya ati, “Owurora jinju jinene jinu? Ritari‑wo ribhuyi noorwo rimwi rinu ririsigara inguru ya erindi, goone garifumibhwa!”Ebhinyaasyo bhyafu bhinu ebhiija
3 Omwanya gunu Yeesu aariga eenyanjire ku‑chiima cha Emijeyituuni, asomekeenega na Riyekaru rya Nyamuwanga, Peetero, Yakobho, Yowana na Andereya nibhamujaa‑ko. Nibhamubhuusya bhumbise ati, 4 “Chibhwire, emisango ejo jirikorekana rusuku ri? Ka wone, niki chinu chiribha echibharikisyo cha okweresya ati ejo jiri yeeyi okukorekana?”
5 Niwo Yeesu ˆnaamba okubhabhwira ati, “Mwiyangarire, omuunu woonewoone aasiga okubhajiga! 6 Abhaanu bhaafu bhariija nibhakoreraga emirimu risiina ryani, bharyayikaga ati, ‘Anye naanye Kirisito!’ Abhaanu abho bharibha nibhajiga abhaanu bhaafu. 7 Ku‑mwanya ogwo, muribha nimuungwa emisango ja riremo na okubhubhuutwa kwa riremo. Mwasiga okuyaya, kwa okubha ejo jeenderwe jikorekane, nawe obhuteero bhwa echaaro obhubha bhuchaari okukinga.a 8 Echaaro chimwi chirirwana na echaaro echindi, obhukama bhumwi bhurirwana na obhukama obhundi. Riribha‑wo rinyamutikima rya echaaro anu na erya, na jimbaara ejindi jiribha na omweko. Ejo joone jiribha rwa obhwambiro bhwa obhusungu bhwa omugasi unu keenda okwibhura.
9 “Nawe emwe, mwiyangarire muno. Abhaanu bharibhasira mu‑maramuriro, ka wone bharibhasira mu‑nju ja ameekofyanyo geebhwe na okubhabhuma kubhiibhi. Bharibhasira imbere ya abhatungi bha Echiruumi na abhakama bha Echiyawudi ku‑songa yaani. Murikenwa okubha abhabhambaasi bhaani imbere ya abhatungi na abhakama abho. 10 Emisango ja Ekisi jeenderwe okuraasibhwa okwamba ku‑bhaanu bha ebhyaro bhyone. 11 Omwanya gunu abhaanu abho bharibhagwata na okubhasira mu‑maramuriro na okubharamura, mwasiga okuyaya ati, omuja okwayika ki. Mwayike jinu Nyamuwanga aribhayaana omwanya ogwoogwo. Mutari emwe bhanu muribha nimwayika, tari Mwoyo Mweru unu ari mu‑myoyo jeemwe niwe aribhaga naayika okutura kw‑imwe.
12 “Omuunu wa inda imwi, ariromera iniku owaabho korereki eetwe. Omwibhusi wa echirume ariromera iniku omwana waaye, na abhaana bhatarigayuka abheebhusi bheebhwe na bharireterera bheetwe. 13 Abhaanu bhoone bharibhasoka, isonga iri ati omunduubha.b Nawe, unu ariigumiirisya okukingira ku‑bhuteero, oyo niwe arichunguka.”
Jisiku ja ebhinyaasyo ebhinene mu‑mukoowa gwa Yuudeya
14 Omuunu woonewoone unu kaasoma emisango jinu, asombookerwe kisi obhugajuro bhwajo, “Omwanya omurebhe murirora echiinu cha okujabhiyasya na okunyamurac chimereeguuyu anu atakukenwa okubha, ayeeru mw‑Iyekaru rya Nyamuwanga.”d Niwo abhaanu bhanu bhari Yuudeya, bhabhirimire mu‑bhiima! 15 Omuunu unu aribhaga ariinyire ku‑rusara, eeke na okubhirima awoawo, aasiga okwingira mu‑nju okugega echiinu choonechoone! 16 Kutyokutyo, omuunu unu ari mw‑isambu, aasiga okusubha iika okugega omwenda gwaye! 17 Nawe, jiribhabhona abhagasi bhanu bharibhaga bhafugaaye na bhanu bharibhaga nibhaneenʼya mu‑siku ejo. 18 Musabhwe Nyamuwanga ati, jisiku ejo jisige okubha omwanya gwa imbewo induru, 19 kwa okubha jisiku ejo jiribha ja ebhinyaasyo bhinene muno. Ebhinyaasyo rwa ebhyo, bhichaariga okusookerera noorwo na akatyari, okwambira omwanya gunu Nyamuwanga ꞉aabhumbire echaaro, okukingira reero inu. Ka wone bhitaribha‑wo rwa ebhyo rindi. 20 Ka wone, araabha Raatabhugenyi ataakageruuye omwanya gwa ebhinyaasyo ebhyo, mbe atari‑wo omuunu unu aakachungukire. Nawe Nyamuwanga arigerura omwanya ogwo, ku‑songa ya abhasorwa bhaaye.
21 “Ku‑mwanya ogwo, araabha omuunu kaabhabhwira ati, ‘Ringira, Kirisito ari anu!’ amwi ‘Ari erya!’ mwasiga okumwikirisisya. 22 Bhariibhuka abharagi abhabheeyi na abhaanu bhanu bharibhaga nibheetoga ati ni Kirisito. Bharibhaga nibhakora ebhibharikisyo na ebhiruguusyo, korereki bhajige abhaanu na araabha ikaturikeene, bharegeeje okujiga na abhasorwa bha Nyamuwanga. 23 Mbe, mwiyangarire! Anye naatangata okubhabhwira joone ejo jichaari okukorekana.
24 “Mbe, omwanya gwa jisiku ja ebhinyaasyo ogwo guritura, risuubha ririturwa‑ko echisuute, okwesi kutarisoosya obhweru rindi, 25 na jinjota jirigwa okusooka mu‑rutumba. Amanaga ago goone ga mu‑rutumba garisingisibhwa.e
26 “Niwo abhaanu bhoone bharindora anye Omwana wa Omuunu niniija niri mu‑meere na amanaga maafu na rikusyo.f 27 Niwo nirituma bhamaraayika bhaani, korereki bhakumanye abhasorwa bha Nyamuwanga okusooka mbaara joone ena ja echaaro, nikwo okwayika ati, okusooka bhuri rubhaara ku‑chaaro choone.”
28 Yeesu ˆnaabhabhwira ati, “Mwiyigire echijekekanyo okusooka kw‑iti rya ritiini. Amatabhi gaaryo gaakasebhuka na okunyirira, niwo omumenya ati omwanya gwa ingʼubha ya okwamba gwafogeeye. 29 Kutyokutyo, emwe wone mukarora ejo nijamba okukorekana, mumenye ati, niri yeeyi okuuja. 30 Ni chimari enibhabhwira ati, riyimbo rinu ritariwaa‑wo emisango ejo joone jichaari okukuumira. 31 Orutumba na echaaro bhiritura, nawe emisango jaani jitaritura wuri.
Nyamuwanga wenyere niwe kaamenya orusuku rwa okusubha kwa Yeesu
32 “Nawe, atari‑wo omuunu unu kaamenya orusuku noorwo isaa inu emisango ejo jirikorekana. Noorwo bhamaraayika bha mu‑rwire amwi Omwana, bhoone bhatakumenya. Tari Raata Nyamuwanga wenyere niwe kaarumenya. 33 Kurwa ejo, mwiyangarirega! Mutengeejega, kwa okubha mutakumenya ati, omwanya ogwo gurikinga rusuku ri.
34 “Okuuja kwani okususanyibhwa na omuunu unu ꞉eendere okuja orugendo. ˆNaasigira abhakosi bhaaye inju yaaye korereki bhayangarire. ˆNaagabhira bhoone emirimu ja okukora. ˆNaaragirira omuriisi wa orwigi ati, atengeeje.”
35 Yeesu ˆnaagenderera okwayika ati, “Emwe wone, mutengeeje, kwa okubha mutakumenya ati omwene inju kaasubha ri. Mutakumenya araabha kaasubha keegoro, amwi mu‑bhwire agati, amwi mu‑ruguru, amwi katondo. 36 Mutengeeje, korereki noorwo akaaja kwa okutakya, aasiga okubhasanga muwongeeye. 37 Omusango gunu enibhabhwira, nigwo enibhwira abhaanu bhoone ati, bhatengeeje.”